2 Bantotila 11:1-21
11 Ntangu Atalia,+ mama ya Ahazia, monaka nde mwana na yandi me fwa,+ yandi telamaka mpi fwaka dibuta ya mvimba ya kimfumu.*+
2 Kansi, Yehosheba mwana ya ntotila Yehorami ya nkento, mpangi ya Ahazia, bakaka Yehoashi+ mwana ya Ahazia, yandi katulaka yandi na kati ya bana ya ntotila yina bo zolaka kufwa mpi tinisaka yandi, mpi bumbaka yandi ti ndesi na yandi na suku mosi ya kulala ya kati. Bo nungaka na kubumba yandi sambu Atalia kumona yandi ve, yo yina bo fwaka yandi ve.
3 Yandi bikalaka ti yandi bamvula sambanu, ya kubumbana na nzo ya Yehowa, na ntangu yina Atalia vandaka kuyala insi.
4 Na mvula ya nsambwadi, Yehoyada tindaka bantu sambu na kubinga bamfumu ya bankama ya bantu ya Karia yina ke kengilaka ntotila mpi ya bankengidi* ya nzo ya ntotila,+ mpi yandi bingisaka bo na kukwisa na nzo ya Yehowa kisika yandi vandaka. Yandi salaka kuwakana ti bo mpi yandi lombaka bo na kuzenga kieleka sambu na yo na nzo ya Yehowa, na nima yandi songaka bo mwana ya ntotila.+
5 Yandi songaka bo nde: “Beno fwete sala mutindu yai: Kimvuka mosi na kati ya bimvuka na beno tatu ta sala kisalu na Kisabatu mpi ta keba mbote-mbote nzo ya ntotila,+
6 kimvuka ya nkaka ta vanda na Kielo ya Fondasio, mpi kimvuka ya tatu ta vanda na kielo yina kele na nima ya bankengidi ya nzo ya ntotila. Beno ta sala bature na ntangu beno ke langidila nzo.
7 Bimvuka na beno zole yina ta sala ve kisalu na Kisabatu fwete keba mbote-mbote nzo ya Yehowa sambu na kutanina ntotila.
8 Beno fwete ziunga ntotila na bandambu yonso, konso muntu ti binwaninu na yandi na maboko. Konso muntu yina ta kota na bandonga, bo ta fwa yandi. Beno vanda ti ntotila konso kisika yina yandi ke kwenda.”*
9 Bamfumu ya bankama+ salaka kaka mutindu nganga-nzambi Yehoyada songaka bo. Yo yina konso muntu bakaka bantu na yandi yina vandaka na kisalu na Kisabatu, ti bayina vandaka ve na kisalu na Kisabatu, mpi bo kotaka kisika nganga-nzambi+ Yehoyada vandaka.
10 Ebuna nganga-nzambi pesaka bamfumu ya bankama makonga mpi bitaninu ya ntotila Davidi yina kele bonso dimbuma, mpi yina vandaka na nzo ya Yehowa.
11 Ebuna bankengidi ya nzo ya ntotila+ telamaka na bisika na bo, konso muntu ti binwaninu na yandi na maboko, yantika na diboko ya kitata ya nzo tii na diboko ya kimama ya nzo, pene-pene ya mesa-kimenga+ mpi pene-pene ya nzo, na nziunga ya ntotila.
12 Na nima, Yehoyada basisaka mwana ya ntotila,+ yandi lwatisaka yandi mpu ya kimfumu mpi tulaka Kimbangi*+ na zulu na yandi, ebuna bo kumisaka yandi ntotila mpi tulaka yandi mafuta. Bo yantikaka kubula maboko mpi kutuba nde: “Luzingu ya nda na ntotila!”+
13 Ntangu Atalia waka makelele ya bantu ya ke baka ntinu, na mbala mosi yandi kwisaka na nzo ya Yehowa+ kisika bantu vandaka.
14 Ebuna yandi monaka ntotila me telama kuna pene-pene ya dikunzi, mutindu vandaka kikalulu na bo.+ Bamfumu ti bantu ya ke bulaka bampungi+ vandaka ti ntotila, mpi bantu yonso ya insi vandaka kuyangalala mpi kubula bampungi. Ebuna Atalia pasulaka bilele na yandi mpi bokaka nde: “Komplo! Komplo!”
15 Kansi nganga-nzambi Yehoyada songaka bamfumu ya bankama,+ bantu yina bo tulaka bamfumu ya basoda, nde: “Beno katula yandi na bandonga, mpi kana muntu kulanda yandi, beno fwa yandi na mbele ya bitumba!” Sambu nganga-nzambi tubaka nde: “Beno fwa yandi ve na nzo ya Yehowa.”
16 Yo yina bo simbaka yandi, mpi ntangu yandi kumaka na munoko ya Kielo ya Bampunda ya nzo ya ntotila,+ bo fwaka yandi pana.
17 Ebuna Yehoyada salaka kuwakana na kati ya Yehowa ti ntotila mpi ti bantu,+ nde bo ta landa kuvanda bantu ya Yehowa, yandi salaka mpi kuwakana na kati ya ntotila ti bantu.+
18 Na nima, bantu yonso ya insi kwisaka na nzo* ya Baale mpi bwisaka bamesa-kimenga na yandi,+ bo panzaka biteki na yandi,+ mpi bo fwaka Matani nganga-nzambi ya Baale+ na ntwala ya bamesa-kimenga yina.
Ebuna nganga-nzambi tulaka bankengi na nzo ya Yehowa.+
19 Diaka, yandi bakaka bamfumu ya bankama,+ bantu ya Karia yina ke kengilaka ntotila, basoda yina ke kengilaka nzo ya ntotila,+ mpi bantu yonso ya insi sambu na kubaka ntotila na nzo ya Yehowa mpi kukulumuka ti yandi, ebuna bo lutilaka na nzila ya kielo ya nkengidi ya nzo ya ntotila sambu na kukwisa na nzo ya ntotila. Na nima, yandi vandaka na kiti ya kimfumu ya bantotila.+
20 Yo yina bantu yonso ya insi waka kiese mpi mbanza kumaka pima, sambu bo fwaka Atalia na mbele ya bitumba na nzo ya ntotila.
21 Yehoashi+ vandaka ti bamvula nsambwadi ntangu yandi kumaka ntotila.+
Banoti na nsi ya lutiti
^ Na kisina, “fwaka nkuna yonso ya kimfumu.”
^ Na kisina, “bantu ya ke bakaka ntinu.”
^ Na kisina, “ntangu yandi ke basika mpi ntangu yandi ke kota.”
^ Mbala ya nkaka rulo mosi yina vandaka ti Nsiku ya Nzambi.
^ To “tempelo.”
