2 Bansangu 3:1-17
3 Na nima Salomo yantikaka kutunga nzo ya Yehowa+ na Yeruzalemi na Ngumba ya Moria,+ kisika Yehowa monikaka na tata na yandi Davidi,+ na kisika yina Davidi yidikaka, na kisika ya Ornani+ muntu ya Yebusi ya bo ke tutaka bambuma sambu na kukatula yo bampusu.
2 Yandi yantikaka kutunga na kilumbu ya zole ya ngonda ya zole, na mvula ya iya ya luyalu na yandi.
3 Fondasio yina Salomo tulaka sambu na kutunga nzo ya Nzambi ya kieleka vandaka nda maboko 60, mpi nene maboko 20,+ na kutadila kitesilu ya ntama.*
4 Kisika ya kukotila yina vandaka na ntwala vandaka nda maboko 20, kiteso mosi ti nene ya nzo yina,* mpi nda na yo katuka na ntoto tii na zulu vandaka maboko 120;* mpi na kati yandi pakulaka yo wolo ya kukonda kuvukisa ti kima ya nkaka.+
5 Yandi tulaka mabaya ya yenevriye na bibaka ya nzo ya nene, na nima yandi pakulaka yo wolo ya mbote,+ ebuna yandi tulaka bifwanisu ya maba+ mpi ya miniololo+ na zulu na yo.
6 Diaka, yandi tulaka matadi ya ntalu ya kitoko na nzo yina;+ mpi wolo+ ya yandi sadilaka katukaka na Parvaimi.
7 Yandi pakulaka nzo, mitandala, minoko, bibaka na yo, mpi bakielo na yo wolo;+ mpi yandi tulaka bifwanisu ya basherube na bibaka.+
8 Yandi tungaka suku* ya Kisika ya Kuluta Santu;+ nda na yo vandaka kiteso mosi ti nene ya nzo yina, maboko 20, mpi nene na yo vandaka maboko 20. Yandi pakulaka yo batalanta* 600 ya wolo ya mbote.+
9 Kilo ya wolo sambu na minsonso vandaka bashekele* 50; mpi yandi pakulaka basuku ya zulu wolo.
10 Na nima yandi salaka bifwanisu zole ya basherube na suku* ya Kisika ya Kuluta Santu, mpi yandi pakulaka yo wolo.+
11 Nda yonso ya mapapu ya basherube vandaka maboko 20;+ dipapu mosi ya sherube ya ntete vandaka nda maboko tanu mpi yo vandaka kusimba kibaka ya nzo, mpi dipapu yina ya nkaka vandaka nda maboko tanu mpi yo vandaka kusimba dipapu mosi ya sherube yina ya nkaka.
12 Dipapu mosi ya sherube yina ya nkaka vandaka nda maboko tanu mpi yo vandaka kusimba kibaka ya nkaka ya nzo, mpi dipapu ya nkaka vandaka nda maboko tanu mpi yo vandaka kusimba dipapu mosi ya sherube ya ntete.
13 Nda ya mapapu ya kutandula ya basherube yai vandaka maboko 20; yo telamaka na makulu na yo, mpi yo vandaka kutala na kati.*
14 Yandi salaka mpi rido+ na nsinga ya ble, na lene ya mbwaki-ble, na lele ya mbwaki ya ngolo, mpi na lele ya kitoko, mpi yandi tulaka bifwanisu ya basherube na zulu na yo.+
15 Na nima yandi salaka makunzi+ zole na ntwala ya nzo, nda na yo maboko 35, mpi kima yina vandaka bonso nkalu yina vandaka na zulu ya konso dikunzi vandaka maboko tanu.+
16 Yandi salaka miniololo, yina kele bonso mayaka, mpi tulaka yo na bansongi ya makunzi, mpi yandi salaka bagrenade 100 mpi tulaka yo na zulu ya miniololo yina.
17 Yandi tedimisaka makunzi na ntwala ya tempelo, mosi na diboko ya kitata* mpi mosi na diboko ya kimama;* yandi pesaka dikunzi ya diboko ya kitata zina Yakini,* mpi dikunzi ya diboko ya kimama Boazi.*
Banoti na nsi ya lutiti
^ Diboko mosi yina bantu vandaka kusadila mingi kele basantimetre 44,5, kansi bantu ya nkaka ke yindulaka nde “kitesilu ya ntama” kele diboko ya nda yina kele basantimetre 51,8. Tala Bangindu ya Ngika B14.
^ Ntalu yai kele ve ya siki-siki.
^ To “maboko 20 ya ke basika na nene ya nzo yina.”
^ Talanta mosi kele bakilo 34,2. Tala Bangindu ya Ngika B14.
^ Na kisina, “nzo.”
^ Shekele mosi kele bagrame 11,4. Tala Bangindu ya Ngika B14.
^ Na kisina, “nzo.”
^ Disongidila, na ndambu ya Kisika ya Santu.
^ To “na ndambu ya sudi.”
^ To “na ndambu ya nordi.”
^ Yo ke tendula “Bika nde Yandi [disongidila, Yehowa] Tula Ngolo.”
^ Mbala ya nkaka yo ke tendula “Na Ngolo.”
