2 Bansangu 15:1-19
-
Mambu yina Aza yidikaka (1-19)
15 Ebuna mpeve ya Nzambi kwisilaka Azaria mwana ya Odedi.
2 Yo yina yandi kwendaka kukutana ti Aza mpi tubilaka yandi nde: “Beno wa mono, O Aza mpi bantu yonso ya Yuda ti ya Benyamini! Yehowa kele ti beno konso ntangu yina beno kele ti yandi;+ mpi kana beno sosa yandi, yandi ta bika nde beno mona yandi,+ kansi kana beno yambula yandi, yandi ta yambula beno.+
3 Ntangu* mingi Izraele vandaka kukonda Nzambi ya kieleka, kukonda nganga-nzambi yina ke longa, mpi kukonda nsiku.+
4 Kansi ntangu bo vandaka na mpasi, bo vutukilaka Yehowa Nzambi ya Izraele mpi bo sosaka yandi, ebuna yandi bikaka nde bo mona yandi.+
5 Na bantangu yina muntu mosi ve lendaka kusala nzietelo na lutaninu,* sambu mavwanga vandaka mingi na kati ya bantu yonso ya bansi yina.
6 Dikanda mosi vandaka kufwa dikanda ya nkaka, mpi mbanza mosi vandaka kufwa mbanza ya nkaka, sambu Nzambi bikaka bo kisaka-saka na bampasi ya mitindu yonso.+
7 Kansi beno, beno vanda kikesa mpi beno lemba ve nitu,*+ sambu bo ta pesa beno matabisi sambu na kisalu na beno.”
8 Ntangu Aza waka mambu yai mpi mbikudulu ya mbikudi Odedi, yandi bakaka kikesa mpi katulaka biteki ya nzanzi na insi ya mvimba ya Yuda+ ti ya Benyamini mpi na bambanza yina yandi botulaka na ntoto ya bangumba ya Efrayimi, ebuna yandi vutulaka mesa-kimenga ya Yehowa yina vandaka na ntwala ya kisika ya kukotila ya nzo ya Yehowa.+
9 Yandi vukisaka bantu yonso ya Yuda, ya Benyamini, mpi banzenza yina vandaka ti bo na Efrayimi, na Manase, mpi na Simeoni,+ sambu bantu mingi kibeni katukaka na Izraele mpi kwisaka na yandi ntangu bo monaka nde Yehowa Nzambi na yandi vandaka ti yandi.
10 Ebuna bo vukanaka na Yeruzalemi na ngonda ya tatu ya mvula ya 15 ya luyalu ya Aza.
11 Na kilumbu yina, bo pesaka Yehowa bimenga na bima ya bo botulaka yina bo nataka, bangombe 700 mpi mameme 7 000.
12 Diaka, bo salaka kuwakana sambu na kusosa Yehowa Nzambi ya ba-nkaka na bo na ntima na bo ya mvimba mpi na moyo na bo ya mvimba.*+
13 Konso muntu yina ta sosa ve Yehowa Nzambi ya Izraele, bo ta fwa yandi, yo vanda muntu ya kukonda mfunu to muntu ya mfunu, bakala to nkento.+
14 Yo yina bo diaka ndefi na Yehowa na ndinga ya ngolo, ti milolo ya kiese, ti bampungi, mpi bibongo.
15 Mpi bantu yonso ya Yuda waka kiese sambu na ndefi yina, sambu bo diaka ndefi na ntima na bo ya mvimba mpi bo sosaka yandi ti nzala ya ngolo, ebuna yandi bikaka nde bo mona yandi,+ mpi Yehowa landaka kupesa bo ngemba na bandambu yonso.+
16 Yandi katulaka nkutu nkaka na yandi Maaka+ kiyeka na yandi ya mama ya ntotila,* sambu yandi salaka kiteki ya nsoni sambu na lusambu ya nti ya santu.*+ Aza bwisaka kiteki na yandi ya nsoni, kumisaka yo mfututu, mpi yokaka yo na Muwanda ya Kidroni.+
17 Kansi bo katulaka ve bisika ya kunanguka+ na Izraele.+ Ata mpidina, ntima ya Aza vandaka ya mvimba* luzingu*+ na yandi ya mvimba.
18 Bima yina yandi mpi tata na yandi kumisaka santu, yandi kotisaka yo na nzo ya Nzambi ya kieleka: arza, wolo, mpi bisadilu ya mutindu na mutindu.+
19 Bitumba vandaka ve tii na mvula ya 35 ya luyalu ya Aza.+
Banoti na nsi ya lutiti
^ Na kisina, “Bilumbu.”
^ Na kisina, “ngemba vandaka ve sambu na muntu yina ke basika to muntu yina ke kota.”
^ Na kisina, “beno bika ve nde maboko na beno kukulumuka.”
^ Tala Bantendula ya Bangogo.
^ To “ya nkento ya lukumu.”
^ Tala Bantendula ya Bangogo.
^ To “ya kudipesa ya mvimba.”
^ Na kisina, “bilumbu.”
