2 Bantotila 20:1-21
20 Na bilumbu yina, Ezekiasi belaka mpi yandi zolaka kufwa.+ Mbikudi Yezaya mwana ya Amozi kwisaka mpi tubilaka yandi nde, “Yehowa me tuba nde: ‘Pesa bantu ya nzo na nge bantuma, sambu nge ta fwa; nge ta beluka ve.’”+
2 Ebuna yandi balulaka luse na yandi na kibaka mpi yandi yantikaka kusamba Yehowa nde:
3 O Yehowa, mono ke bondila nge, pardo, yibuka mutindu mono tambulaka na ntwala na nge na kwikama mpi ti ntima ya mvimba, mpi mono salaka mambu ya mbote na meso na nge.”+ Ebuna Ezekiasi yantikaka kudila mingi kibeni.
4 Yezaya basikaka kansi yandi kumaka ntete ve na kati-kati ya lupangu ntangu ndinga ya Yehowa kwisilaka yandi nde:+
5 Vutuka mpi tubila Ezekiasi, ntwadisi ya bantu na mono nde, ‘Yehowa Nzambi ya nkaka na nge Davidi me tuba nde: “Mono me wa kisambu na nge. Mono me mona mansanga na nge.+ Tala, mono ke belula nge.+ Na kilumbu ya tatu, nge ta kwenda na nzo ya Yehowa.+
6 Mono ta yika bamvula 15 na luzingu* na nge, mpi mono ta gulusa nge ti mbanza yai na maboko ya ntotila ya Asiria,+ mpi mono ta nwanina mbanza yai sambu na mono mosi mpi sambu na nsadi na mono Davidi.”’”+
7 Ebuna Yezaya tubaka nde: “Beno nata gato ya bafige ya kuyuma ya bo me bweta.” Bo nataka yo mpi bo pakulaka yo na kivimbu, na nima yandi belukaka malembe-malembe.+
8 Ezekiasi yulaka Yezaya nde: “Inki kidimbu+ ke monisa nde Yehowa ta belula mono mpi nde mono ta tombuka na nzo ya Yehowa na kilumbu ya tatu?”
9 Yezaya vutulaka nde: “Yai kidimbu ya me katuka na Yehowa sambu na kumonisa nge nde Yehowa ta lungisa diambu yina yandi me tuba: Keti nge ke zola nde kivudi yina kele na kimatilu* kupusana bitambi kumi na ntwala to kuvutuka bitambi kumi na nima?”+
10 Ezekiasi tubaka nde: “Yo kele mpasi ve sambu kivudi kupusana yo mosi bitambi kumi, kansi yo kele mpasi na kuvutuka bitambi kumi na nima.”
11 Yo yina mbikudi Yezaya bingaka Yehowa, ebuna yandi salaka nde kivudi kuvutuka bitambi kumi na nima na kimatilu ya Ahazi na ntangu yo vandaka me kulumuka dezia na bitambi yina.+
12 Na ntangu yina, ntotila ya Babilone Berodaki-baladani mwana ya Baladani tindilaka Ezekiasi mikanda mpi dikabu, sambu yandi waka nde Ezekiasi belaka.+
13 Ezekiasi yambaka* bo mpi songisaka bo nzo na yandi ya mvimba ya kubumbila bima ya ntalu+—arza, wolo, mafuta ya balsami ti mafuta ya nkaka ya ntalu, binwaninu na yandi, mpi bima yonso yina vandaka na bisika na yandi ya kubumba bimvwama. Kuvandaka ve ata ti kima mosi yina Ezekiasi songaka bo ve na nzo na yandi* mpi na kimfumu na yandi ya mvimba.
14 Na nima, mbikudi Yezaya kotaka kisika ntotila Ezekiasi vandaka mpi yulaka yandi nde: “Bantu yai me tuba nki, mpi bo me katuka na wapi?” Ezekiasi tubaka nde: “Bo me katuka na insi mosi ya ntama, na Babilone.”+
15 Na nima yandi yulaka nde: “Inki bo me mona na nzo na nge?”* Ezekiasi vutulaka nde: “Bo me mona bima yonso yina kele na nzo na mono.* Kele ve ata ti kima mosi ya mono me songa bo ve na bisika na mono ya kubumba bimvwama.”
16 Ebuna Yezaya tubilaka Ezekiasi nde: “Wa ndinga ya Yehowa,+
17 ‘Bilumbu ke kwisa, mpi bima yonso yina kele na nzo na nge* ti bima yonso yina ba-nkaka na nge me bumbaka tii bubu yai bo ta nata yo na Babilone.+ Ata kima mosi ve ta bikala,’ Yehowa muntu me tuba.
18 ‘Mpi bana na nge ya nkaka ya babakala yina nge ta buta, bo ta baka bo+ mpi bo ta kuma bakapita na nzo ya ntotila ya Babilone.’”+
19 Ebuna Ezekiasi tubilaka Yezaya nde: “Ndinga ya Yehowa yina nge me tuba kele mbote.”+ Yandi yikaka nde: “Yo kele mbote kana ngemba mpi lutaninu* ta vanda ntangu mono kele na luzingu.”+
20 Sambu na mambu ya nkaka ya Ezekiasi salaka, ngolo na yandi yonso, mutindu yandi salaka kiziba+ ti nzila yina ke lutisaka masa, mpi mutindu yandi nataka masa na mbanza,+ keti bo me sonikaka yo ve na mukanda ya bansangu ya bantotila ya Yuda?
21 Na nima Ezekiasi lalaka sambu na kupema ti ba-nkaka na yandi;+ ebuna mwana na yandi Manase+ kumaka ntotila na kisika na yandi.+
Banoti na nsi ya lutiti
^ Na kisina, “bilumbu.”
^ Ziku bo vandaka kusadila bimatilu yai sambu na kutanga ngunga, bonso na kisadilu ya bo ke sadilaka sambu na kuzabisa ngunga na nsadisa ya ntangu.
^ To “nzo ya ntotila.”
^ To “wilaka.”
^ To “nzo ya ntotila.”
^ To “nzo ya ntotila.”
^ To “nzo ya ntotila.”
^ To “kieleka.”
