1 Bansangu 18:1-17
18 Ntangu fioti na nima, Davidi bedisaka bantu ya Filistia mpi tulaka bo na nsi ya kiyeka na yandi, ebuna yandi botulaka Gati+ ti babwala yina kele na nziunga na yo na maboko ya bantu ya Filistia.+
2 Na nima yandi bedisaka Moabi,+ ebuna bantu ya Moabi kumaka bansadi ya Davidi mpi bo vandaka kufuta kitadi.+
3 Davidi bedisaka Adadezere+ ntotila ya Soba+ pene-pene ya Amati+ ntangu yandi vandaka kukwenda kutula kiyeka na yandi na ntoto yina kele na lweka ya Nzadi ya Efrate.+
4 Davidi botulaka yandi bapusu-pusu 1 000, bantu 7 000 yina ke tambusaka bampunda, mpi basoda 20 000 yina ke tambulaka na makulu.+ Na nima, Davidi zengaka misisa ya nima ya makulu ya bampunda yonso yina vandaka kubenda bapusu-pusu, kansi yandi zengaka ve misisa ya nima ya makulu ya bampunda 100.+
5 Ntangu bantu ya Siria ya Damasi kwisaka kusadisa Adadezere ntotila ya Soba, Davidi fwaka bantu ya Siria 22 000.+
6 Na nima Davidi tulaka bimvuka ya basoda na Siria ya Damasi, ebuna bantu ya Siria kumaka bansadi ya Davidi mpi bo vandaka kufuta kitadi. Yehowa vandaka kunungisa Davidi bisika yonso yina yandi vandaka kukwenda.+
7 Davidi bakaka mpi bitaninu ya wolo na bansadi ya Adadezere mpi yandi nataka yo na Yeruzalemi.
8 Davidi bakaka kwivre mingi na Tibati mpi na Kuni, bambanza ya Adadezere. Salomo salaka Nzadi-Mungwa ya kwivre,+ makunzi, mpi bisadilu ya kwivre na kwivre yina.+
9 Ntangu Towu, ntotila ya Amati, waka nde Davidi me bedisa basoda yonso ya Adadezere+ ntotila ya Soba,+
10 na mbala mosi yandi tindaka mwana na yandi Adorami na ntotila Davidi sambu na kusosa kuzaba kana yandi vandaka mbote mpi kusikisa yandi sambu yandi nwanisaka mpi bedisaka Adadezere (sambu Adadezere vandaka kunwana ti Towu mbala mingi), mpi yandi nataka bima ya arza, ya wolo, mpi ya kwivre ya mutindu na mutindu.
11 Ntotila Davidi santisaka bima yai sambu na Yehowa,+ kumosi ti arza mpi wolo yina yandi bakaka na makanda yonso: na Edomi mpi na Moabi, na bantu ya Amoni,+ na bantu ya Filistia,+ mpi na bantu ya Amaleki.+
12 Abishai+ mwana ya Seruya+ fwaka bantu ya Edomi 18 000 na Muwanda ya Mungwa.+
13 Yandi tulaka bimvuka ya basoda na Edomi, ebuna bantu yonso ya Edomi kumaka bansadi ya Davidi.+ Yehowa vandaka kunungisa* Davidi bisika yonso yina yandi vandaka kukwenda.+
14 Davidi vandaka kuyala Izraele ya mvimba,+ mpi yandi vandaka kusambisa mambu na lunungu mpi kuzenga mambu na mutindu ya kusungama sambu na bantu na yandi yonso.+
15 Yoabi mwana ya Seruya vandaka mfumu ya basoda,+ Yehoshafati+ mwana ya Ahiludi vandaka muntu ya ke sonikaka mambu,
16 Zadoki mwana ya Ahitubi ti Ahimeleki mwana ya Abiatare vandaka banganga-nzambi, mpi Shavsha vandaka sekretere.
17 Benaya mwana ya Yehoyada vandaka mfumu ya bantu ya Kereti+ mpi ya bantu ya Peleti.+ Bana ya Davidi vandaka na kisika ya ntete na nima ya ntotila.
Banoti na nsi ya lutiti
^ To “kugulusa.”
