1 Bansangu 22:1-19
22 Ebuna Davidi tubaka nde: “Yai nzo ya Yehowa Nzambi ya kieleka, mpi yai mesa-kimenga ya dikabu ya kuyoka sambu na Izraele.”+
2 Davidi pesaka bantuma nde bo vukisa banzenza+ yonso yina vandaka na ntoto ya Izraele, mpi yandi pesaka bo kisalu ya kuzenga matadi mpi ya kuyidika matadi sambu na kutunga nzo ya Nzambi ya kieleka.+
3 Davidi yidikaka mpi bibende mingi kibeni sambu na minsonso ya mabaya ya bakielo mpi sambu na bima ya kukangila, mpi kwivre mingi kibeni yo yina mpila ya kutesa yo vandaka ve;+
4 yandi yidikaka mpi banti ya sedre+ yina ntalu na yo me zabana ve, sambu bantu ya Sidoni+ ti bantu ya Tire+ natilaka Davidi banti ya sedre mingi kibeni.
5 Ebuna Davidi tubaka nde: “Mwana na mono Salomo kele leke mpi yandi me zaba mambu mingi ve,*+ mpi nzo yina yo ke lomba nde bo tungila Yehowa fwete vanda kitoko mingi kibeni,+ sambu lukumu mpi kitoko+ na yo ta zabana na bansi yonso.+ Yo yina, mono ta yidikila yandi bima.” Ebuna Davidi yidikaka bima mingi kibeni na ntwala ya lufwa na yandi.
6 Diaka, yandi bingaka mwana na yandi Salomo mpi songaka yandi na kutungila Yehowa Nzambi ya Izraele nzo.
7 Davidi songaka mwana na yandi Salomo nde: “Sambu na mono, nzala ya ntima na mono vandaka ya kutunga nzo sambu na zina ya Yehowa Nzambi na mono.+
8 Kansi ndinga ya Yehowa kwisilaka mono nde, ‘Nge me tiamunaka menga mingi, mpi nge me nwanaka bitumba ya nene. Nge ta tunga ve nzo sambu na zina na mono,+ sambu nge me tiamunaka menga mingi na ntoto na ntwala na mono.
9 Tala! Nge ta buta mwana+ mosi yina ta vanda muntu ya ngemba,* mpi mono ta pesa yandi ngemba na mutindu mono ta gulusa yandi na maboko ya bambeni na yandi yonso yina kele na nziunga na yandi,+ sambu zina na yandi ta vanda Salomo*+ mpi mono ta pesa Izraele ngemba mpi kupema na bilumbu na yandi.+
10 Yandi muntu ta tunga nzo sambu na zina na mono.+ Yandi ta kuma mwana na mono, mpi mono ta vanda tata na yandi.+ Mono ta tedimisa ngolo kiti ya kimfumu na yandi na Izraele kimakulu.’+
11 “Ntangu yai, mwana na mono, bika Yehowa kuvanda ti nge, mpi bika nge nunga mpi nge tunga nzo ya Yehowa Nzambi na nge, kaka mutindu yandi tubaka sambu na nge.+
12 Kansi bika nde Yehowa kupesa nge ngangu mpi mayele ya kubakisa mambu+ ntangu yandi ke pesa nge kiyeka na Izraele, sambu nge zitisa nsiku ya Yehowa Nzambi na nge.+
13 Ebuna nge ta nunga kana nge zitisa mbote-mbote bansiku+ mpi balusambisu yina Yehowa songaka Moize na kupesa Izraele.+ Vanda kikesa mpi ngolo. Kuwa boma ve mpi kutekita ve.+
14 Tala, mono me mona mpasi na kuyidika bima yai sambu na nzo ya Yehowa: batalanta* 100 000 ya wolo mpi batalanta 1 000 000 ya arza, mpi kwivre ti bibende+ mingi kibeni yo yina mpila ya kutesa yo kele ve; mpi mono me yidika banti ti matadi,+ kansi nge ta yika ya nkaka.
15 Nge kele ti bantu mingi ya kisalu, bantu yina ke zengaka matadi, bantu yina ke salaka kisalu ya matadi,+ bantu yina ke salaka kisalu ya mabaya, mpi bantu ya mitindu yonso ya me zaba kisalu mbote.+
16 Wolo, arza, kwivre, mpi bibende, mpila ya kutesa yo kele ve.+ Telama mpi yantika kisalu, mpi bika nde Yehowa kuvanda ti nge.”+
17 Na nima Davidi songaka bamfumu yonso ya Izraele na kusadisa mwana na yandi Salomo:
18 “Keti Yehowa Nzambi na beno kele ve ti beno, mpi keti yandi me pesa beno ve ngemba na bandambu yonso? Sambu yandi pesaka bantu ya insi yai na maboko na mono, mpi yo kele na nsi ya kiyeka ya Yehowa mpi ya bantu na yandi.
19 Ntangu yai, beno tula ntima na beno yonso mpi moyo* na beno yonso na kusosa Yehowa Nzambi na beno,+ mpi beno yantika kutunga kisika ya santu ya Yehowa Nzambi ya kieleka,+ sambu na kunata sanduku ya kuwakana ya Yehowa mpi bisadilu ya santu ya Nzambi ya kieleka+ na nzo yina bo me tungaka sambu na zina ya Yehowa.”+
Banoti na nsi ya lutiti
^ To “yandi kele ngolo ve.”
^ Na kisina, “ya kupema.”
^ Yo me katuka na ngogo mosi ya Kiebreo yina ke tendula “Ngemba.”
^ Talanta mosi kele bakilo 34,2. Tala Bangindu ya Ngika B14.
^ Tala Bantendula ya Bangogo.
