1 Bansangu 12:1-40
-
Bantu yina pesaka luyalu ya Davidi maboko (1-40)
12 Yai bantu yina kwisaka kisika Davidi vandaka na Siklagi+ ntangu yandi vandaka ve na mpila ya kutambula mutindu yandi me zola sambu na Saule+ mwana ya Kishi, mpi bo vandaka na kati ya basoda ya ngolo yina pesaka yandi maboko na bitumba.+
2 Bo vandaka ti minduki ya batolo-tolo, mpi bo vandaka kusadila diboko ya kitata mpi diboko ya kimama+ sambu na kulosa matadi+ to kulosa batolo-tolo na minduki ya batolo-tolo. Bo vandaka na kati ya bampangi ya Saule, bantu ya dikanda ya Benyamini.+
3 Mfumu na bo vandaka Ahiezere, mpi Yoashi, bo zole vandaka bana ya Shemaa muntu ya Gibea;+ Yeziele ti Peleti bana ya Azmaveti,+ Beraka, Yehu muntu ya Anatoti,
4 Yishmaya muntu ya Gibeoni,+ soda ya ngolo na kati ya bantu makumi tatu+ mpi na zulu ya bantu makumi tatu; mpi Yeremia, Yahaziele, Yohanani, Yozabadi muntu ya Gedera,
5 Eluzai, Yerimoti, Bealia, Shemaria, Shefatia muntu ya Arifi,
6 Elkana, Yishia, Azarele, Yoezere, mpi Yashobeami, bana ya Kora;+
7 mpi Yoela ti Zebadia bana ya Yerohami muntu ya Gedore.
8 Ndambu ya bana ya Gadi kwendaka na simu ya Davidi na kisika ya ngolo ya lutaninu na ntoto-makanga;+ bo vandaka basoda ya ngolo, basoda yina zabaka bitumba mbote-mbote, bo vandaka ya kuyilama ti bitaninu ya nene mpi makonga, baluse na bo vandaka bonso baluse ya bantambu mpi bo vandaka ntinu bonso bambambi na bangumba.
9 Ezere vandaka mfumu, Obadia muntu ya zole, Eliabi muntu ya tatu,
10 Mishmana muntu ya iya, Yeremia muntu ya tanu,
11 Atai muntu ya sambanu, Eliele muntu ya nsambwadi,
12 Yohanani muntu ya nana, Elzabadi muntu ya uvwa,
13 Yeremia muntu ya kumi, Makbanai muntu ya kumi na mosi.
14 Bantu yai vandaka na kati ya bana ya Gadi,+ bamfumu ya basoda. Muntu ya fioti fwananaka ti bantu 100, mpi muntu ya kuluta nene fwananaka ti bantu to 1 000.+
15 Bayai bantu yina sabukaka Yordani na ngonda ya ntete ntangu basimu na yo vandaka ya kufuluka na masa, mpi bo kulaka bantu yonso yina vandaka kuzinga na bantoto ya kukonda ngumba, na ndambu ya esti mpi na ndambu ya westi.
16 Bantu ya nkaka ya Benyamini ti ya Yuda kwisaka mpi kisika Davidi vandaka na kisika na yandi ya ngolo ya lutaninu.+
17 Ebuna Davidi basikaka na ntwala na bo mpi tubilaka bo nde: “Kana beno me kwisa na ngemba sambu na kusadisa mono, beto ta kuma banduku. Kansi kana yo kele sambu na kuteka mono na bambeni na mono ntangu maboko na mono me sala ve diambu ya mbi, bika nde Nzambi ya ba-nkaka na beto kumona yo mpi kusambisa.”+
18 Ebuna mpeve kwisilaka* Amasai,+ mfumu ya bantu makumi tatu mpi yandi tubaka nde:
“Beto kele bantu na nge, O Davidi, beto kele ti nge, O mwana ya Yese.+
Ngemba, ngemba kuvanda na nge, mpi ngemba na muntu yina ke sadisa nge,Sambu Nzambi na nge ke sadisa nge.”+
Yo yina Davidi yambaka bo mpi tulaka bo na kati ya bamfumu ya bimvuka ya basoda.
19 Bantu ya nkaka ya Manase mpi tinaka, ebuna bo kwisaka na Davidi ntangu yandi kwisaka ti bantu ya Filistia sambu na kunwana ti Saule; kansi yandi sadisaka ve bantu ya Filistia, sambu na nima ya kusolula, bamfumu ya bantu ya Filistia+ songaka yandi na kuvutuka, mpi bo tubaka nde: “Yandi ta tina mpi ta kwenda na mfumu na yandi Saule, mpi yo ta tula luzingu na beto na kigonsa.”+
20 Ntangu yandi kwendaka na Siklagi,+ bantu yai katukaka na Manase mpi kwisaka na yandi: Adnah, Yozabadi, Yediayele, Mikaele, Yozabadi, Elihu, mpi Siletai, bamfumu ya mafunda ya Manase.+
21 Bo sadisaka Davidi na kunwana ti kimvuka ya miyibi, sambu bo yonso vandaka bantu ya ngolo mpi ya kikesa,+ mpi bo kumaka bamfumu ya basoda.
22 Konso kilumbu bantu vandaka kaka kukwisa na Davidi+ sambu na kusadisa yandi tii kuna yo kumaka camp ya nene bonso camp ya Nzambi.+
23 Yai ntalu ya bamfumu ya bantu yina vandaka ti binwaninu sambu na bitumba, bayina kwisaka na Davidi na Ebroni+ sambu na kupesa yandi kimfumu ya Saule na kuwakana ti mambu yina Yehowa+ tubaka.
24 Bantu ya Yuda yina vandaka kunata bitaninu ya nene mpi makonga vandaka bantu 6 800, yina vandaka ti binwaninu sambu na bitumba.
25 Na bana ya Simeoni, bantu ya ngolo mpi ya kikesa yina vandaka basoda vandaka 7 100.
26 Na Balevi, 4 600.
27 Yehoyada+ vandaka ntwadisi ya bana ya Aroni,+ mpi bantu 3 700 vandaka ti yandi,
28 mpi Zadoki,+ leke mosi ya bakala ya ngolo mpi ya kikesa, bamfumu 22 ya nzo ya tata na yandi vandaka ti yandi.
29 Na bana ya Benyamini, bampangi ya Saule,+ kuvandaka ti bantu 3 000, yina mingi na kati na bo vandaka ntete kutanina bima ya nzo ya Saule.
30 Na bana ya Efrayimi, kuvandaka ti bantu 20 800 ya ngolo, ya kikesa, mpi ya lukumu na banzo ya batata na bo.
31 Na ndambu ya dikanda ya Manase, kuvandaka ti bantu 18 000 yina bo solaka bazina na bo sambu bo kwisa kutula Davidi ntotila.
32 Na dikanda ya Isakare, yina vandaka kubakisa bantangu mpi kuzaba mambu yina Izraele fwete sala, kuvandaka ti bamfumu na bo 200, mpi bampangi na bo yonso vandaka na nsi ya lutwadisu na bo.
33 Na Zebuloni, kuvandaka ti bantu 50 000 yina lendaka kusala kisalu ya kisoda, yina vandaka kusala ndonga ya bitumba ti binwaninu yonso ya bitumba, bo yonso vukanaka ti Davidi na kwikama kibeni.*
34 Na Naftali, kuvandaka ti bamfumu 1 000, mpi bantu 37 000 vandaka ti bo, bo vandaka ti bitaninu ya nene mpi makonga.
35 Na bana ya Dani, bantu yina vandaka kusala ndonga ya bitumba vandaka 28 600.
36 Na Asere, bantu yina lendaka kusala kisalu ya kisoda sambu na kusala ndonga ya bitumba vandaka 40 000.
37 Bantu yina katukaka na simu ya nkaka ya Yordani,+ na bana ya Rubeni, na bana ya Gadi, mpi na ndambu ya dikanda ya Manase, bo vandaka basoda 120 000 ti binwaninu ya bitumba ya mitindu yonso.
38 Bantu yai yonso vandaka bantu ya bitumba, yina vandaka kuvukana na ndonga ya bitumba; bo kwisaka na ntima ya mvimba na Ebroni sambu na kukumisa Davidi ntotila ya Izraele ya mvimba, ebuna bantu yonso ya Izraele yina bikalaka vandaka na bumosi na luzolo na bo* ya kukumisa Davidi ntotila.+
39 Bo bikalaka pana ti Davidi bilumbu tatu, bo vandaka kudia mpi kunwa, sambu bampangi na bo yidikilaka bo mambu.
40 Diaka, bantu yina vandaka pene-pene na bo, mpi ata bantu yina vandaka tii na Isakare, na Zebuloni, mpi na Naftali, vandaka kunata madia na zulu ya bampunda, ya bashamo, ya bampunda ya nkaka, mpi ya bangombe—fufu, bagato ya bafige yina bo me kamuna mpi bambuma ya vinu, vinu, mafuta, bangombe mpi mameme mingi kibeni, sambu kiese vandaka na Izraele.
Banoti na nsi ya lutiti
^ Na kisina, “lwataka.”
^ To “bo yonso yina vukanaka ti Davidi vandaka ve na bantima zole.”
^ Na kisina, “vandaka na ntima mosi.”
