2 Bansangu 27:1-9
-
Yotami, ntotila ya Yuda (1-9)
27 Yotami+ vandaka ti bamvula 25 ntangu yandi kumaka ntotila, mpi yandi yalaka bamvula 16 na Yeruzalemi. Zina ya mama na yandi Yerusha mwana ya Zadoki.+
2 Yandi landaka kusala mambu ya mbote na meso ya Yehowa, kaka mutindu tata na yandi Uziya salaka,+ kansi yandi kotaka ve na ngolo na tempelo ya Yehowa.+ Ata mpidina bantu vandaka kaka kusala mambu yina ke nataka lufwa.
3 Yandi tungaka kielo ya zulu ya nzo ya Yehowa,+ mpi yandi tungaka bima mingi na kibaka ya Ofeli.+
4 Yandi tungaka mpi bambanza+ na ntoto ya bangumba ya Yuda,+ mpi yandi tungaka bisika ya ngolo+ mpi banzo-zulu+ na bamfinda.
5 Yandi nwanaka bitumba ti ntotila ya bantu ya Amoni+ mpi nsuka-nsuka yandi nungaka bo, yo yina bantu ya Amoni pesaka yandi na mvula yina batalanta* 100 ya arza, bakore* ya ble 10 000, mpi bakore ya orze 10 000. Bantu ya Amoni futaka yandi mpi bima yai na mvula ya zole mpi ya tatu.+
6 Yo yina, Yotami landaka kukuma ngolo, sambu yandi yidikaka banzila na yandi na ntwala ya Yehowa Nzambi na yandi.
7 Sambu na mambu ya nkaka ya Yotami salaka, bitumba na yandi yonso mpi mambu na yandi yonso, bo me sonikaka yo na Mukanda ya Bantotila ya Izraele mpi ya Yuda.+
8 Yandi vandaka ti bamvula 25 ntangu yandi kumaka ntotila, mpi yandi yalaka bamvula 16 na Yeruzalemi.+
9 Na nima, Yotami lalaka sambu na kupema ti ba-nkaka na yandi, mpi bo zikaka yandi na Mbanza ya Davidi.+ Ebuna mwana na yandi Ahazi kumaka ntotila na kisika na yandi.+
Banoti na nsi ya lutiti
^ Talanta mosi kele bakilo 34,2. Tala Bangindu ya Ngika B14.
^ Kore mosi kele balitre 220. Tala Bangindu ya Ngika B14.
