2 Bansangu 8:1-18
8 Na nsuka ya bamvula 20 yina Salomo tungaka nzo ya Yehowa mpi nzo na yandi mosi,*+
2 Salomo tungaka diaka bambanza yina Hirami+ pesaka yandi mpi yandi tulaka bantu ya Izraele* na kuzinga kuna.
3 Diaka, Salomo kwendaka na Amati-soba mpi yandi botulaka yo.
4 Ebuna yandi tungaka* Tadmore na ntoto-makanga mpi bambanza yonso ya kubumbila bima+ yina yandi tungaka na Amati.+
5 Yandi tungaka mpi Bete-oroni ya Zulu+ ti Bete-oroni ya Nsi,+ bambanza ya ngolo yina vandaka ti bibaka, bakielo, mpi banti,
6 Baalati+ ti bambanza yonso yina Salomo vandaka kubumba bima, bambanza yonso ya bapusu-pusu,+ bambanza sambu na bantu yina ke tambusaka bampunda, mpi konso kima yina Salomo vandaka na nzala ya kutunga na Yeruzalemi, na Libani, mpi na insi ya mvimba ya luyalu na yandi.
7 Bantu yonso yina bikalaka na kati ya bantu ya Heti, ya bantu ya Amore, ya bantu ya Perizi, ya bantu ya Hivi, mpi ya bantu ya Yebusi,+ bayina vandaka ve na kati ya bantu ya Izraele,+
8 bana na bo yina bikalaka na insi yina—bayina bantu ya Izraele manisaka ve na kufwa+—Salomo bakaka bo sambu bo sala bisalu ya ngolo tii bubu yai.+
9 Kansi Salomo kumisaka ve ata muntu mosi ya Izraele mpika sambu na kisalu na yandi,+ sambu bo vandaka basoda na yandi, bamfumu ya bakomanda na yandi, mpi bamfumu ya bantu yina ke tambusaka bapusu-pusu na yandi ti ya bantu yina ke tambusaka bampunda na yandi.+
10 Kuvandaka ti bamfumu ya mimonisi 250 ya ntotila Salomo, bakapita ya bantu.+
11 Salomo katulaka mpi mwana ya Farao+ na Mbanza ya Davidi mpi nataka yandi na nzo yina yandi tungilaka yandi,+ sambu Salomo tubaka nde: “Ata yandi kele nkento na mono, yandi fwete zinga ve na nzo ya Davidi ntotila ya Izraele, sambu bisika yina Sanduku ya Yehowa me kwisa kele santu.”+
12 Na nima Salomo pesaka Yehowa bimenga ya kuyoka+ na mesa-kimenga+ ya Yehowa yina yandi tungaka na ntwala ya kisika ya kukotila.+
13 Yandi salaka mutindu bo ke salaka konso kilumbu mpi yandi pesaka makabu na kulanda nsiku ya Moize sambu na Bisabatu,+ bangonda ya mpa,+ mpi bankinsi yina bo me tulaka mbala tatu na mvula+—Nkinsi ya Mampa ya Kukonda Levire,+ Nkinsi ya Bamposo,+ mpi Nkinsi ya Bisasa.*+
14 Diaka, yandi tulaka bimvuka ya banganga-nzambi+ na bisalu na bo na kulanda nsiku ya tata na yandi Davidi, mpi Balevi sambu na bisika na bo ya kisalu, sambu na kukumisa Nzambi+ mpi kusala kisalu na ntwala ya banganga-nzambi na kutadila mutindu bo ke salaka konso kilumbu, mpi bankengidi ya bakielo na bimvuka na bo sambu na bakielo ya kuswaswana,+ sambu yina mambu Davidi muntu ya Nzambi ya kieleka tubaka.
15 Bo bikisaka ve mambu yina ntotila songaka banganga-nzambi mpi Balevi sambu na konso diambu yina to sambu na banzo ya kubumbila bima.
16 Kisalu yonso ya Salomo vandaka ya kuyidika mbote-mbote,* yantika kilumbu yina bo tulaka+ fondasio ya nzo ya Yehowa tii kuna yo manaka. Ebuna nzo ya Yehowa manaka.+
17 Na ntangu yina Salomo kwendaka na Esioni-gebere+ mpi na Eloti+ na lweka ya masa na insi ya Edomi.+
18 Hirami+ tindilaka yandi bamaswa mpi bantu yina me zaba nzadi-mungwa mbote-mbote na nzila ya bansadi na yandi. Bo kwendaka ti bansadi ya Salomo na Ofire+ mpi kuna bo bakaka batalanta* 450 ya wolo+ ebuna bo nataka yo na ntotila Salomo.+
Banoti na nsi ya lutiti
^ To “nzo ya ntotila.”
^ Na kisina, “bana ya Izraele.”
^ To “tungaka diaka.”
^ To “Bisika ya Kuzinga ya Ntangu Fioti.”
^ To “ya kubongisa mbote-mbote; manaka.”
^ Talanta mosi kele bakilo 34,2. Tala Bangindu ya Ngika B14.
