2 Bansangu 2:1-18
-
Salomon me kudibongisa sambu na kutunga tempelo (1-18)
2 Ebuna Salomo songaka bantu na kutunga nzo sambu na zina ya Yehowa+ mpi nzo* sambu na kimfumu na yandi.+
2 Salomo solaka bantu 70 000 sambu na kusala bisalu ya ngolo,* bantu 80 000 sambu na kuzenga matadi na bangumba,+ mpi bantu 3 600 na kuvanda bankengi na bo.+
3 Diaka, Salomo tindilaka Hirami+ ntotila ya Tire ndinga nde: “Sadila mono mutindu nge sadilaka tata na mono Davidi ntangu nge tindilaka yandi banti ya sedre sambu na kutunga nzo ya kuzingila.*+
4 Mono ke tunga nzo sambu na zina ya Yehowa Nzambi na mono, sambu mono santisa yo sambu na yandi, sambu na kuyoka ndumbu ya nsudi ya kitoko+ na ntwala na yandi, mpi sambu na mampa ya kutetika*+ ya konso ntangu mpi makabu ya kuyoka, na suka mpi na nkokila,+ na Bisabatu,+ na bangonda ya mpa,+ mpi na bansungi ya bankinsi ya Yehowa Nzambi na beto. Yai diambu ya mvula na mvula ya yandi ke lomba Izraele.+
5 Nzo yina mono ke tunga ta vanda nene, sambu Nzambi na beto kele nene kuluta banzambi yonso ya nkaka.
6 Mpi nani me fwana kusala kisalu ya kutungila yandi nzo? Sambu zulu mpi zulu ya zulu lenda kuka yandi ve,+ yo yina mono kele nani sambu mono tungila yandi nzo? Kima ya mono lenda sala kele kutunga nzo yina ta vanda kisika ya kubasisa midinga ya bimenga na ntwala na yandi.
7 Ntangu yai, tindila mono muntu ya ke salaka bisalu ya maboko yina me zaba mbote kisalu ya wolo, arza, kwivre,+ kibende, lene ya mbwaki-ble, lele ya mbwaki ya ngolo, mpi nsinga ya ble mpi muntu yina me zaba kusala bifwanisu. Yandi ta sala na Yuda mpi na Yeruzalemi ti bantu na mono ya me zaba kusala bisalu ya maboko, bantu yina tata na mono Davidi pesaka.+
8 Tindila mono banti ya sedre, ya yenevriye,+ mpi ya algumi+ katuka na Libani, sambu mono me zaba mbote nde bansadi na nge me zaba mbote-mbote kuzenga banti ya Libani.+ Bansadi na mono ta sala kumosi ti bansadi na nge+
9 sambu na kuyidikila mono mabaya mingi, sambu nzo yina mono ke tunga ta vanda nene kibeni.
10 Tala: Mono ta pesa madia sambu na bansadi na nge,+ bantu ya ke zengaka banti: bakore* ya ble 20 000, bakore ya orze 20 000, ba-bati* ya vinu 20 000, mpi ba-bati ya mafuta 20 000.”
11 Ebuna Hirami ntotila ya Tire tindilaka Salomo nsangu yai ya kusonika: “Sambu Yehowa ke zolaka bantu na yandi, yandi me tula nge ntotila na bo.”
12 Na nima Hirami tubaka nde: “Bika Yehowa Nzambi ya Izraele kubaka lukumu, yandi muntu salaka zulu mpi ntoto, sambu yandi me pesa ntotila Davidi mwana mosi ya mayele,+ yina kele ti ngangu mpi mayele ya kubakisa mambu,+ yina ta tunga nzo sambu na Yehowa mpi nzo sambu na kimfumu na yandi.
13 Ntangu yai mono ke tinda muntu mosi ya me zaba kusala kisalu ya maboko, ya kele ti mayele ya kubakisa mambu, Hirami-abi,+
14 yandi kele mwana ya nkento mosi ya dikanda ya Dani kansi tata na yandi vandaka muntu ya Tire; yandi me zaba mbote-mbote kisalu ya wolo, arza, kwivre, kibende, matadi, mabaya, lene ya mbwaki-ble, nsinga ya ble, bilele ya kitoko, mpi bilele ya mbwaki ya ngolo.+ Yandi lenda sala bifwanisu ya mitindu yonso mpi kusala konso kima yina bo me pesa yandi.+ Yandi ta sala ti bantu na nge ya me zaba kusala bisalu ya maboko ti bantu ya mfumu na mono Davidi tata na nge ya me zaba kusala bisalu ya maboko.
15 Ntangu yai, bika mfumu na mono kutinda ble, orze, mafuta, mpi vinu yina yandi me sila bansadi na yandi.+
16 Ebuna beto ta zenga banti na Libani,+ banti mingi na kiteso yina nge kele na yo mfunu, mpi beto ta natila nge yo na bita ya ke leluka na zulu ya nzadi-mungwa tii na Yope;+ mpi nge ta nata yo na Yeruzalemi.”+
17 Ebuna Salomo tangaka bantu yonso yina vandaka banzenza na insi ya Izraele,+ na nima ya kutanga bantu yina Davidi tata na yandi tangaka,+ mpi bo monaka nde bantu vandaka 153 600.
18 Yo yina yandi tulaka bantu 70 000 sambu na kusala bisalu ya ngolo,* bantu 80 000 sambu na kuzenga matadi+ na bangumba, mpi bantu 3 600 na kuvanda bankengi sambu na kupesa bantu kisalu.+
Banoti na nsi ya lutiti
^ To “nzo ya ntotila.”
^ To “sambu na kunata bizitu.”
^ To “nzo ya ntotila.”
^ Disongidila, mampa ya kumonisa.
^ Kore mosi kele balitre 220. Tala Bangindu ya Ngika B14.
^ Bati mosi kele balitre 22. Tala Bangindu ya Ngika B14.
^ To “sambu na kunata bizitu.”
