2 Bantotila 22:1-20
22 Yoziasi+ vandaka ti bamvula nana ntangu yandi kumaka ntotila, mpi yandi yalaka bamvula 31 na Yeruzalemi.+ Zina ya mama na yandi Yedida mwana ya Adaya muntu ya Boskati.+
2 Yandi salaka mambu ya mbote na meso ya Yehowa mpi yandi tambulaka na banzila yonso ya nkaka na yandi Davidi;+ yandi kwendaka ve na diboko ya kitata to na diboko ya kimama.
3 Na mvula ya 18 ya ntotila Yoziasi, ntotila tindaka sekretere Shafani, mwana ya Asalia mwana ya Meshulami, na nzo ya Yehowa+ mpi tubaka nde:
4 Kwenda na nganga-nzambi ya nene Hilkia,+ mpi bika yandi kutika mbongo yonso yina bo ke nata na nzo ya Yehowa,+ mbongo yina bankengidi ya bakielo me baka na maboko ya bantu.+
5 Bo fwete pesa yo na bantu yina bo tulaka sambu na kutwadisa kisalu na nzo ya Yehowa, ebuna bantu yina ta pesa yo na bantu ya ke sala kisalu na nzo ya Yehowa, bayina fwete yidika bisika ya kubeba ya nzo,+
6 disongidila na bantu yina ke salaka bisalu ya maboko, na bantu yina ke tungaka, mpi na bamaso; mpi bo fwete sadila yo sambu na kusumba mabaya mpi matadi ya bo me zenga sambu na kuyidika nzo.+
7 Kansi bo fwete lomba bo ve bankonti sambu na mbongo yina bo ke pesa bo, sambu bo kele bantu ya me fwana na kutudila ntima.”+
8 Na nima, nganga-nzambi ya nene Hilkia tubilaka sekretere+ Shafani nde: “Mono me mona mukanda ya Nsiku+ na nzo ya Yehowa.” Ebuna Hilkia pesaka mukanda yina na Shafani, ebuna Shafani yantikaka kutanga yo.+
9 Na nima sekretere Shafani kwendaka na ntotila mpi songaka yandi nde: “Bansadi na nge me baka mbongo yina bo monaka na nzo, mpi bo me pesa yo na bantu yina bo tulaka sambu na kutwadisa kisalu na nzo ya Yehowa.”+
10 Sekretere Shafani songaka mpi ntotila nde: “Nganga-nzambi Hilkia me pesa mono mukanda mosi.”+ Ebuna Shafani yantikaka kutanga yo na ntwala ya ntotila.
11 Ntangu ntotila waka bangogo ya mukanda yina ya Nsiku, yandi pasulaka bilele na yandi.+
12 Ebuna ntotila songaka nganga-nzambi Hilkia, Ahikami+ mwana ya Shafani, Akbore mwana ya Mikaya, sekretere Shafani, mpi Asaya nsadi ya ntotila nde:
13 “Beno kwenda, beno yula Yehowa sambu na mono, sambu na bantu, mpi sambu na Yuda ya mvimba na yina me tala mambu ya kele na mukanda yai ya bo me mona; sambu Yehowa me wila beto makasi ya ngolo,+ sambu ba-nkaka na beto zitisaka ve mambu ya kele na mukanda yai mpi bo zitisaka ve mambu yonso yina bo me sonikaka sambu na beto.”
14 Yo yina nganga-nzambi Hilkia, Ahikami, Akbore, Shafani, mpi Asaya kwendaka na mbikudi ya nkento Hulda.+ Yandi vandaka nkento ya Shalumi mwana ya Tikva mwana ya Arhasi, muntu yina ke talaka kisika ya kubumba bilele, mpi yandi vandaka kuzinga na Ndambu ya Mpa ya Yeruzalemi; ebuna bo solulaka ti yandi kuna.+
15 Yandi tubilaka bo nde: “Yehowa Nzambi ya Izraele me tuba nde, ‘Beno songa muntu yina me tinda beno na mono nde:
16 “Yehowa me tuba nde, ‘Mono ta natila kisika yai mpi bantu na yo mpasi, disongidila mambu yonso ya kele na mukanda yina ntotila ya Yuda me tanga.+
17 Sambu bo me yambula mono mpi bo ke yoka bimenga sambu na banzambi ya nkaka+ sambu na kupesa mono makasi na kisalu yonso ya maboko na bo,+ mono ta wila kisika yai makasi mpi yo ta mana ve.’”+
18 Kansi sambu na ntotila ya Yuda yina tindaka beno na kuyula Yehowa, beno fwete tubila yandi nde, “Yehowa Nzambi ya Izraele me tuba nde: ‘Sambu na mambu yina nge me wa,
19 sambu ntima na nge vandaka bulemfu* mpi nge kudikulumusaka+ na ntwala ya Yehowa ntangu nge waka mambu yina mono tubaka sambu na kisika yai mpi bantu na yo—nde bo ta kuma kima ya ke pesa boma mpi lusingu—ebuna nge pasulaka bilele na nge+ mpi nge dilaka na ntwala na mono, mono mpi me wa nge, Yehowa muntu me tuba.
20 Yo yina mono ta vukisa nge ti ba-nkaka na nge,* mpi bo ta zika nge na maziamu na nge na ngemba, mpi meso na nge ta mona ve mpasi yonso yina mono ta nata na kisika yai.’”’” Ebuna bo kwisaka kuzabisa ntotila mambu yina.
