2 Bansangu 21:1-20
21 Ebuna Yehoshafati lalaka sambu na kupema ti ba-nkaka na yandi mpi bo zikaka yandi ti ba-nkaka na yandi na Mbanza ya Davidi; ebuna mwana na yandi Yehorami kumaka ntotila na kisika na yandi.+
2 Bampangi na yandi, bana ya Yehoshafati bo yai: Azaria, Yehiele, Zekaria, Azaria, Mikaele, mpi Shefatia; bo yonso vandaka bana ya Yehoshafati ntotila ya Izraele.
3 Tata na bo pesaka bo makabu mingi ya arza mpi ya wolo, ti bima ya mfunu, mpi bambanza ya ngolo na Yuda;+ kansi yandi pesaka kimfumu na Yehorami,+ sambu yandi vandaka mwana ya ntete.
4 Ntangu Yehorami bakaka kimfumu ya tata na yandi, yandi fwaka bampangi na yandi yonso+ ti mbele ya bitumba mpi bamfumu ya nkaka ya Izraele sambu na kukumisa kimfumu na yandi ngolo.
5 Yehorami vandaka ti bamvula 32 ntangu yandi kumaka ntotila, mpi yandi yalaka bamvula nana na Yeruzalemi.+
6 Yandi tambulaka na nzila ya bantotila ya Izraele,+ kaka mutindu bantu ya nzo ya Ahabi salaka, sambu mwana ya Ahabi kumaka nkento na yandi;+ mpi yandi landaka kusala mambu ya mbi na meso ya Yehowa.
7 Kansi Yehowa zolaka ve kufwa nzo ya Davidi sambu na kuwakana yina yandi salaka ti Davidi,+ sambu yandi silaka na kupesa yandi ti bana na yandi mwinda kimakulu.+
8 Na bilumbu na yandi, Edomi kolamaka na Yuda+ mpi kuditudilaka ntotila.+
9 Yo yina Yehorami mpi bakomanda na yandi sabukaka ti bapusu-pusu na yandi yonso, ebuna yandi telamaka na mpimpa mpi bedisaka bantu ya Edomi yina ziungaka yandi ti bakomanda ya bapusu-pusu.
10 Kansi Edomi me landaka kukolamina Yuda tii bubu yai. Libna+ mpi kolaminaka yandi na ntangu yina, sambu yandi yambulaka Yehowa Nzambi ya ba-nkaka na yandi.+
11 Yandi salaka mpi bisika ya kunanguka+ na bangumba ya Yuda sambu na kupusa bantu ya Yeruzalemi na kusala pite ya kimpeve, mpi yandi vidisaka Yuda nzila.
12 Nsuka-nsuka, bo kwisaka kupesa yandi mukanda mosi yina mbikudi Eliya+ sonikaka, nde: “Yehowa Nzambi ya nkaka na nge Davidi me tuba nde, ‘Nge me tambula ve na banzila ya tata na nge Yehoshafati+ to na banzila ya Aza+ ntotila ya Yuda.
13 Kansi nge ke tambula na nzila ya bantotila ya Izraele+ mpi nge ke pusa Yuda ti bantu ya Yeruzalemi na kusala pite ya kimpeve+ bonso pite yina nzo ya Ahabi salaka,+ mpi nge fwaka nkutu bampangi na nge mosi,+ bantu ya nzo ya tata na nge, yina vandaka mbote kuluta nge.
14 Yo yina Yehowa ke pesa mpasi ya nene na bantu na nge, na bana na nge, na bankento na nge, mpi na bima na nge yonso.
15 Nge ta bela bamaladi mingi, mpi maladi ya misopo, tii kuna misopo na nge ta basika sambu na maladi yina, konso kilumbu.’”
16 Ebuna Yehowa pusaka+ bantu ya Filistia*+ mpi Ba-arabi+ yina vandaka kuzinga pene-pene ya bantu ya Etiopia sambu bo nwanisa Yehorami.
17 Yo yina bo kotaka na Yuda, bo kotaka na kingolo-ngolo, mpi bo nataka bima yonso yina vandaka na nzo ya ntotila,+ bana na yandi, mpi bankento na yandi; mwana na yandi mosi mpamba yina bikalaka vandaka Yehoahazi,*+ mwana na yandi ya nsuka.
18 Na nima ya mambu yina yonso, Yehowa tindilaka yandi maladi ya misopo+ yina bo lenda belula ve.
19 Ntangu fioti na nima, ntangu bamvula zole ya mvimba lutaka, misopo na yandi basikaka sambu na maladi yina, mpi yandi fwaka ntangu yandi vandaka kumona mpasi ya ngolo sambu na maladi na yandi; mpi bantu na yandi yokilaka yandi ve bima ya nsudi ya kitoko mutindu bo salaka na ba-nkaka na yandi.+
20 Yandi vandaka na bamvula 32 ntangu yandi kumaka ntotila, mpi yandi yalaka bamvula nana na Yeruzalemi. Muntu mosi ve waka mawa ntangu yandi fwaka. Yo yina bo zikaka yandi na Mbanza ya Davidi,+ kansi na maziamu ya bantotila ve.+
Banoti na nsi ya lutiti
^ Na kisina, “tedimisaka mpeve ya bantu ya Filistia.”
^ Zina na yandi ya nkaka Ahazia.
