1 Bansangu 13:1-14
13 Davidi solulaka ti bamfumu ya mafunda, bamfumu ya bankama, mpi ti bantwadisi yonso.+
2 Na nima yandi tubilaka dibundu ya mvimba ya Izraele nde: “Kana yo ke monana mbote na meso na beno mpi kana Yehowa Nzambi na beto me ndima yo, bika nde beto tinda ndinga na bampangi na beto ya me bikala na baprovense yonso ya Izraele mpi na banganga-nzambi ti Balevi na bambanza na bo+ yina kele na banseke sambu bo kwisa kuvukana ti beto.
3 Bika nde beto vutula Sanduku+ ya Nzambi na beto.” Sambu na bilumbu ya Saule bo tudilaka yo ve dikebi.+
4 Dibundu ya mvimba ndimaka kusala yo, sambu yo monanaka mbote na meso ya bantu yonso.
5 Yo yina Davidi vukisaka Izraele ya mvimba, katuka na nzadi* ya Ezipte tii na Lebo-amati,*+ sambu na kukwenda kubaka Sanduku ya Nzambi ya kieleka na Kiriati-yearimi.+
6 Davidi ti Izraele ya mvimba tombukaka na Baala,+ na Kiriati-yearimi, ya Yuda, sambu na kubaka kuna Sanduku ya Nzambi ya kieleka, Yehowa, yina me vanda na kiti ya kimfumu na zulu* ya basherube,+ kisika bo ke bingaka zina na yandi.
7 Kansi, bo tulaka Sanduku ya Nzambi ya kieleka na pusu-pusu mosi ya mpa,+ ebuna bo bakaka yo na nzo ya Abinadabi mpi nataka yo, mpi Uzah ti Ahio vandaka kunata pusu-pusu yina.+
8 Davidi ti Izraele ya mvimba vandaka kuyangalala na ntwala ya Nzambi ya kieleka na ngolo na bo yonso, ti bankunga, bakidare, bima ya nkaka ya kubudila miziki ya kele ti bansinga, bangoma ya fioti,+ basembale,+ mpi bampungi.+
9 Kansi ntangu bo kumaka na kisika ya Kidoni ya bo ke tutaka bambuma sambu na kukatula yo bampusu, Uzah tandulaka diboko na yandi mpi simbaka Sanduku, sambu bangombe zolaka kubwisa yo.
10 Yo yina Yehowa wilaka Uzah makasi, mpi yandi bulaka Uzah sambu Uzah tandulaka diboko na yandi mpi simbaka Sanduku,+ ebuna yandi fwaka pana na ntwala ya Nzambi.+
11 Kansi Davidi waka makasi* sambu Yehowa wilaka Uzah makasi, mpi bo me kumaka kubinga kisika yina Peresi-uzah* tii bubu yai.
12 Yo yina Davidi kumaka kuwa Nzambi ya kieleka boma na kilumbu yina mpi tubaka nde: “Inki mutindu mono lenda nata Sanduku ya Nzambi ya kieleka kisika mono kele?”+
13 Davidi nataka ve Sanduku kisika yina yandi vandaka na Mbanza ya Davidi, kansi yandi lombaka nde bo nata yo na nzo ya Obedi-edomi muntu ya Gati.
14 Sanduku ya Nzambi ya kieleka vandaka ti bantu ya nzo ya Obedi-edomi, yo bikalaka na nzo na yandi bangonda tatu, mpi Yehowa vandaka kusakumuna bantu ya nzo ya Obedi-edomi ti yonso yina yandi vandaka na yo.+
Banoti na nsi ya lutiti
^ To “katuka na Shihore.”
^ To “kisika ya kukotila na Amati.”
^ To mbala ya nkaka, “na kati-kati.”
^ To “kumaka mawa-mawa.”
^ Yo ke tendula “Kukabwana ti Uzah.”
