2 Bansangu 25:1-28
25 Amasia vandaka ti bamvula 25 ntangu yandi kumaka ntotila, mpi yandi yalaka bamvula 29 na Yeruzalemi. Zina ya mama na yandi Yehoadani muntu ya Yeruzalemi.+
2 Yandi landaka kusala mambu ya mbote na meso ya Yehowa, kansi na ntima ya mvimba ve.
3 Ntangu kimfumu kumaka ngolo na maboko na yandi, yandi fwaka bansadi na yandi yina fwaka tata na yandi ntotila.+
4 Kansi yandi fwaka ve bana na bo, sambu yandi salaka mambu na kuwakana ti mambu yina bo me sonikaka na Nsiku, na mukanda ya Moize, kisika Yehowa pesaka nsiku nde: “Bo fwete fwa ve batata sambu na bana na bo, mpi bo fwete fwa ve bana sambu na batata na bo; kansi bo fwete fwa konso muntu sambu na disumu na yandi mosi.”+
5 Ebuna Amasia vukisaka bantu ya Yuda mpi yandi songaka bo na kutelama na kulanda ndonga ya banzo ya batata na bo, na kutadila bamfumu ya mafunda mpi na kutadila bamfumu ya bankama sambu na Yuda ya mvimba mpi Benyamini.+ Yandi sonikaka bazina na bo yantika na bamvula 20 mata,+ mpi yandi monaka nde ntalu na bo vandaka basoda 300 000 ya me zaba bitumba mbote* sambu na kusala kisalu ya kisoda, bayina me zaba kusadila dikonga mpi kitaninu ya nene.
6 Diaka, yandi bakaka basoda ya ngolo 100 000 na Izraele, mpi yandi futaka batalanta* 100 ya arza sambu na bo.
7 Kansi muntu mosi ya Nzambi ya kieleka kwisaka kutubila yandi nde: “O ntotila, kubika ve nde basoda ya Izraele kukwenda ti nge, sambu Yehowa kele ve ti Izraele,+ yandi kele ve ata ti muntu mosi ya Efrayimi.
8 Kansi kwenda nge mosi, sala, mpi vanda kikesa na bitumba. Kana ve, Nzambi ya kieleka lenda sala nde nge bula sakuba na ntwala ya mbeni, sambu Nzambi kele ti ngolo ya kusadisa+ mpi ya kusala nde muntu kubula sakuba.”
9 Amasia tubilaka muntu ya Nzambi ya kieleka nde: “Ebuna mono ta sala nki sambu na batalanta 100 yina mono pesaka na basoda ya Izraele?” Muntu ya Nzambi ya kieleka vutulaka nde: “Yehowa lenda pesa nge bima mingi kuluta yina.”+
10 Yo yina Amasia vutulaka basoda ya Efrayimi yina kwisaka na yandi, yandi vutulaka bo na kisika na bo. Kansi, bo wilaka Yuda makasi mingi, yo yina bo vutukaka na kisika na bo na makasi yonso.
11 Na nima, Amasia bakaka kikesa mpi nataka basoda na yandi na Muwanda ya Mungwa,+ mpi yandi fwaka bantu ya Seire 10 000.+
12 Bantu ya Yuda kangaka bantu 10 000 ya moyo. Ebuna bo nataka bo na nsongi ya ditadi mpi losaka bo katuka na nsongi ya ditadi yina, ebuna bo yonso panzanaka bitini-bitini.
13 Kansi basoda yina Amasia vutulaka sambu bo kwenda ve ti yandi na bitumba+ vandaka kukota na bambanza ya Yuda, yantika na Samaria+ tii na Bete-oroni;+ bo fwaka bantu 3 000 kuna mpi bo botulaka bima mingi.
14 Kansi, ntangu Amasia vutukaka na nima ya kufwa bantu ya Edomi, yandi nataka banzambi ya bantu ya Seire, mpi yandi tedimisaka yo sambu yo vanda banzambi na yandi,+ ebuna yandi yantikaka kufukama na ntwala na yo mpi kupesa yo midinga ya bimenga.
15 Yo yina, Yehowa wilaka Amasia makasi mingi, mpi yandi tindaka mbikudi mosi yina tubilaka yandi nde: “Sambu na nki nge ke landa banzambi ya bantu yina gulusaka ve bantu na bo na maboko na nge?”+
16 Ntangu yandi vandaka kutubila yandi, ntotila tubaka nde: “Keti beto tulaka nge ndongisi ya ntotila?+ Yambula!+ Sambu na nki bo fwete fwa nge?” Ebuna mbikudi yambulaka, kansi yandi yikaka nde: “Mono me zaba nde Nzambi me baka lukanu ya kufwa nge, sambu nge me sala diambu yai mpi nge me wa ve ndongisila na mono.”+
17 Na nima ya kusolula ti bandongisi na yandi, Amasia ntotila ya Yuda tindaka nsangu na Yehoashi mwana ya Yehoahazi mwana ya Yehu ntotila ya Izraele nde: “Kwisa! Beto nwana bitumba.”*+
18 Yehoashi ntotila ya Izraele tindilaka Amasia ntotila ya Yuda nsangu yai: “Nti ya bansende ya Libani tindilaka nti ya sedre ya Libani nsangu nde, ‘Pesa mwana na nge ya nkento na mwana na mono ya bakala sambu yandi vanda nkento na yandi.’ Kansi, mbisi mosi ya mfinda ya Libani lutaka pene-pene mpi niataka nti yina ya bansende.
19 Nge me tuba nde, ‘Tala! Mono* me fwa Edomi.’+ Yo yina ntima na nge me kuma lulendo, mpi yo ke zola kubaka nkembo. Kansi ntangu yai, bikala na nzo na nge.* Sambu na nki nge ke kudisosila mpasi ti lufwa, mpi kunata Yuda na kufwa ti nge?”
20 Kansi Amasia waka ve,+ sambu diambu yai katukaka na Nzambi ya kieleka sambu na kupesa bo na maboko ya mbeni,+ sambu bo landaka banzambi ya Edomi.+
21 Yo yina Yehoashi ntotila ya Izraele tombukaka, ebuna yandi ti Amasia ntotila ya Yuda nwanaka bitumba na Bete-shemeshi,+ yina kele ya Yuda.
22 Izraele bedisaka Yuda, yo yina konso muntu tinaka na nzo* na yandi.
23 Yehoashi ntotila ya Izraele kangaka Amasia ntotila ya Yuda, mwana ya Yehoashi mwana ya Yehoahazi,* na Bete-shemeshi. Ebuna yandi nataka yandi na Yeruzalemi mpi salaka mpwasa na kibaka ya Yeruzalemi katuka na Kielo ya Efrayimi+ tii na Kielo ya Kinkonko,+ maboko 400.*
24 Yandi bakaka wolo yonso ti arza mpi bima yonso yina vandaka na nzo ya Nzambi ya kieleka na maboko ya Obedi-edomi mpi na bisika ya kubumba bimvwama ya nzo ya ntotila;+ yandi bakaka mpi bantu yina bo kangaka. Na nima, yandi vutukaka na Samaria.
25 Amasia+ mwana ya Yehoashi ntotila ya Yuda zingaka bamvula 15 na nima ya lufwa ya Yehoashi+ mwana ya Yehoahazi ntotila ya Izraele.+
26 Sambu na mambu ya nkaka ya Amasia salaka, katuka na luyantiku tii na nsuka, keti bo me sonikaka yo ve na Mukanda ya Bantotila ya Yuda mpi ya Izraele?
27 Katuka ntangu yina Amasia bikaka kulanda Yehowa, bo sadilaka yandi komplo+ na Yeruzalemi, mpi yandi tinaka na Lakishi, kansi bo tindaka bantu na kulanda yandi na Lakishi mpi bo fwaka yandi kuna.
28 Yo yina bo kwisaka kuvutula yandi na bampunda mpi bo zikaka yandi ti ba-nkaka na yandi na mbanza ya Yuda.
Banoti na nsi ya lutiti
^ Na kisina, “ya bo me sola.”
^ Talanta mosi kele bakilo 34,2. Tala Bangindu ya Ngika B14.
^ To “kutana meso na meso.”
^ Na kisina, “Nge.”
^ To “nzo ya ntotila.”
^ Na kisina, “batenta.”
^ Zina na yandi ya nkaka Ahazia.
^ Kiteso ya bametre 178. Tala Bangindu ya Ngika B14.
