2 Bansangu 4:1-22
4 Na nima yandi salaka mesa-kimenga ya kwivre,+ yo vandaka maboko 20 na nda, maboko 20 na nene, mpi maboko 10 katuka na ntoto tii na zulu.
2 Yandi salaka Nzadi-Mungwa* na kibende yina bo lambaka na tiya.+ Yo vandaka bonso dilonga, maboko 10 katuka ndambu mosi tii na ndambu ya nkaka, nda maboko 5 katuka na ntoto tii na zulu, mpi yo bakaka nsinga ya kutesila ya nda maboko 30 sambu na kuziunga yo.+
3 Mpi kuvandaka ti bima ya kitoko bonso bankalu na nsi na yo,+ yo ziungaka Nzadi-Mungwa ya mvimba, kumi na kitamina ya diboko mosi na nziunga ya Nzadi-Mungwa. Bankalu vandaka na bandonga zole mpi bo salaka yo nzila mosi ti Nzadi-Mungwa yina na kibende yina bo lambaka na tiya.
4 Yo vandaka na zulu ya bangombe 12;+ 3 vandaka kutala na nordi, 3 na westi, 3 na sudi, mpi 3 na esti; Nzadi-Mungwa vandaka na zulu na yo, mpi banima na yo vandaka kutala na kati-kati.
5 Nene ya kibende na yo vandaka nene ya diboko;* bo salaka lweka na yo bonso lweka ya dikopa, bonso kintuntu ya lisi. Kisika ya kutula masa vandaka kukota ba-bati* 3 000 ya masa.
6 Yandi salaka mpi malonga kumi ya nene sambu na kuyobila; yandi tulaka malonga tanu na diboko ya kitata mpi tanu na diboko ya kimama.+ Na kati na yo, bo vandaka kuyobisa bima yina bo vandaka kusadila sambu na makabu ya kuyoka.+ Kansi Nzadi-Mungwa vandaka sambu banganga-nzambi kuyobila.+
7 Na nima yandi salaka bima ya kutudila minda ya wolo kumi,+ mutindu bo songaka yandi,+ mpi yandi tulaka yo na tempelo, tanu na diboko ya kitata mpi tanu na diboko ya kimama.+
8 Yandi salaka mpi bamesa kumi mpi tulaka yo na tempelo, tanu na diboko ya kitata mpi tanu na diboko ya kimama;+ mpi yandi salaka babolo ya wolo 100.
9 Na nima yandi salaka kibansala+ ya banganga-nzambi,+ kibansala* ya nene,+ mpi bakielo sambu na kibansala, mpi yandi pakulaka bakielo na yo kwivre.
10 Yandi tulaka Nzadi-Mungwa na diboko ya kitata, na ndambu ya sudi-esti.+
11 Hirami salaka mpi mabungu ya kutudila putulu ya tiya, bapawu, mpi babolo.+
Hirami manisaka kisalu yina yandi salaka sambu na ntotila Salomo na nzo ya Nzambi ya kieleka:+
12 makunzi+ zole mpi bima yina vandaka bonso babolo yina vandaka na bansongi ya makunzi zole; miyungulu+ zole ya kufika bima zole yina vandaka bonso babolo yina vandaka na bansongi ya makunzi;
13 bagrenade+ 400 sambu na miyungulu zole, bandonga zole ya bagrenade sambu na konso muyungulu, sambu na kufika bima zole ya kuvandaka bonso babolo yina vandaka na bansongi ya makunzi;+
14 bapusu-pusu kumi* mpi malonga ya nene kumi yina vandaka na zulu ya bapusu-pusu;+
15 Nzadi-Mungwa mpi bangombe 12 yina vandaka na nsi na yo;+
16 mpi mabungu ya kutudila putulu ya tiya, bapawu, bansomo,+ mpi bisadilu na yo yonso yina Irami-abivi+ salaka na kwivre ya bo me yidika mbote-mbote sambu na ntotila Salomo sambu na nzo ya Yehowa.
17 Ntotila lambaka yo na tiya na ntoto ya tuma na distrike ya Yordani, na kati-kati ya Sukoti+ ti Sereda.
18 Salomo salaka bisadilu yai yonso mingi kibeni; bo sosaka ve kuzaba kilo ya kwivre yina.+
19 Salomo salaka bisadilu+ yonso sambu na nzo ya Nzambi ya kieleka: mesa-kimenga ya wolo;+ bamesa+ yina vandaka ti dimpa ya kumonisa na zulu na yo;+
20 bima ya kutudila minda mpi minda na yo ya wolo ya kukonda kuvukisa ti kima ya nkaka,+ sambu yo pela na ntwala ya suku ya kati kibeni na kutadila mambu yina nsiku vandaka kulomba;
21 mpi bintuntu, minda, ti bapense ya fioti, na wolo, wolo ya kukonda kuvukisa ti kima ya nkaka;
22 bima ya kufwila tiya, babolo, makopa, mpi bima ya kunatila tiya, na wolo ya kukonda kuvukisa ti kima ya nkaka; mpi kisika ya kukotila na nzo, bakielo na yo ya kati sambu na Kisika ya Kuluta Santu,+ mpi bakielo ya nzo ya tempelo na wolo.+
Banoti na nsi ya lutiti
^ To “kisika ya kubumbila masa.”
^ Kiteso ya basantimetre 7,4. Tala Bangindu ya Ngika B14.
^ Bati mosi kele balitre 22. Tala Bangindu ya Ngika B14.
^ To “lupangu.”
^ To “bapusu-pusu kumi ya kunatila masa.”
