2 Bansangu 28:1-27
28 Ahazi+ vandaka ti bamvula 20 ntangu yandi kumaka ntotila, mpi yandi yalaka bamvula 16 na Yeruzalemi. Yandi salaka ve mambu ya mbote na meso ya Yehowa mutindu nkaka na yandi Davidi salaka.+
2 Kansi, yandi tambulaka na banzila ya bantotila ya Izraele,+ mpi yandi salaka nkutu biteki ya bibende*+ ya Babaale.
3 Diaka, yandi pesaka midinga ya bimenga na Muwanda ya Mwana ya Inomi* mpi yandi yokaka bana na yandi na tiya,+ na kulanda mambu ya mbi ya makanda+ yina Yehowa kulaka na ntwala ya bantu ya Izraele.
4 Yandi landaka mpi kupesa bimenga ti midinga ya bimenga na bisika ya kunanguka,+ na bangumba ya fioti, mpi na nsi ya konso nti yina kele ti matiti mingi.+
5 Ebuna Yehowa Nzambi na yandi pesaka yandi na maboko ya ntotila ya Siria,+ yo yina bo bedisaka yandi mpi bo kangaka bampika mingi ebuna bo nataka bo na Damasi.+ Nzambi pesaka yandi mpi na maboko ya ntotila ya Izraele, yina fwaka bantu na yandi mingi.
6 Peka+ mwana ya Remalia fwaka bantu 120 000 na Yuda na kilumbu mosi, bo yonso bantu ya kikesa, sambu bo yambulaka Yehowa Nzambi ya ba-nkaka na bo.+
7 Ebuna Zikri, soda mosi ya Efrayimi, fwaka Maaseya mwana ya ntotila, Azrikami yina vandaka kutala nzo ya ntotila,* mpi Elkana, yina vandaka kilandi ya ntotila.
8 Diaka, bantu ya Izraele kumisaka bampangi na bo 200 000 bampika—bankento, bana ya babakala mpi ya bankento; bo botulaka mpi bima mingi, ebuna bo nataka bima yina na Samaria.+
9 Kansi mbikudi mosi ya Yehowa vandaka kuna, zina na yandi Odedi. Yandi basikaka na ntwala ya basoda yina vandaka kukwisa na Samaria mpi tubilaka bo nde: “Beno tala! Kana Yehowa Nzambi ya ba-nkaka na beno pesaka Yuda na maboko na beno, yo vandaka sambu yandi wilaka bo makasi,+ mpi beno me fwa bo ti makasi yina me kuma tii na zulu.
10 Ntangu yai beno kele ti lukanu ya kukumisa bantu ya Yuda mpi ya Yeruzalemi bansadi na beno ya babakala mpi ya bankento.+ Kansi, keti beno mpi me sala ve mbi na meso ya Yehowa Nzambi na beno?
11 Beno wa mono ntangu yai mpi beno vutula bampika yina beno bakaka na bampangi na beno, sambu Yehowa me wila beno makasi ya ngolo.”
12 Ebuna bamfumu ya nkaka ya bana ya Efrayimi, Azaria mwana ya Yehohanani, Berekia mwana ya Meshilemoti, Yehizkia mwana ya Shalumi, mpi Amasa mwana ya Adlai, telaminaka bantu yina katukaka kunwana bitumba,
13 mpi bo tubilaka bo nde: “Beno kotisa ve bampika yina awa, kana ve beto ta kuma bantu ya mbi na ntwala ya Yehowa. Mambu yina beno ke zola kusala ta yika masumu na beto mpi mbi na beto, sambu mbi na beto kele dezia nene, mpi Nzambi me wila Izraele makasi ya ngolo.”
14 Yo yina, basoda yina vandaka ti binwaninu pesaka bampika mpi bima yina bo botulaka+ na maboko ya bamfumu mpi ya dibundu ya mvimba.
15 Ebuna bantu yina bo solaka na bazina telamaka mpi bakaka bampika yina; bo pesaka bampika yonso yina vandaka kinkonga bilele yina bo bakaka na bima yina bo botulaka. Yo yina bo lwatisaka bo bilele mpi pesaka bo basandale, madia ti masa, mpi mafuta sambu na nitu na bo. Diaka, bo nataka bayina vandaka ngolo ve na bampunda mpi bo nataka bo na bampangi na bo na Yeriko, mbanza ya maba. Na nima, bo vutukaka na Samaria.
16 Na ntangu yina, ntotila Ahazi lombaka lusadisu na bantotila ya Asiria.+
17 Bantu ya Edomi kotaka diaka na ngolo, bo nwanisaka Yuda, mpi bo nataka bampika.
18 Bantu ya Filistia+ mpi nwanisaka bambanza ya Shefela+ mpi ya Negebi ya Yuda ebuna bo botulaka Bete-shemeshi,+ Ayaloni,+ Gederoti, Soko ti babwala yina kele na nziunga na yo, Timna+ ti babwala yina kele na nziunga na yo, mpi Gimzo ti babwala yina kele na nziunga na yo; ebuna bo kumaka kuzinga kuna.
19 Yehowa kulumusaka Yuda sambu na Ahazi ntotila ya Izraele, sambu yandi bikaka nde bantu ya Yuda kusala mambu kukonda kudiyala, ebuna yo salaka nde bo konda kibeni kwikama na ntwala ya Yehowa.
20 Nsuka-nsuka, Tilgati-pilnesere+ ntotila ya Asiria kwisaka kunwanisa yandi mpi pesaka yandi mpasi+ na kisika ya kupesa yandi ngolo.
21 Ahazi bakaka bima ya nzo ya Yehowa, ya nzo ya ntotila,+ ti ya banzo ya bamfumu, mpi pesaka dikabu na ntotila ya Asiria; kansi yo sadisaka yandi ve.
22 Mpi ata ntangu yandi vandaka na mpasi, ntotila Ahazi salaka diaka mambu mingi kukonda kwikama na ntwala ya Yehowa.
23 Yandi yantikaka kutambikila banzambi ya Damasi+ yina bedisaka yandi,+ mpi yandi tubaka nde: “Sambu banzambi ya bantotila ya Siria ke sadisa bo, mono ta tambikila bo, sambu bo sadisa mono.”+ Kansi, banzambi yina salaka nde yandi ti Izraele ya mvimba kubula sakuba.
24 Diaka, Ahazi vukisaka bisadilu ya nzo ya Nzambi ya kieleka; na nima yandi zengaka bisadilu ya nzo ya Nzambi ya kieleka bitini-bitini,+ yandi kangaka bakielo ya nzo ya Yehowa,+ mpi yandi kudisadilaka bamesa-kimenga na konso kinkonko ya Yeruzalemi.
25 Ebuna na bambanza yonso ya Yuda, yandi salaka bisika ya kunanguka sambu na kupesa midinga ya bimenga na banzambi ya nkaka,+ mpi yandi pesaka Yehowa Nzambi ya ba-nkaka na yandi makasi.
26 Sambu na mambu ya nkaka yina yandi salaka, mambu yonso yina yandi salaka katuka na luyantiku tii na nsuka, bo me sonikaka yo na Mukanda ya Bantotila ya Yuda mpi ya Izraele.+
27 Ebuna Ahazi lalaka sambu na kupema ti ba-nkaka na yandi mpi bo zikaka yandi na mbanza, na Yeruzalemi, sambu bo zikaka yandi ve na maziamu ya bantotila ya Izraele.+ Ebuna mwana na yandi Ezekiasi kumaka ntotila na kisika na yandi.
Banoti na nsi ya lutiti
^ To “biteki ya bibende ya bo me lamba na tiya.”
^ Tala Bantendula ya Bangogo, “Gehena.”
^ Na kisina, “nzo.”
