1 Bansangu 28:1-21
28 Ebuna Davidi vukisaka bamfumu yonso ya Izraele na Yeruzalemi: bamfumu ya makanda, bamfumu ya bimvuka+ yina vandaka kusadila ntotila, bamfumu ya mafunda ti bamfumu ya bankama,+ bamfumu ya bima yonso ti ya bitwisi ya ntotila+ mpi ya bana na yandi,+ kumosi ti bakapita ya nzo ya ntotila mpi babakala yonso ya ngolo mpi ya me fwana.+
2 Na nima ntotila Davidi telamaka mpi tubaka nde:
“Bampangi na mono mpi bantu na mono, beno wa mono. Nzala ya ntima na mono vandaka ya kutunga nzo sambu yo vanda kisika ya kupema ya sanduku ya kuwakana ya Yehowa mpi kazune ya Nzambi na beto,+ mpi mono yidikaka bima sambu na kutunga yo.+
3 Kansi Nzambi ya kieleka songaka mono nde, ‘Nge ta tunga ve nzo sambu na zina na mono,+ sambu nge kele muntu ya bitumba, mpi nge me tiamunaka menga.’+
4 Ata mpidina, Yehowa Nzambi ya Izraele solaka mono na nzo ya mvimba ya tata na mono sambu na kukuma ntotila ya Izraele kimakulu,+ sambu yandi solaka Yuda bonso ntwadisi+ mpi na nzo ya Yuda, yandi solaka nzo ya tata na mono;+ na bana ya tata na mono, mono vandaka muntu yina yandi ndimaka, sambu na kutula mono ntotila ya Izraele ya mvimba.+
5 Mpi na bana na mono yonso, sambu Yehowa me pesa mono bana mingi,+ yandi solaka mwana na mono Salomo+ sambu yandi vanda na kiti ya kimfumu ya Yehowa na Izraele.+
6 Yandi tubilaka mono nde, ‘Mwana na nge Salomo muntu ta tunga nzo na mono mpi bibansala na mono, sambu mono me sola yandi bonso mwana na mono mpi mono ta kuma tata na yandi.+
7 Mono ta tedimisa kimfumu na yandi ngolo kimakulu+ kana yandi baka lukanu ya ngolo ya kuzitisa bansiku na mono mpi bankanu na mono,+ mutindu yandi ke sala ntangu yai.’
8 Yo yina mono ke tuba na meso ya Izraele ya mvimba, dibundu ya Yehowa, mpi na makutu ya Nzambi na beto nde: Beno zitisa mbote-mbote bansiku yonso ya Yehowa Nzambi na beno mpi beno sosa yo, sambu beno baka ntoto ya mbote+ mpi beno bikila yo bana na beno bonso dikabu ya kimakulu.
9 Mpi nge Salomo mwana na mono, zaba Nzambi ya tata na nge mpi sadila yandi na ntima ya mvimba*+ mpi na moyo* ya kiese, sambu Yehowa ke talaka bantima yonso,+ mpi yandi ke bakisaka mabanza yonso.+ Kana nge sosa yandi, yandi ta bika nde nge mona yandi,+ kansi kana nge bikisa yandi, yandi ta buya nge kimakulu.+
10 Tala, ntangu yai, sambu Yehowa me sola nge na kutunga nzo yina ta vanda kisika ya santu. Vanda kikesa mpi sala kisalu.”
11 Na nima Davidi pesaka mwana na yandi Salomo pula+ yina vandaka kumonisa mutindu ya kutunga kisika ya kukotila+ mpi banzo na yo ya nkaka, basuku na yo ya kubumbila bima, basuku na yo ya zulu, basuku na yo ya kati, mpi nzo ya mufiniku ya kisika ya kuwakanisa bantu ti Nzambi.*+
12 Yandi pesaka Salomo pula ya bo pesaka yandi na nzila ya mpeve mpi yina vandaka kumonisa mutindu ya kutunga bima yonso sambu na bibansala+ ya nzo ya Yehowa, sambu na basuku yonso ya kudila madia yina vandaka na nziunga na yo, sambu na bisika ya kubumba bimvwama ya nzo ya Nzambi ya kieleka, mpi sambu na bisika ya kubumba bimvwama ya bima yina bo kumisaka santu;*+
13 sambu na bimvuka ya banganga-nzambi+ mpi ya Balevi, sambu na bisalu yonso ya nzo ya Yehowa, mpi sambu na bisadilu yonso ya kisalu ya nzo ya Yehowa;
14 sambu na kilo ya wolo, wolo sambu na bisadilu yonso ya bisalu ya mutindu na mutindu, kilo ya bisadilu yonso ya arza, mpi sambu na bisadilu yonso ya bisalu ya mutindu na mutindu;
15 kilo ya bima ya wolo ya kutudila minda mpi ya minda na yo ya wolo,+ kilo ya bima ya kutudila minda ya mitindu na mitindu mpi ya minda na yo, mpi kilo ya bima ya arza ya kutudila minda, sambu na konso kima ya kutudila minda mpi minda na yo na kutadila kisalu na yo;
16 mpi kilo ya wolo sambu na bamesa ya mampa ya kutetika,*+ sambu na konso mesa, mpi arza sambu na bamesa ya arza,
17 sambu na bansomo, babolo, mabungu ya wolo ya kukonda kuvukisa ti kima ya nkaka, mpi kilo ya babolo ya fioti ya wolo,+ sambu na konso bolo ya fioti, mpi kilo ya babolo ya fioti ya arza, sambu na konso bolo ya fioti.
18 Yandi pesaka mpi kilo ya wolo ya bunkete sambu na mesa-kimenga+ ya ndumbu mpi sambu na kifwanisu ya pusu-pusu,+ disongidila basherube+ ya wolo yina ke tandula mapapu na yo mpi ke fika sanduku ya kuwakana ya Yehowa.
19 Davidi tubaka nde: “Diboko ya Yehowa vandaka na zulu na mono, mpi yandi pesaka mono mayele ya kubakisa mambu mbote-mbote sambu na kusonika mambu yonso ya fioti-fioti ya pula+ yina ke monisa mutindu ya kutunga nzo.”+
20 Ebuna Davidi tubilaka mwana na yandi Salomo nde: “Vanda kikesa mpi ngolo, mpi sala kisalu. Kuwa boma ve mpi kutekita ve, sambu Yehowa Nzambi, Nzambi na mono, kele ti nge.+ Yandi ta yambula nge ve mpi ta bikisa nge ve,+ kansi yandi ta vanda ti nge tii kuna kisalu yonso ya nzo ya Yehowa ta mana.
21 Mpi kele ti bimvuka ya banganga-nzambi+ mpi ya Balevi+ sambu na kisalu yonso ya nzo ya Nzambi ya kieleka. Nge kele ti bantu ya kisalu ya kele na luzolo mpi ya me zaba kisalu mbote-mbote sambu na kusala bisalu ya mutindu na mutindu,+ mpi bamfumu+ ti bantu yonso yina ta sala mambu yonso ya nge ta songa bo.”
Banoti na nsi ya lutiti
^ Tala Bantendula ya Bangogo.
^ To “ya kudipesa ya mvimba.”
^ To “nzo ya kufika masumu.”
^ To “bima yina bo me pesaka na Nzambi.”
^ Disongidila, mampa ya kumonisa.
