2 Bantotila 16:1-20
16 Na mvula ya 17 ya Peka mwana ya Remalia, Ahazi+ mwana ya Yotami ntotila ya Yuda kumaka ntotila.
2 Ahazi vandaka ti bamvula 20 ntangu yandi kumaka ntotila, mpi yandi yalaka bamvula 16 na Yeruzalemi. Yandi salaka ve mambu ya mbote na meso ya Yehowa Nzambi na yandi mutindu nkaka na yandi Davidi salaka.+
3 Kansi, yandi tambulaka na nzila ya bantotila ya Izraele,+ yandi yokaka* nkutu mwana na yandi na tiya,+ na kulanda mambu ya mbi ya makanda+ yina Yehowa kulaka na ntwala ya bantu ya Izraele.
4 Yandi landaka mpi kupesa bimenga ti midinga ya kimenga na bisika ya kunanguka,+ na bangumba ya fioti, mpi na nsi ya konso nti yina kele ti matiti mingi.+
5 Na ntangu yina, Resini ntotila ya Siria ti Peka mwana ya Remalia ntotila ya Izraele kwisaka kutombuka sambu na kunwanisa Yeruzalemi.+ Bo ziungaka Ahazi, kansi bo monaka ve mpila ya kubotula mbanza.
6 Na ntangu yina, Resini ntotila ya Siria vutulaka Elati+ na Edomi, na nima yandi kulaka Bayuda* na Elati. Ebuna bantu ya Edomi kotaka na Elati, mpi bo ke zingaka kuna tii bubu yai.
7 Yo yina Ahazi tindaka binati-nsangu na Tiglati-pilesere+ ntotila ya Asiria, mpi tubaka nde: “Mono kele nsadi na nge mpi mwana na nge. Kwisa kugulusa mono na maboko ya ntotila ya Siria mpi na maboko ya ntotila ya Izraele, bayina ke nwanisa mono.”
8 Na nima Ahazi bakaka arza ti wolo yina vandaka na nzo ya Yehowa mpi na bisika ya kubumba bimvwama ya nzo ya ntotila, mpi yandi tindilaka ntotila ya Asiria avoka.+
9 Ntotila ya Asiria ndimaka diambu yina yandi lombaka, ebuna yandi kwendaka na Damasi, yandi botulaka yo, mpi yandi nataka bantu na yo na kimpika na Kire,+ ebuna yandi fwaka Resini.+
10 Na nima ntotila Ahazi kwendaka kukutana ti Tiglati-pilesere ntotila ya Asiria na Damasi. Ntangu yandi monaka mesa-kimenga yina vandaka na Damasi, ntotila Ahazi tindilaka nganga-nzambi Uriya pula ya mesa-kimenga yina, yandi monisaka mutindu yo kele mpi mutindu bo salaka yo.+
11 Nganga-nzambi Uriya+ tungaka mesa-kimenga+ na kulanda bantuma yonso yina ntotila Ahazi tindaka ntangu yandi vandaka na Damasi. Nganga-nzambi Uriya manisaka kutunga yo na ntwala nde ntotila Ahazi kukatuka na Damasi mpi kuvutuka.
12 Ntangu ntotila katukaka na Damasi mpi vutukaka mpi monaka mesa-kimenga yina, yandi pusanaka pene-pene ya mesa-kimenga mpi pesaka makabu na zulu na yo.+
13 Yandi landaka kuyoka makabu na yandi ya kuyoka mpi makabu na yandi ya mbuma na zulu ya mesa-kimenga yina; yandi tiamunaka mpi makabu na yandi ya malafu mpi mwangaka menga ya bimenga na yandi ya kinduku na zulu na yo.
14 Na nima yandi katulaka mesa-kimenga ya kwivre+ yina vandaka na ntwala ya Yehowa na kisika na yo na ntwala ya nzo, na kati-kati ya mesa-kimenga na yandi mosi ti nzo ya Yehowa, ebuna yandi tulaka yo na ndambu ya nordi ya mesa-kimenga na yandi.
15 Ntotila Ahazi songaka nganga-nzambi Uriya+ nde: “Yoka dikabu ya kuyoka ya suka na zulu ya mesa-kimenga ya nene sambu yo basisa midinga,+ mpi dikabu ya mbuma ya nkokila,+ dikabu ya kuyoka ya ntotila, mpi dikabu na yandi ya mbuma, mpi makabu ya kuyoka, makabu ya mbuma, mpi makabu ya malafu ya bantu yonso. Nge fwete mwanga mpi na zulu na yo menga yonso ya makabu ya kuyoka ti menga yonso ya bimenga ya nkaka. Sambu na mesa-kimenga ya kwivre, bika mono yindula nki mono ta sala ti yo.”
16 Nganga-nzambi Uriya salaka mambu yonso yina ntotila Ahazi songaka yandi.+
17 Diaka, ntotila Ahazi zenga-zengaka bapano na balweka ya bapusu-pusu+ mpi katulaka malonga ya nene yina vandaka na zulu na yo;+ yandi katulaka Nzadi-Mungwa na zulu ya bangombe ya kwivre+ yina vandaka kusimba yo mpi yandi tulaka yo na zulu ya pavema ya matadi.+
18 Ebuna kisika ya kufika, yina bo vandaka kusadila na Kisabatu, mpi yina bo tungaka na kati ya nzo, mpi kisika ya kukotila ya ntotila, yandi katulaka yo na nzo ya Yehowa; yandi salaka mutindu yina sambu na ntotila ya Asiria.
19 Sambu na mambu ya nkaka ya Ahazi salaka, mambu yina yandi salaka, keti bo me sonikaka yo ve na mukanda ya bansangu ya bantotila ya Yuda?+
20 Ebuna Ahazi lalaka sambu na kupema ti ba-nkaka na yandi mpi bo zikaka yandi ti ba-nkaka na yandi na Mbanza ya Davidi; ebuna mwana na yandi Ezekiasi*+ kumaka ntotila na kisika na yandi.
Banoti na nsi ya lutiti
^ Na kisina, “lutisaka.”
^ To “bantu ya Yuda.”
^ Disongidila, Yehowa Me Pesa Kikesa.
