2 Bansangu 10:1-19
-
Izraele me kolamina Rehoboami (1-19)
10 Rehoboami kwendaka na Shekemi,+ sambu Izraele ya mvimba kwisaka kuna sambu na kukumisa yandi ntotila.+
2 Ntangu Yeroboami+ mwana ya Nebati waka mambu yina (yandi vandaka ntete na Ezipte sambu yandi tinaka ntotila Salomo),+ Yeroboami katukaka na Ezipte mpi kwisaka kuvutuka.
3 Ebuna bo tindaka bantu sambu bo kwenda kubinga yandi, mpi Yeroboami ti dibundu ya mvimba ya Izraele kwisaka na Rehoboami mpi tubaka nde:
4 Tata na nge kumisaka vangu na beto kizitu.+ Kansi kana nge kumisa pete kisalu ya ngolo ya tata na nge mpi nge fiotuna kizitu ya vangu* yina yandi tulaka na zulu na beto, beto ta sadila nge.”
5 Ebuna yandi tubilaka bo nde: “Beno vutukila mono na nima ya bilumbu tatu.” Yo yina bantu kwendaka.+
6 Na nima, ntotila Rehoboami yulaka bambuta* yina sadilaka tata na yandi Salomo ntangu yandi vandaka na luzingu, nde: “Inki ndongisila beno ke pesa mono sambu mono pesa bantu yai mvutu?”
7 Bo vutudilaka yandi nde: “Kana nge vanda mbote ti bantu yai, nge sepedisa bo, mpi nge pesa bo mvutu ya mbote, bo ta vandaka ntangu yonso bansadi na nge.”
8 Kansi, yandi buyaka ndongisila yina bambuta* pesaka yandi, mpi yandi yulaka baleke yina yelaka ti yandi mpi yina vandaka ntangu yai bansadi na yandi.+
9 Yandi yulaka bo nde: “Inki ndongisila beno ke pesa na mvutu yina beto fwete pesa bantu yina tubilaka mono nde, ‘Kumisa pete vangu yina tata na nge tulaka na zulu na beto’?”
10 Baleke yina yelaka ti yandi tubilaka yandi nde: “Yai mambu ya nge fwete tubila bantu yina tubilaka nge nde, ‘Tata na nge kumisaka vangu na beto kizitu, kansi nge fwete kumisila beto yo pete’; nge fwete songa bo nde, ‘Musapi na mono ya fioti ta vanda nene kuluta luketo ya tata na mono.
11 Tata na mono tulaka vangu ya kizitu na zulu na beno, kansi mono ta yika na vangu na beno. Tata na mono pesaka beno ndola ti bafimbu, kansi mono ta pesa beno ndola ti bafimbu ya bansende.’”
12 Yeroboami ti bantu yonso kwisaka na Rehoboami na kilumbu ya tatu, kaka mutindu ntotila tubaka: “Beno vutukila mono na kilumbu ya tatu.”+
13 Kansi ntotila pesaka bo mvutu na makasi. Na mutindu yina ntotila Rehoboami buyaka ndongisila ya bambuta.*
14 Yandi tubilaka bo na kulanda ndongisila yina baleke pesaka yandi nde: “Mono ta kumisa vangu na beno kizitu mingi, mpi mono ta yika yo. Tata na mono pesaka beno ndola ti bafimbu, kansi mono ta sala yo ti bafimbu ya bansende.”
15 Mpidina ntotila wilaka ve bantu, sambu Nzambi ya kieleka+ muntu salaka nde mambu kusalama mutindu yina, sambu na kulungisa mambu yina Yehowa tubilaka Yeroboami mwana ya Nebati na nzila ya Ahiya+ muntu ya Shilo.
16 Sambu ntotila buyaka kuwila bo, bantu yonso ya Izraele vutudilaka ntotila nde: “Inki dikabu beto kele na yo na Davidi? Beto kele ve ti dikabu na mwana ya Yese. Konso muntu kukwenda na banzambi na yandi, O Izraele! Ntangu yai tala nzo na nge mosi, O Davidi.”+ Ebuna bantu yonso ya Izraele vutukaka na banzo* na bo.+
17 Kansi Rehoboami landaka kuyala bantu ya Izraele yina vandaka kuzinga na bambanza ya Yuda.+
18 Na nima ntotila Rehoboami tindaka Adorami,+ yina vandaka ti kiyeka ya kutala bantu yina bo bakaka na kusala bisalu ya ngolo, kansi bantu ya Izraele fwaka yandi na matadi. Ntotila Rehoboami mataka nswalu na pusu-pusu na yandi sambu na kutina na Yeruzalemi.+
19 Mpi bantu ya Izraele me kolaminaka nzo ya Davidi tii bubu yai.
Banoti na nsi ya lutiti
^ To “vangu ya nku.”
^ To “bankuluntu.”
^ To “bankuluntu.”
^ To “bankuluntu.”
^ Na kisina, “batenta.”
