1 Bansangu 16:1-43
16 Yo yina bo kotisaka Sanduku ya Nzambi ya kieleka mpi tulaka yo na kati ya tenta yina Davidi tedimisaka sambu na yo;+ ebuna bo pesaka makabu ya kuyoka mpi bimenga ya kinduku na ntwala ya Nzambi ya kieleka.+
2 Ntangu Davidi manisaka kupesa makabu ya kuyoka+ mpi bimenga ya kinduku,+ yandi sakumunaka bantu na zina ya Yehowa.
3 Diaka, yandi kabudilaka bantu yonso ya Izraele, konso bakala mpi konso nkento, dimpa mosi ya bo me sala bonso lupetu, gato mosi ya bo me sala na mbuma ya bo ke bingaka dati, mpi gato mosi ya bo me sala na mbuma ya vinu.
4 Na nima yandi tulaka Balevi ya nkaka sambu na kusala na ntwala ya Sanduku ya Yehowa,+ sambu na kupesa lukumu,* kupesa matondo, mpi kukumisa Yehowa Nzambi ya Izraele.
5 Asafi+ vandaka mfumu, mpi Zekaria vandaka kilandi na yandi; ebuna Yeyele, Shemiramoti, Yehiele, Matitia, Eliabi, Benaya, Obedi-edomi, mpi Yeyele+ vandaka kubula bima ya kubudila miziki ya kele ti bansinga mpi bakidare;+ ebuna Asafi vandaka kubula basembale,+
6 mpi banganga-nzambi Benaya ti Yahaziele vandaka kubula bampungi ntangu yonso na ntwala ya sanduku ya kuwakana ya Nzambi ya kieleka.
7 Na kilumbu yina, Davidi salaka nkunga mpi pesaka yo na mbala ya ntete na Asafi+ mpi bampangi na yandi sambu na kupesa Yehowa matondo:
8 Beno pesa Yehowa matondo,+ beno binga zina na yandi,Beno zabisa bantu bisalu na yandi!+
9 Beno yimbila yandi, beno yimba bankunga* sambu na kukumisa yandi,+Beno yindulula* bisalu na yandi yonso ya kuyituka.+
10 Beno kudikumisa sambu na zina na yandi ya santu.+
Bika nde bantima ya bantu yina ke sosaka Yehowa kuwa kiese.+
11 Beno sosa Yehowa+ mpi ngolo na yandi.
Beno sosa luse na yandi ntangu yonso.+
12 Beno yibuka bisalu ya kuyituka yina yandi me salaka,+Bimangu na yandi mpi makambu yina yandi me zengaka,
13 Beno bana* ya nsadi na yandi Izraele,+Beno bana ya Yakobi, bantu ya yandi me solaka.+
14 Yandi kele Yehowa Nzambi na beto.+
Balusambisu na yandi kele na ntoto ya mvimba.+
15 Beno yibuka kuwakana na yandi kimakulu,Mambu yina yandi silaka,* na bandonga funda ya bantu,+
16 Kuwakana yina yandi salaka ti Abrahami,+Mpi ndefi yina yandi diaka na ntwala ya Izaki,+
17 Yina yandi tulaka bonso nsiku sambu na Yakobi+Mpi bonso kuwakana ya mvula na mvula sambu na Izraele,
18 Nde, ‘Mono ta pesa nge insi ya Kanana+Bonso dikabu yina bo me pesa nge.’+
19 Yo salamaka ntangu beno vandaka bantu fioti,Ee, fioti kibeni, mpi beno vandaka banzenza na insi yina.+
20 Bo tambula-tambulaka katuka na dikanda mosi tii na dikanda ya nkaka,Katuka na kimfumu mosi tii na bantu ya nkaka.+
21 Yandi pesaka ve ata muntu mosi nzila ya kuniokula bo,+Kansi yandi nganinaka bantotila sambu na bo,+
22 Nde, ‘Beno simba ve bantu ya mono me tulaka mafuta,Mpi beno sala ve bambikudi na mono ata kima mosi ya mbi.’+
23 Ntoto ya mvimba, beno yimbila Yehowa!
Beno zabisa luguluku na yandi konso kilumbu!+
24 Beno zabisa nkembo na yandi na makanda,Beno zabisa bisalu na yandi ya kuyituka na bantu yonso.
25 Sambu Yehowa kele nene mpi yo me fwana kibeni na kukumisa yandi.
Yandi ke pesaka boma mingi kuluta banzambi yonso ya nkaka.+
26 Banzambi yonso ya bantu kele banzambi ya kukonda mfunu,+Kansi Yehowa muntu salaka zulu.+
27 Bunene* ti lukumu kele na ntwala na yandi;+Ngolo ti kiese kele na kisika yina yandi ke zingaka.+
28 Beno mabuta ya bantu, beno pesa Yehowa yina me fwana na yandi,Beno pesa Yehowa yina me fwana na yandi sambu na nkembo mpi ngolo na yandi.+
29 Beno pesa Yehowa nkembo yina me fwana na zina na yandi;+Beno nata dikabu mpi beno kota na ntwala na yandi.+
Beno fukama na ntwala ya* Yehowa ti bilele ya santu.*+
30 Ntoto ya mvimba, beno tekita na ntwala na yandi!
Ntoto* me tulamaka ngolo na kisika na yo; yo lenda nikana ve.+
31 Bika zulu kuyangalala, mpi bika ntoto kuvanda na kiese;+Beno zabisa na kati ya makanda nde: ‘Yehowa me kuma Ntotila!’+
32 Bika nde nzadi-mungwa ti bima yonso yina kele na kati na yo kutula makelele;Bika nde banseke ti bima yonso yina kele na kati na yo kuvanda na kiese,
33 Na ntangu yina mosi, bika nde banti ya mfinda kutula milolo ya kiese na ntwala ya Yehowa,Sambu yandi ke kwisa* kusambisa ntoto.
34 Beno pesa Yehowa matondo, sambu yandi kele mbote;+Zola na yandi ya kwikama ke zingaka kimakulu.+
35 Mpi beno tuba nde, ‘Gulusa beto, O Nzambi ya luguluku na beto,+Katula beto na maboko ya makanda, vukisa beto mpi gulusa beto,Sambu beto pesa matondo na zina na nge ya santu+Mpi beto yangalala na kukumisa nge.*+
36 Bika nde bo kumisa Yehowa, Nzambi ya Izraele,Mvula na mvula.’”*
Ebuna bantu yonso tubaka nde, “Amen!”* mpi bo kumisaka Yehowa.
37 Na nima Davidi bikisaka Asafi+ ti bampangi na yandi pana na ntwala ya sanduku ya kuwakana ya Yehowa sambu na kusala ntangu yonso na ntwala ya Sanduku,+ na kutadila mutindu bo ke salaka konso kilumbu.+
38 Obedi-edomi ti bampangi na yandi, vandaka 68, mpi Obedi-edomi, mwana ya Yedutuni, ti Osa vandaka bankengidi ya bakielo;
39 mpi nganga-nzambi Zadoki+ ti banduku na yandi banganga-nzambi vandaka na ntwala ya nzo-tenta ya Yehowa na kisika ya kunanguka ya Gibeoni+
40 sambu na kupesa Yehowa makabu ya kuyoka mbala na mbala na mesa-kimenga ya dikabu ya kuyoka, konso suka mpi konso nkokila, mpi sambu na kusala mambu yonso yina bo me sonikaka na Nsiku ya Yehowa yina yandi pesaka Izraele.+
41 Kumosi ti bo, Emani ti Yedutuni+ mpi bantu ya nkaka yina bo solaka na bazina na bo sambu na kupesa Yehowa matondo,+ sambu “zola na yandi ya kwikama ke zingaka kimakulu”;+
42 mpi bantu yai: Emani+ ti Yedutuni vandaka ti bo sambu na kubula bampungi, basembale, mpi bima ya bo ke sadilaka sambu na kukumisa* Nzambi ya kieleka; mpi bana ya Yedutuni+ vandaka na kielo.
43 Na nima, bantu yonso kwendaka na banzo na bo, mpi Davidi kwendaka kusakumuna bantu ya nzo na yandi.
Banoti na nsi ya lutiti
^ Na kisina, “kuyibuka.”
^ To “beno bula miziki.”
^ To mbala ya nkaka, “tubila.”
^ Na kisina, “nkuna.”
^ Na kisina, “Ntuma yina yandi pesaka.”
^ To “Nkembo.”
^ To mbala ya nkaka, “sambu na lukumu ya busantu na yandi.”
^ To “Beno sambila.”
^ To “Ntoto ya ke butaka.”
^ To “me kwisa.”
^ To “yangalala na lukumu na nge.”
^ To “Katuka mvula na mvula tii mvula na mvula.”
^ To “Yo vanda mutindu yina!”
^ To “bima ya bo ke sadilaka sambu na kuyimbila.”
