2 Bantotila 1:1-18
-
Eliya me tubila na ntwala lufwa ya Ahazia (1-18)
1 Na nima ya lufwa ya Ahabi, Moabi+ kolaminaka Izraele.
2 Na ntangu yina, Ahazia bwaka mpi basikaka na muyungulu ya suku na yandi ya zulu na Samaria ebuna yandi lwalaka. Yandi tindaka binati-nsangu mpi tubilaka bo nde: “Beno kwenda kuyula Baale-zebubi nzambi ya Ekroni+ sambu na kuzaba kana mono ta beluka na mputa yai.”+
3 Kansi wanzio ya Yehowa tubilaka Eliya*+ muntu ya Tishebe, nde: “Telama, kwenda kukutana ti binati-nsangu ya ntotila ya Samaria mpi tubila bo nde, ‘Keti sambu Nzambi kele ve na Izraele yo yina beno ke kwenda kuyula Baale-zebubi nzambi ya Ekroni?+
4 Yo yina Yehowa ke tuba nde: “Nge ta telama ve na mbeto yina nge me lala, sambu nge ta fwa kibeni.”’” Ebuna Eliya kwendaka.
5 Ntangu binati-nsangu vutukaka kisika yandi vandaka, na mbala mosi yandi yulaka bo nde: “Sambu na nki beno me kwisa kuvutuka?”
6 Bo vutudilaka yandi nde: “Muntu mosi kwisaka kukutana ti beto, mpi yandi tubilaka beto nde, ‘Beno kwenda, beno vutuka na ntotila yina tindaka beno mpi beno songa yandi nde, “Yehowa ke tuba nde: ‘Keti sambu Nzambi kele ve na Izraele yo yina nge ke tinda bantu sambu na kuyula Baale-zebubi nzambi ya Ekroni? Yo yina, nge ta telama ve na mbeto yina nge me lala, sambu nge ta fwa kibeni.’”’”+
7 Ebuna yandi yulaka bo nde: “Muntu yina kwisaka kukutana ti beno mpi tubilaka beno mambu yai vandaka nki mutindu?”
8 Bo tubilaka yandi nde: “Yandi vandaka ti lele ya mika ya mbisi,+ mpi yandi lwataka mukaba ya mpusu ya mbisi na luketo na yandi.”+ Na mbala mosi yandi tubaka nde: “Yo kele Eliya muntu ya Tishebe.”
9 Ebuna ntotila tindilaka yandi mfumu ya basoda 50 ti bantu na yandi 50. Ntangu mfumu yina tombukaka kisika yina Eliya vandaka, yandi vandaka ya kuvanda na nsongi ya ngumba. Yandi tubilaka yandi nde: “Muntu ya Nzambi ya kieleka,+ ntotila me tuba nde, ‘Kwisa kukulumuka.’”
10 Kansi Eliya tubilaka mfumu yina ya basoda 50 nde: “Kana mono kele muntu ya Nzambi, bika tiya kukatuka na zulu yo kwisa kukulumuka,+ mpi yo yoka nge ti bantu na nge 50.” Tiya katukaka na zulu, yo kwisaka kukulumuka, mpi yo yokaka yandi ti bantu na yandi 50.
11 Yo yina ntotila tindilaka yandi diaka mfumu ya nkaka ya basoda 50 ti bantu na yandi 50. Yandi tombukaka mpi tubilaka yandi nde: “Muntu ya Nzambi ya kieleka, ntotila me tuba nde, ‘Kwisa kukulumuka nswalu.’”
12 Kansi Eliya tubilaka bo nde: “Kana mono kele muntu ya Nzambi ya kieleka, bika tiya kukatuka na zulu, yo kwisa kukulumuka, mpi yo yoka nge ti bantu na nge 50.” Tiya ya Nzambi katukaka na zulu, yo kwisaka kukulumuka, mpi yo yokaka yandi ti bantu na yandi 50.
13 Ebuna ntotila tindaka diaka mfumu ya tatu ya basoda 50 ti bantu na yandi 50. Kansi mfumu ya tatu ya basoda 50 tombukaka mpi fukamaka na ntwala ya Eliya; yandi yantikaka kubondila sambu yandi wila yandi mawa mpi yandi tubilaka yandi nde: “Pardo, muntu ya Nzambi ya kieleka, bika nde luzingu na mono mpi luzingu ya* bansadi na nge yai 50 kuvanda na mfunu na meso na nge.
14 Tiya katukaka na zulu, yo kwisaka kukulumuka, mpi yo yokaka bamfumu zole ya ntete ya basoda 50 ti bimvuka na bo ya bantu 50, kansi ntangu yai bika nde luzingu* na mono kuvanda na mfunu na meso na nge.”
15 Yo yina wanzio ya Yehowa songaka Eliya nde: “Kulumuka ti yandi. Kuwa yandi boma ve.” Eliya telamaka mpi kwendaka ti yandi kisika ntotila vandaka.
16 Ebuna Eliya tubilaka ntotila nde, “Yehowa ke tuba nde: ‘Nge tindaka binati-nsangu sambu na kuyula Baale-zebubi, nzambi ya Ekroni.+ Keti sambu Nzambi kele ve na Izraele?+ Sambu na nki nge yulaka ve ndinga na yandi? Yo yina, nge ta telama ve na mbeto yina nge me lala, sambu nge ta fwa kibeni.’”
17 Yo yina yandi fwaka, na kuwakana ti ndinga ya Yehowa yina Eliya tubaka; mpi sambu yandi vandaka ve ti bana, Yehorami*+ kumaka ntotila na kisika na yandi, na mvula ya zole ya Yehorami+ mwana ya Yehoshafati ntotila ya Yuda.
18 Sambu na mambu ya nkaka ya Ahazia+ salaka, mambu yina yandi salaka, keti bo me sonikaka yo ve na mukanda ya bansangu ya bantotila ya Izraele?
Banoti na nsi ya lutiti
^ Yo ke tendula “Yehowa Kele Nzambi na Mono.”
^ To “bika nde moyo na mono mpi mioyo ya.”
^ To “moyo.”
^ Disongidila, mpangi ya Ahazia.
