1 Samuele 4:1-22
4 Ebuna Samuele landaka kutubila Izraele ya mvimba.
Na nima Izraele basikaka sambu na kunwana ti bantu ya Filistia; bo salaka camp na bo pene-pene ya Ebenezere, mpi bantu ya Filistia salaka camp na bo na Afeki.
2 Bantu ya Filistia yilamaka sambu na kunwana bitumba ti Izraele, kansi bitumba yina balukaka mbi mpi bantu ya Filistia bedisaka bantu ya Izraele, bo fwaka bantu kiteso ya 4 000 na ndonga ya bitumba ya Izraele na nseke.
3 Ntangu basoda vutukaka na camp, bankuluntu ya Izraele tubaka nde: “Sambu na nki Yehowa me bika nde bantu ya Filistia kubedisa beto* bubu yai?+ Bika beto baka sanduku ya kuwakana ya Yehowa na Shilo,+ sambu yo vanda ti beto mpi yo gulusa beto na maboko ya bambeni na beto.”
4 Yo yina bo tindaka bantu na Shilo, mpi kuna bo bakaka sanduku ya kuwakana ya Yehowa ya makesa, muntu yina me vanda na zulu* ya basherube.+ Bana zole ya Eli, Hofni ti Fineasi,+ vandaka mpi pana ti sanduku ya kuwakana ya Nzambi ya kieleka.
5 Ntangu sanduku ya kuwakana ya Yehowa kumaka na camp, bantu yonso ya Izraele tulaka makelele ya ngolo, ebuna ntoto nikanaka.
6 Ntangu bantu ya Filistia waka makelele yina, bo tubaka nde: “Sambu na nki makelele ya ngolo ya mutindu yai kele na camp ya Baebreo?” Nsuka-nsuka, bo zabisaka bo nde Sanduku ya Yehowa me kota na camp.
7 Boma simbaka bantu ya Filistia, sambu bo tubaka nde: “Nzambi me kota na camp!”+ Ebuna bo tubaka nde: “Mawa kibeni sambu na beto, sambu diambu ya mutindu yai me salamaka ntete ve!
8 Mawa kibeni sambu na beto! Nani ta gulusa beto na maboko ya Nzambi yai ya nene? Yandi kele Nzambi yina bulaka Ezipte, na mutindu yandi fwaka bantu mingi na bampasi ya mitindu yonso na ntoto-makanga.+
9 Beno bantu ya Filistia, beno vanda kikesa mpi beno sala mambu bonso babakala, sambu beno sadila ve Baebreo mutindu bo sadilaka beno.+ Beno sala mambu bonso babakala mpi beno nwana!”
10 Bantu ya Filistia nwanaka mpi bo bedisaka Izraele,+ ebuna konso muntu tinaka na tenta na yandi. Bo fwaka bantu mingi kibeni; basoda 30 000 ya Izraele yina ke tambulaka na makulu fwaka.
11 Diaka, bo botulaka Sanduku ya Nzambi, mpi bana zole ya Eli, Hofni ti Fineasi, fwaka.+
12 Muntu mosi ya Benyamini bakaka ntinu katuka na ndonga ya bitumba mpi kumaka na Shilo na kilumbu yina; yandi vandaka ti bilele ya kupasuka-pasuka mpi ti ntoto na ntu.+
13 Ntangu yandi kumaka, Eli vandaka ya kuvanda na kiti pene-pene ya nzila, yandi ke tala, sambu ntima na yandi vandaka kutekita sambu na Sanduku ya Nzambi ya kieleka.+ Muntu yina kotaka na mbanza sambu na kupesa nsangu, mpi mbanza ya mvimba yantikaka kutula milolo.
14 Ntangu Eli waka makelele ya milolo yina, yandi yulaka nde: “Makelele ya milolo yai ke tendula nki?” Muntu yina mosi kwisaka nswalu mpi pesaka Eli nsangu yina.
15 (Na ntangu yina Eli vandaka ti bamvula 98; meso na yandi vandaka kutala kaka na ntwala, mpi yandi vandaka kumona ve.)+
16 Ebuna muntu yina tubilaka Eli nde: “Mono kele muntu yina me katuka na ndonga ya bitumba! Mono me tina ndonga ya bitumba kaka bubu yai.” Ebuna Eli yulaka yandi nde: “Mwana na mono, inki me bwa?”
17 Kinati-nsangu yina tubaka nde: “Izraele me tina na ntwala ya bantu ya Filistia, mpi bo me fwa bantu mingi kibeni;+ diaka bana na nge zole, Hofni ti Fineasi, me fwa,+ mpi bo me botula+ Sanduku ya Nzambi ya kieleka.”
18 Ntangu yandi tangaka zina ya Sanduku ya Nzambi ya kieleka, Eli bwaka kinima-nima na kiti yina yandi vandilaka pene-pene ya kielo, ebuna nkingu na yandi bukanaka mpi yandi fwaka, sambu yandi vandaka mununu mpi kizitu mingi. Yandi sambisaka Izraele bamvula 40.
19 Bokilo na yandi, nkento ya Fineasi, vandaka na divumu mpi yandi vandaka pene-pene ya kubuta. Ntangu yandi waka nsangu nde bo me botula Sanduku ya Nzambi ya kieleka mpi nde bokilo na yandi ti bakala na yandi me fwa, yandi fumbamaka mpi misongo simbaka yandi na kintulumukina ebuna yandi butaka.
20 Ntangu yandi zolaka kufwa, bankento yina telamaka pene-pene na yandi tubaka nde: “Kuwa boma ve, sambu nge me buta mwana-bakala.” Yandi vutulaka kima ve mpi yandi tudilaka yo ve dikebi.*
21 Kansi yandi pesaka mwana yina zina Ikabodi*+ mpi tubaka nde: “Nkembo me katuka na Izraele mpi me kwenda na insi ya nkaka.”+ Yandi vandaka kutubila mutindu bo botulaka Sanduku ya Nzambi ya kieleka mpi mambu yina kuminaka bokilo na yandi ya bakala mpi bakala na yandi.+
22 Yandi tubaka nde: “Nkembo me katuka na Izraele mpi me kwenda na insi ya nkaka, sambu bo me botula+ Sanduku ya Nzambi ya kieleka.”
Banoti na nsi ya lutiti
^ Na kisina, “Sambu na nki Yehowa me bedisa beto na ntwala ya bantu ya Filistia?”
^ To mbala ya nkaka, “na kati-kati.”
^ To “yandi tulaka ve ntima na yandi na mambu yina.”
^ Yo ke tendula “Nkembo Kele na Wapi?”
