1 Bansangu 15:1-29
15 Yandi landaka kuditungila banzo na Mbanza ya Davidi, mpi yandi yidikilaka Sanduku ya Nzambi ya kieleka kisika mpi tedimisilaka yo tenta.+
2 Na ntangu yina Davidi tubaka nde: “Muntu mosi ve fwete nata Sanduku ya Nzambi ya kieleka katula kaka Balevi, sambu Yehowa me solaka bo sambu na kunata Sanduku ya Yehowa mpi kusadila yandi ntangu yonso.”+
3 Na nima Davidi vukisaka Izraele ya mvimba na Yeruzalemi sambu na kunata Sanduku ya Yehowa na kisika yina yandi yidikilaka yo.+
4 Davidi vukisaka bana ya Aroni+ mpi Balevi:+
5 na bana ya Kohati, Uriele mfumu ti bampangi na yandi 120;
6 na bana ya Merari, Asaya+ mfumu ti bampangi na yandi 220;
7 na bana ya Gershomi, Yoele+ mfumu ti bampangi na yandi 130;
8 na bana ya Elisafani,+ Shemaya mfumu ti bampangi na yandi 200;
9 na bana ya Ebroni, Eliele mfumu ti bampangi na yandi 80;
10 na bana ya Uziele,+ Aminadabi mfumu ti bampangi na yandi 112.
11 Diaka, Davidi bingaka banganga-nzambi yai: Zadoki+ ti Abiatare,+ mpi Balevi yai: Uriele, Asaya, Yoele, Shemaya, Eliele, mpi Aminadabi,
12 mpi yandi tubilaka bo nde: “Beno kele bamfumu ya banzo ya batata ya Balevi. Beno kudisantisa, beno ti bampangi na beno, mpi beno nata Sanduku ya Yehowa Nzambi ya Izraele na kisika yina mono me yidikila yo.
13 Sambu beno nataka yo ve na mbala ya ntete,+ Yehowa Nzambi na beto wilaka beto makasi,+ sambu beto sosaka ve mutindu ya mbote ya kusala mambu.”+
14 Yo yina banganga-nzambi mpi Balevi kudisantisaka sambu na kunata Sanduku ya Yehowa Nzambi ya Izraele.
15 Ebuna Balevi nataka Sanduku ya Nzambi ya kieleka na mapeka na nsadisa ya banti,+ kaka mutindu Moize songaka bo, na kulanda ndinga ya Yehowa.
16 Na nima, Davidi songaka bamfumu ya Balevi na kutula bampangi na bo miyimbi-bankunga sambu bo yimba na kiese yonso, nzila mosi ti bima ya kubudila miziki: bima ya kubudila miziki ya kele ti bansinga, bakidare,+ mpi basembale.+
17 Yo yina Balevi tulaka Emani+ mwana ya Yoele, mpi na kati ya bampangi na yandi, Asafi+ mwana ya Berekia mpi, na kati ya bampangi na bo bana ya Merari, Etani+ mwana ya Kushaya.
18 Bampangi na bo ya kimvuka ya zole+ vandaka ti bo: Zekaria, Bene, Yaaziele, Shemiramoti, Yehiele, Uni, Eliabi, Benaya, Maaseya, Matitia, Elifelehu, mpi Mikneya, Obedi-edomi, mpi Yeyele bankengidi ya bakielo.
19 Yo lombaka nde miyimbi-bankunga yai Emani,+ Asafi,+ mpi Etani, kubula basembale ya kwivre;+
20 mpi Zekaria, Aziele, Shemiramoti, Yehiele, Uni, Eliabi, Maaseya, mpi Benaya vandaka kubula bima ya kubudila miziki ya kele ti bansinga ya bo me yidika sambu yo wakana ti Alamoti;*+
21 mpi Matitia,+ Elifelehu, Mikneya, Obedi-edomi, Yeyele, mpi Azazia vandaka kubula bakidare ya bo me yidika sambu yo wakana ti Sheminiti,*+ sambu bo vanda bantwadisi.
22 Kenania+ mfumu ya Balevi vandaka kukengila kisalu ya kunata bima, sambu yandi zabaka kisalu yina mbote-mbote,
23 mpi Berekia ti Elkana vandaka bankengidi ya bakielo sambu na Sanduku.
24 Banganga-nzambi yai: Shebania, Yoshafati, Netanele, Amasai, Zekaria, Benaya, mpi Eliezere vandaka kubula bampungi ngolo na ntwala ya Sanduku ya Nzambi ya kieleka,+ mpi Obedi-edomi ti Yehia vandaka mpi bankengidi ya bakielo sambu na Sanduku.
25 Ebuna Davidi mpi bankuluntu ya Izraele ti bamfumu ya mafunda vandaka kukwenda sambu na kubaka sanduku ya kuwakana ya Yehowa na nzo ya Obedi-edomi+ mpi kunata yo, na kiese.+
26 Ntangu Nzambi ya kieleka sadisaka Balevi yina vandaka kunata sanduku ya kuwakana ya Yehowa, bo tambikaka bana-bangombe ya babakala nsambwadi mpi mameme ya babakala nsambwadi.+
27 Davidi lwataka kazaka ya kukonda maboko ya bo me sala na lele ya kitoko, mutindu mosi ti Balevi yonso yina vandaka kunata Sanduku, miyimbi-bankunga, mpi Kenania mfumu ya kisalu ya kunata bima mpi ya miyimbi-bankunga; Davidi lwataka mpi efodi ya lino.+
28 Bantu yonso ya Izraele vandaka kutombuka ti sanduku ya kuwakana ya Yehowa ti milolo ya kiese,+ ti makelele ya kibongo, ti bampungi,+ ti basembale, bo vandaka kubula ngolo bima ya kubudila miziki ya kele ti bansinga mpi bakidare.+
29 Kansi ntangu sanduku ya kuwakana ya Yehowa kumaka na Mbanza ya Davidi,+ Mikale+ mwana ya Saule talaka na nsi, na nela, mpi yandi monaka ntotila Davidi ke pumbuka-pumbuka mpi ke yangalala; ebuna yandi yantikaka kuvweza Davidi na ntima na yandi.+
