2 Bansangu 18:1-34
18 Yehoshafati vandaka ti bimvwama mpi nkembo mingi,+ kansi yandi salaka kuwakana ya makwela ti Ahabi.+
2 Yo yina bamvula fioti na nima, yandi kwendaka kutala Ahabi na Samaria,+ mpi Ahabi tambikilaka yandi ti bantu yina vandaka ti yandi mameme mpi bangombe mingi. Ahabi siamisaka* yandi na kukwenda kunwanisa Ramoti-gileadi.+
3 Na nima Ahabi ntotila ya Izraele tubilaka Yehoshafati ntotila ya Yuda nde: “Keti nge ta kwenda ti mono na Ramoti-gileadi?” Yandi vutudilaka Ahabi nde: “Mono kele mutindu mosi ti nge, bantu na mono kele mutindu mosi ti bantu na nge, mpi beto ta pesa nge maboko na bitumba.”
4 Kansi Yehoshafati tubilaka ntotila ya Izraele nde: “Pardo yula ntete ndinga ya Yehowa.”+
5 Yo yina ntotila ya Izraele vukisaka bambikudi, bantu 400, mpi tubilaka bo nde: “Keti beto fwete kwenda kunwanisa Ramoti-gileadi, to keti mono fwete kwenda ve?” Bo tubaka nde: “Kwenda, mpi Nzambi ya kieleka ta pesa yo na maboko ya ntotila.”
6 Ebuna Yehoshafati tubaka nde: “Keti mbikudi ya Yehowa kele ve awa?+ Beto yula mpi Nzambi na nzila na yandi.”+
7 Ntotila ya Izraele tubilaka Yehoshafati nde: “Kele diaka ti muntu ya nkaka+ yina beto lenda yula Yehowa na nzila na yandi; kansi mono ke mengaka yandi, sambu yandi ke bikulaka ve ata fioti mambu ya mbote sambu na mono, kansi yandi ke bikulaka ntangu yonso mambu ya mbi.+ Yo kele Mikaya mwana ya Yimla.” Kansi Yehoshafati tubaka nde: “Ntotila fwete tuba ve mutindu yina.”
8 Yo yina ntotila ya Izraele bingaka kapita mosi ya nzo na yandi mpi tubaka nde: “Kwisa nswalu ti Mikaya mwana ya Yimla.”+
9 Kansi, ntotila ya Izraele mpi Yehoshafati ntotila ya Yuda vandaka konso muntu na zulu ya kiti na yandi ya kimfumu, bo me lwata bilele ya kimfumu; bo vandaka na kisika ya bo ke tutaka bambuma sambu na kukatula yo bampusu na munoko ya kielo ya Samaria, mpi bambikudi yonso vandaka kubikula na ntwala na bo.
10 Ebuna Sidikiya mwana ya Kenaana salaka bibongo ya bibende mpi tubaka nde: “Yehowa me tuba nde, ‘Nge ta bula* bantu ya Siria ti bibongo yai tii kuna nge ta manisa bo.’”
11 Bambikudi yonso ya nkaka vandaka kubikula mutindu mosi nde: “Kwenda na Ramoti-gileadi mpi nge ta nunga;+ Yehowa ta pesa yo na maboko ya ntotila.”
12 Yo yina, kinati-nsangu yina kwendaka kubinga Mikaya tubilaka yandi nde: “Tala! Bambikudi yonso ke tuba mambu ya mbote sambu na ntotila. Pardo, bika nde mambu ya nge ke tuba kukuma mutindu mosi ti mambu ya bo ke tuba,+ mpi tuba mambu ya mbote.”+
13 Kansi Mikaya tubaka nde: “Ya kieleka mutindu Yehowa kele na luzingu, mono ta tuba konso diambu yina Nzambi na mono ta tuba.”+
14 Ebuna yandi kwisaka kisika ntotila vandaka, mpi ntotila yulaka yandi nde: “Mikaya, keti beto fwete kwenda kunwanisa Ramoti-gileadi, to keti mono fwete kwenda ve?” Na mbala mosi yandi vutulaka nde: “Kwenda mpi nge ta nunga; Nzambi ta pesa bo na maboko na nge.”
15 Ebuna ntotila tubilaka yandi nde: “Mbala ikwa mono fwete lomba nge na kudia ndefi nde nge fwete tubila mono kaka kieleka na zina ya Yehowa?”
16 Ebuna yandi tubaka nde: “Mono ke mona bantu yonso ya Izraele me panzana na bangumba, bonso mameme yina me konda ngungudi.+ Yehowa tubaka nde: ‘Bantu yai kele ve ti mfumu. Bika konso muntu kuvutuka na nzo na yandi na ngemba.’”
17 Ebuna ntotila ya Izraele tubilaka Yehoshafati nde: “Keti mono songaka nge ve nde, ‘Yandi ta bikula ve mambu ya mbote sambu na mono, kaka mambu ya mbi’?”+
18 Ebuna Mikaya tubaka nde: “Yo yina, wa mambu yina Yehowa ke tuba: Mono monaka Yehowa me vanda na kiti na yandi ya kimfumu+ mpi makesa yonso ya zulu+ me telama na diboko na yandi ya kitata mpi na diboko na yandi ya kimama.+
19 Ebuna Yehowa tubaka nde, ‘Nani ta kusa Ahabi ntotila ya Izraele, sambu yandi kwenda na Ramoti-gileadi mpi kufwa kuna?’ Mpeve mosi vandaka kutuba diambu mosi mpi ya nkaka vandaka kutuba diambu ya nkaka.
20 Na nima mpeve*+ mosi kwisaka na ntwala, telamaka na ntwala ya Yehowa, mpi tubaka nde, ‘Mono ta kusa yandi.’ Yehowa yulaka yandi nde, ‘Inki mutindu nge ta sala yo?’
21 Yandi vutulaka nde, ‘Mono ta basika mpi ta kuma mpeve ya ke kusaka na munoko ya bambikudi na yandi yonso.’ Yo yina yandi tubaka nde, ‘Nge ta kusa yandi, mpi nkutu nge ta nunga. Kwenda mpi sala yo.’
22 Ntangu yai Yehowa me tula mpeve ya ke kusaka na munoko ya bambikudi na nge yai,+ kansi Yehowa me tuba nde mpasi ta bwila nge.”
23 Ebuna Sidikiya+ mwana ya Kenaana pusanaka pene-pene, yandi bulaka Mikaya+ na ditama+ mpi tubaka nde: “Na nki nzila mpeve ya Yehowa lutaka na mono sambu yo kwisa kutubila nge?”+
24 Mikaya vutulaka nde: “Tala! Nge ta mona na nki nzila yo tubilaka mono, kilumbu yina nge ta kota na suku ya kati kibeni sambu na kubumbana.”
25 Ebuna ntotila ya Izraele tubaka nde: “Beno baka Mikaya mpi beno pesa yandi na maboko ya Amone mfumu ya mbanza mpi ya Yoashi mwana ya ntotila.
26 Beno songa bo nde, ‘Ntotila me tuba nde: “Beno tula mpangi yai na boloko+ mpi beno pesa yandi ka-ndambu ya dimpa mpi ka-ndambu ya masa tii kuna mono ta vutuka na ngemba.”’”
27 Kansi Mikaya tubaka nde: “Kana nge vutuka na ngemba, tuba nde Yehowa solulaka ve ti mono.”+ Ebuna yandi yikaka nde: “Beno yonso, beno simba diambu yai.”
28 Yo yina, ntotila ya Izraele mpi Yehoshafati ntotila ya Yuda kwendaka na Ramoti-gileadi.+
29 Ebuna ntotila ya Izraele tubilaka Yehoshafati nde: “Mono ta lwata bilele ya nkaka sambu bo zaba mono ve ebuna mono ta kwenda na bitumba, kansi nge fwete lwata bilele na nge ya kimfumu.” Yo yina, ntotila ya Izraele lwataka bilele ya nkaka sambu bo zaba yandi ve mpi bo kotaka na bitumba.
30 Ntotila ya Siria songaka bakomanda ya bapusu-pusu na yandi nde: “Beno nwanisa ve ata muntu mosi, yo vanda muntu ya kukonda mfunu to muntu ya mfunu, kaka ntotila ya Izraele.”
31 Ntangu bakomanda ya bapusu-pusu monaka Yehoshafati, bo kuditubilaka nde: “Yai ntotila ya Izraele.” Yo yina bo balukaka sambu na kunwanisa yandi; ebuna Yehoshafati yantikaka kudila sambu na kulomba lusadisu,+ mpi Yehowa sadisaka yandi, ebuna na mbala mosi Nzambi pusaka bo ntama ti yandi.
32 Ntangu bakomanda ya bapusu-pusu monaka nde yo vandaka ve ntotila ya Izraele, na mbala mosi bo yambulaka kulanda yandi.
33 Kansi muntu mosi bulaka munduki na yandi ya tolo-tolo kaka mpidina, ebuna yandi bulaka ntotila ya Izraele na bisika yina bo me kangisaka kinkutu na yandi ya kibende. Yo yina ntotila tubilaka muntu yina ke tambusaka pusu-pusu na yandi nde: “Baluka mpi basisa mono na bitumba,* sambu mono me lwala ngolo.”+
34 Bitumba kumaka ngolo kilumbu yina ya mvimba, mpi yo lombaka nde ntotila ya Izraele kubikala kaka na pusu-pusu na yandi bo me simba yandi, yandi ke talana ti bantu ya Siria tii na nkokila; mpi yandi fwaka na ntangu ya kudinda ya ntangu.+
