2 Bansangu 30:1-27
-
Ezekiasi me sala Paki (1-27)
30 Ezekiasi tindaka ndinga na Izraele ya mvimba+ ti na Yuda, mpi yandi sonikilaka nkutu Efrayimi ti Manase mikanda,+ sambu bo kwisa na nzo ya Yehowa na Yeruzalemi sambu na kuta Paki sambu na Yehowa Nzambi ya Izraele.+
2 Kansi, ntotila, bamfumu na yandi, mpi dibundu ya mvimba na Yeruzalemi bakaka lukanu ya kusala Paki na ngonda ya zole,+
3 sambu bo kukaka ve kuta yo na ntangu yina bo ke taka yo mbala na mbala,+ sambu banganga-nzambi yina kudisantisaka+ vandaka ve mingi, mpi bantu vukanaka ve na Yeruzalemi.
4 Ngidika yai vandaka mbote na meso ya ntotila mpi ya dibundu ya mvimba.
5 Yo yina, bo bakaka lukanu ya kupesa luzayisu na Izraele ya mvimba, katuka na Bere-sheba tii na Dani,+ nde bantu fwete kwisa mpi kuta Paki sambu na Yehowa Nzambi ya Izraele na Yeruzalemi, sambu na kimvuka, bo taka yo ve na kuwakana ti mambu yina bo me sonikaka.+
6 Ebuna bantu ya ke nataka mikanda* kwendaka na Izraele ya mvimba mpi na Yuda ti mikanda yina katukaka na ntotila mpi na bamfumu na yandi, mutindu ntotila pesaka ntuma, nde: “Beno bantu ya Izraele, beno vutukila Yehowa Nzambi ya Abrahami, ya Izaki, mpi ya Izraele, sambu yandi vutukila bantu yina me bikala, yina gulukaka na maboko ya bantotila ya Asiria.+
7 Beno vanda ve bonso ba-nkaka na beno mpi bampangi na beno yina salaka mambu kukonda kwikama na ntwala ya Yehowa Nzambi ya ba-nkaka na bo, yo yina yandi kumisaka bo kima ya ke pesa boma, kaka mutindu beno ke mona.+
8 Ntangu yai, beno vanda ve ntu-ngolo bonso ba-nkaka na beno.+ Beno lemfukila Yehowa mpi beno kwisa na kisika na yandi ya santu+ yina yandi me santisaka kimakulu mpi beno sadila Yehowa Nzambi na beno, sambu makasi ya ngolo yina yandi me wila beno kukatuka na beno.+
9 Sambu kana beno vutukila Yehowa, bantu yina me kangaka+ bampangi na beno ti bana na beno ta wila bo mawa mpi ta pesa bo nzila ya kuvutuka na insi yai,+ sambu Yehowa Nzambi na beno kele Nzambi ya nkenda* mpi ya mawa,+ mpi yandi ta katula ve luse na yandi na beno kana beno vutukila yandi.”+
10 Yo yina bantu ya ke nataka mikanda* kwendaka mbanza na mbanza na insi ya Efrayimi mpi ya Manase,+ nkutu tii na Zebuloni, kansi bantu vandaka kuseka bo mpi kuvweza bo.+
11 Ata mpidina, ndambu ya bantu ya Asere, ya Manase, mpi ya Zebuloni, kudikulumusaka mpi kwisaka na Yeruzalemi.+
12 Diboko ya Nzambi ya kieleka vandaka mpi na bantu ya Yuda sambu na kuvukisa bo* na kusala mambu yina ntotila mpi bamfumu pesaka bo nsiku na kulanda ndinga ya Yehowa.
13 Bantu mingi vukanaka na Yeruzalemi sambu na kusala nkinsi ya Mampa ya Kukonda Levire+ na ngonda ya zole;+ yo vandaka dibundu ya nene kibeni.
14 Bo telamaka mpi bo katulaka bamesa-kimenga yina vandaka na Yeruzalemi,+ mpi bo katulaka bamesa-kimenga yonso ya ndumbu+ mpi bo losaka yo na Muwanda ya Kidroni.
15 Ebuna bo fwaka kimenga ya Paki na kilumbu ya 14 ya ngonda ya zole. Banganga-nzambi ti Balevi waka nsoni, yo yina bo kudisantisaka mpi bo nataka makabu ya kuyoka na nzo ya Yehowa.
16 Bo telamaka na bisika na bo, na kulanda Nsiku ya Moize muntu ya Nzambi ya kieleka; na nima banganga-nzambi mwangaka menga+ yina bo bakaka na maboko ya Balevi.
17 Kuvandaka ti bantu mingi na kati ya dibundu yina kudisantisaka ve, mpi Balevi vandaka na kisalu ya kufwa bimenga ya Paki sambu na bantu yonso yina vandaka ve bunkete,+ sambu na kusantisa bo sambu na Yehowa.
18 Sambu bantu mingi, mingi-mingi bantu yina katukaka na Efrayimi, na Manase,+ na Isakare, mpi na Zebuloni, kudikumisaka ve bunkete, kansi bo diaka Paki, diambu yina ke wakana ve ti mambu yina bo me sonikaka. Kansi Ezekiasi sambaka sambu na bo nde: “Bika nde Yehowa, yina kele mbote,+ kulolula
19 konso muntu yina yidikaka ntima na yandi sambu na kusosa Nzambi ya kieleka,+ Yehowa, Nzambi ya ba-nkaka na yandi, ata yandi me kudikumisa ve bunkete na kutadila minsiku ya busantu.”+
20 Yehowa waka Ezekiasi mpi yandi lolulaka* bantu yina.
21 Yo yina bantu ya Izraele yina vandaka na Yeruzalemi taka nkinsi ya Mampa ya Kukonda Levire+ bilumbu nsambwadi ti kiese mingi,+ mpi Balevi ti banganga-nzambi vandaka kukumisa Yehowa konso kilumbu, mpi bo vandaka kubula ngolo bima na bo ya kubudila miziki sambu na Yehowa.+
22 Diaka, Ezekiasi tubilaka mpi siamisaka* Balevi yonso yina sadilaka Yehowa ti ngangu. Ebuna na nsungi ya bilumbu nsambwadi ya nkinsi yina,+ bo diaka, bo tambikaka bimenga ya kinduku,+ mpi bo pesaka matondo na Yehowa Nzambi ya ba-nkaka na bo.
23 Na nima, dibundu ya mvimba bakaka lukanu ya kuta yo diaka bilumbu nsambwadi ya nkaka, yo yina bo taka yo diaka bilumbu nsambwadi na kiese.+
24 Mpi Ezekiasi ntotila ya Yuda pesaka makabu sambu na dibundu: bangombe ya babakala 1 000 mpi mameme 7 000, ebuna bamfumu pesaka makabu sambu na dibundu: bangombe ya babakala 1 000+ mpi mameme 10 000; mpi banganga-nzambi mingi kibeni vandaka kudisantisa.+
25 Dibundu ya mvimba ya Yuda, banganga-nzambi, Balevi, dibundu ya mvimba yina katukaka na Izraele,+ mpi banzenza+ yina katukaka na insi ya Izraele ti bayina vandaka kuzinga na Yuda landaka kuwa kiese.
26 Ebuna kiese vandaka mingi na Yeruzalemi, sambu katuka na bilumbu ya Salomo mwana ya Davidi ntotila ya Izraele, bo me salaka ntete ve diambu ya mutindu yai na Yeruzalemi.+
27 Nsuka-nsuka banganga-nzambi yina vandaka Balevi telamaka mpi sakumunaka bantu;+ Nzambi waka bandinga na bo, mpi kisambu na bo kumaka tii na zulu, kisika ya santu yina yandi ke zingaka.
Banoti na nsi ya lutiti
^ Na kisina, “bantu ya ke bakaka ntinu.”
^ To “ya ke sadilaka bantu mambu na luzitu yonso.”
^ Na kisina, “bantu ya ke bakaka ntinu.”
^ Na kisina, “kupesa bo ntima mosi.”
^ Na kisina, “belulaka.”
^ Na kisina, “tubaka na ntima ya.”
