2 Bansangu 12:1-16
12 Ntangu kimfumu ya Rehoboami kumaka ngolo+ mpi yandi kumaka ngolo, yandi yambulaka Nsiku ya Yehowa,+ Izraele ya mvimba mpi salaka bonso yandi.
2 Na mvula ya tanu ya ntotila Rehoboami, Shishaki+ ntotila ya Ezipte kwisaka kunwanisa Yeruzalemi, sambu bo sadilaka Yehowa mambu kukonda kwikama.
3 Yandi vandaka ti bapusu-pusu 1 200, bantu 60 000 yina ke tambusaka bampunda, mpi basoda mingi kibeni yina katukaka ti yandi na Ezipte—bantu ya Libia, bantu ya Suki, mpi bantu ya Etiopia.+
4 Yandi botulaka bambanza ya ngolo ya Yuda mpi nsuka-nsuka yandi kumaka na Yeruzalemi.
5 Mbikudi Shemaya+ kwisaka kukutana ti Rehoboami mpi bamfumu ya Yuda yina vukanaka na Yeruzalemi sambu na Shishaki, mpi yandi tubilaka bo nde: “Yehowa me tuba nde, ‘Beno me yambula mono, yo yina mono mpi me yambula beno+ na maboko ya Shishaki.’”
6 Ebuna bamfumu ya Izraele ti ntotila kudikulumusaka+ mpi tubaka nde: “Yehowa kele muntu ya lunungu.”
7 Ntangu Yehowa monaka nde bo me kudikulumusa, ndinga ya Yehowa kwisilaka Shemaya nde: “Bo me kudikulumusa. Mono ta fwa bo ve,+ mpi na nima ya ntangu fioti mono ta gulusa bo. Mono ta monisa ve makasi na mono na Yeruzalemi na nzila ya Shishaki.
8 Kansi bo ta kuma bansadi na yandi, mpidina bo ta zaba luswaswanu yina kele na kati ya kusadila mono mpi kusadila bantotila* ya bansi ya nkaka.”
9 Yo yina, Shishaki ntotila ya Ezipte kwisaka kunwanisa Yeruzalemi. Yandi bakaka bimvwama ya nzo ya Yehowa+ mpi bimvwama ya nzo ya ntotila. Yandi bakaka bima yonso, ti bitaninu ya wolo yina Salomo salaka.+
10 Yo yina ntotila Rehoboami salaka bitaninu ya kwivre sambu yo yinga yo, mpi yandi pesaka yo na bamfumu ya bankengidi,* yina vandaka kukengila munoko ya nzo ya ntotila.
11 Konso ntangu yina ntotila vandaka kukwisa na nzo ya Yehowa, bankengidi vandaka kukwisa mpi kunata yo, mpi na nima bo vandaka kuvutula yo na suku ya bankengidi.
12 Sambu ntotila kudikulumusaka, Yehowa wilaka yandi diaka ve makasi,+ mpi yandi fwaka bo ve kimakulu.+ Diaka, yandi monaka mwa mambu ya mbote na Yuda.+
13 Ntotila Rehoboami kumisaka kimfumu na yandi ngolo na Yeruzalemi mpi yandi landaka kuyala; Rehoboami vandaka ti bamvula 41 ntangu yandi kumaka ntotila, mpi yandi yalaka bamvula 17 na Yeruzalemi, mbanza yina Yehowa me solaka na kati ya makanda yonso ya Izraele bonso kisika ya kutula zina na yandi. Zina ya mama ya ntotila Naama, muntu ya Amoni.+
14 Kansi yandi salaka mambu ya mbi, sambu yandi bakaka ve lukanu na ntima na yandi ya kusosa Yehowa.+
15 Sambu na disolo ya luzingu ya Rehoboami, katuka na luyantiku tii na nsuka, keti bo me sonikaka yo ve na masonama ya mbikudi Shemaya+ mpi ya Ido+ muntu ya ke monaka bambona-meso, yina bo me sonikaka na kulanda bandonga ya ba-nkaka? Mpi bitumba vandaka ntangu yonso na kati ya Rehoboami mpi Yeroboami.+
16 Ebuna Rehoboami lalaka sambu na kupema ti ba-nkaka na yandi mpi bo zikaka yandi na Mbanza ya Davidi;+ mwana na yandi Abiya+ kumaka ntotila na kisika na yandi.
