1 Bansangu 21:1-30
21 Na nima Satana* nwanisaka Izraele mpi pusaka Davidi na kutanga bantu ya Izraele.+
2 Yo yina Davidi tubilaka Yoabi+ mpi bamfumu ya bantu nde: “Beno kwenda kutanga bantu ya Izraele, katuka na Bere-sheba tii na Dani;+ na nima beno kwisa kuzabisa mono sambu mono zaba ntalu na bo.”
3 Kansi Yoabi tubaka nde: “Bika nde Yehowa kukumisa bantu na yandi mingi mbala 100! Mfumu na mono ntotila, keti bo yonso kele ve bansadi ya mfumu na mono katuka ntama? Sambu na nki mfumu na mono ke zola kusala diambu yai? Sambu na nki yandi fwete kuma kikuma ya kunatila Izraele makambu?”
4 Kansi ndinga ya ntotila nungaka ndinga ya Yoabi. Yo yina Yoabi basikaka mpi kwendaka na Izraele ya mvimba, na nima yandi kwisaka kuvutuka na Yeruzalemi.+
5 Ebuna Yoabi pesaka Davidi ntalu ya bantu yina yandi sonikaka bazina. Ntalu ya bantu ya Izraele yina vandaka ti bambele ya bitumba kumaka 1 100 000, mpi ya bantu ya Yuda yina vandaka ti bambele ya bitumba kumaka 470 000.+
6 Kansi bo sonikaka ve bazina ya Balevi mpi ya bana ya Benyamini na kati na bo,+ sambu mambu yina ntotila tubaka vandaka mbi na meso ya Yoabi.+
7 Nzambi ya kieleka sepelaka ve ata fioti na diambu yai, yo yina yandi bulaka Izraele.
8 Ebuna Davidi tubilaka Nzambi ya kieleka nde: “Mono me sala disumu+ ya nene mutindu mono me sala diambu yai. Ntangu yai, pardo, lolula kifu ya nsadi na nge,+ sambu mono me sala mambu na buzoba kibeni.”+
9 Na nima, Yehowa tubilaka Gadi,+ muntu ya Davidi yina vandaka kumona bambona-meso, nde:
10 “Kwenda kutubila Davidi nde, ‘Yehowa me tuba nde: “Mono ke pesa nge mambu tatu ya kusola. Sola diambu yina mono fwete nata na zulu na nge.”’”
11 Yo yina Gadi kotaka kisika Davidi vandaka mpi tubilaka yandi nde: “Yehowa me tuba nde, ‘Sola
12 kana fwete vanda ti bamvula tatu ya nzala,+ to bangonda tatu sambu bambeni na nge kufwa nge na ntangu mbele ya bitumba ya bambeni na nge ta kanga nge,+ to bilumbu tatu ya mbele ya bitumba ya Yehowa—kipupa na insi+—ebuna wanzio ya Yehowa ta bebisa+ teritware ya mvimba ya Izraele.’ Ntangu yai yindula mvutu yina mono fwete pesa Muntu yina me tinda mono.”
13 Ebuna Davidi tubilaka Gadi nde: “Yo kele mpasi mingi sambu na mono. Pardo, bika mono bwa na maboko ya Yehowa, sambu mawa na yandi kele mingi;+ kansi kubika ve nde mono bwa na maboko ya muntu.”+
14 Na nima, Yehowa tindaka kipupa+ na Izraele, mpi bantu 70000 ya Izraele bwaka.+
15 Diaka, Nzambi ya kieleka tindaka wanzio mosi na Yeruzalemi sambu na kufwa yo; kansi ntangu yandi zolaka kufwa yo, Yehowa monaka yo mpi waka mawa sambu na mpasi yina,+ ebuna yandi tubilaka wanzio yina vandaka kufwa yo nde: “Yo me lunga!+ Kulumusa diboko na nge ntangu yai.” Wanzio ya Yehowa vandaka ya kutelama pene-pene ya kisika ya Ornani,+ muntu ya Yebusi,+ ya bo ke tutaka bambuma sambu na kukatula yo bampusu.
16 Ntangu Davidi talaka, yandi monaka wanzio ya Yehowa me telama kwaku ntoto kwaku zulu yandi me simba mbele ya bitumba+ na diboko na yandi mpi me tandula yo na ndambu ya Yeruzalemi. Davidi ti bankuluntu, yina lwataka basaki,+ bwaka mbala mosi baluse na ntoto.+
17 Davidi tubilaka Nzambi ya kieleka nde: “Keti mono ve muntu tubaka nde bo tanga ntalu ya bantu? Mono muntu me sala disumu, mpi mono muntu me sala mbi;+ kansi mameme yai—bo me sala inki? O Yehowa Nzambi na mono, pardo, bika nde diboko na nge kubula mono mpi nzo ya tata na mono; kansi kunatila ve bantu na nge mpasi yai.”+
18 Na nima wanzio ya Yehowa songaka Gadi+ na kusonga Davidi na kutombuka mpi kutungila Yehowa mesa-kimenga na kisika ya Ornani, muntu ya Yebusi,+ ya bo ke tutaka bambuma sambu na kukatula yo bampusu.
19 Yo yina, Davidi tombukaka mutindu Gadi tubaka, na zina ya Yehowa.
20 Na ntangu yina, Ornani balukaka mpi monaka wanzio, ebuna bana na yandi iya yina vandaka ti yandi bumbanaka. Ornani vandaka kututa ble sambu na kukatula yo bampusu.
21 Ntangu Davidi kwisaka kisika yandi vandaka, Ornani talaka mpi monaka Davidi, ebuna na mbala mosi yandi katukaka na kisika yina ya bo ke tutaka bambuma sambu na kukatula yo bampusu mpi yandi fukamaka na ntwala ya Davidi luse na ntoto.
22 Davidi tubilaka Ornani nde: “Tekila* mono kisika yai ya bo ke tutaka bambuma sambu na kukatula yo bampusu, sambu mono tungila Yehowa mesa-kimenga na kisika yai. Tekila mono yo na ntalu ya mvimba, sambu mpasi yina me bwila bantu kumana.”+
23 Kansi Ornani tubilaka Davidi nde: “Baka yo, mpi bika nde mfumu na mono ntotila kusala mambu yina ke monana mbote na meso na yandi.* Tala, mono ke pesa bangombe sambu na makabu ya kuyoka mpi kima ya bo ke tutaka bambuma sambu na kukatula yo bampusu+ sambu na kusadila yo bonso bankuni mpi ble bonso dikabu ya mbuma. Mono ke pesa nge bima yai yonso.”
24 Kansi, ntotila Davidi tubilaka Ornani nde: “Ve, mono fwete sumba yo na ntalu ya kukuka, sambu mono fwete baka ve kima yina kele ya nge mpi kupesa yo na Yehowa to kupesa bimenga ya kuyoka yina mono me futa kima ve.”+
25 Yo yina Davidi pesaka Ornani bashekele* 600 ya wolo yina bo tesaka sambu na kisika yina.
26 Ebuna Davidi tungilaka Yehowa mesa-kimenga+ pana mpi pesaka bimenga ya kuyoka ti bimenga ya kinduku, mpi yandi bingaka Yehowa, yina na ntangu yai pesaka yandi mvutu na tiya+ yina katukaka na zulu mpi kwisaka na zulu ya mesa-kimenga ya dikabu ya kuyoka.
27 Ebuna Yehowa songaka wanzio+ na kuvutula mbele na yandi ya bitumba na poshi na yo.
28 Na ntangu yina, ntangu Davidi monaka nde Yehowa me pesa yandi mvutu na kisika ya Ornani, muntu ya Yebusi, ya bo ke tutaka bambuma sambu na kukatula yo bampusu, yandi landaka kupesa bimenga kuna.
29 Kansi, na ntangu yina, nzo-tenta ya Yehowa yina Moize salaka na ntoto-makanga mpi mesa-kimenga ya dikabu ya kuyoka vandaka na kisika ya kunanguka na Gibeoni.+
30 Kansi Davidi kukaka ve kukwenda na ntwala na yo sambu na kuyula Nzambi, sambu yandi vandaka kuwa boma ya ngolo sambu na mbele ya bitumba ya wanzio ya Yehowa.
Banoti na nsi ya lutiti
^ To mbala ya nkaka, “mbeni.”
^ Na kisina, “Pesa.”
^ Na kisina, “yina kele mbote na meso na yandi.”
^ Shekele mosi kele bagrame 11,4. Tala Bangindu ya Ngika B14.
