2 Bantotila 25:1-30
25 Na mvula ya uvwa ya luyalu ya Sidikiya, na ngonda ya kumi, na kilumbu ya kumi ya ngonda, Nebukadenezare+ ntotila ya Babilone kwisaka ti basoda na yandi yonso sambu na kunwanisa Yeruzalemi.+ Yandi tulaka camp sambu na kunwanisa yo mpi yandi tungaka kibaka na nziunga na yo,+
2 mpi bo ziungaka mbanza yina tii na mvula ya 11 ya ntotila Sidikiya.
3 Na kilumbu ya uvwa ya ngonda ya iya, nzala vandaka ngolo+ na mbanza, mpi bantu ya insi+ vandaka ve ti madia.
4 Bo tobulaka kibaka ya mbanza,+ mpi basoda yonso tinaka na mpimpa na nzila ya kielo yina vandaka na kati-kati ya bibaka zole yina vandaka pene-pene ya masamba ya ntotila, mpi bantu ya Kaldea ziungaka mbanza; ebuna ntotila kwendaka na nzila ya Araba.+
5 Kansi basoda ya Kaldea landaka ntotila, mpi bo kangaka yandi na ntoto ya zelo na zelo ya Yeriko, ebuna basoda na yandi yonso panzanaka mpi tinaka yandi.
6 Na nima bo kangaka ntotila,+ bo nataka yandi na ntotila ya Babilone na Ribla, mpi bo zengilaka yandi nkanu.
7 Bo fwaka bana ya Sidikiya na meso na yandi; ebuna Nebukadenezare tobulaka Sidikiya meso, kangisaka yandi miniololo ya kwivre, mpi nataka yandi na Babilone.+
8 Na ngonda ya tanu, na kilumbu ya nsambwadi ya ngonda, disongidila, na mvula ya 19 ya ntotila Nebukadenezare ntotila ya Babilone, Nebuzaradani+ mfumu ya bantu yina ke taninaka ntotila, nsadi ya ntotila ya Babilone, kwisaka na Yeruzalemi.+
9 Yandi yokaka nzo ya Yehowa,+ nzo ya ntotila,+ mpi banzo yonso ya Yeruzalemi tiya;+ yandi yokaka mpi banzo ya bantu yonso ya lukumu tiya.+
10 Mpi basoda yonso ya Kaldea yina vandaka ti mfumu ya bantu yina ke taninaka ntotila bwisaka bibaka yina vandaka kuziunga Yeruzalemi.+
11 Nebuzaradani mfumu ya bantu yina ke taninaka ntotila nataka bantu yina bikalaka na mbanza, bantu yina tinaka mpi kwendaka na ntotila ya Babilone, mpi bantu ya nkaka yina bikalaka.+
12 Kansi mfumu ya bantu yina ke taninaka ntotila bikisaka bantu ya nkaka ya insi yina, bayina vandaka bansukami ya ngolo sambu bo vanda bantu ya ke salaka bilanga ya vinu mpi bantu ya bo ke pusaka na kusala bisalu ya ngolo.+
13 Ebuna bantu ya Kaldea zengaka bitini-bitini makunzi ya kwivre+ ya nzo ya Yehowa, bapusu-pusu,+ mpi Nzadi-Mungwa ya kwivre+ yina vandaka na nzo ya Yehowa, ebuna bo nataka kwivre yina na Babilone.+
14 Bo bakaka mpi mabungu ya kutudila putulu ya tiya, bapawu, bima ya kufwila tiya, makopa, mpi bisadilu yonso ya kwivre yina bo vandaka kusadila na kisalu ya tempelo.
15 Mfumu ya bantu yina ke taninaka ntotila bakaka bima ya kunatila tiya mpi babolo yina bo salaka na wolo+ ya kieleka mpi na arza+ ya kieleka.
16 Kansi makunzi zole, Nzadi-Mungwa, mpi bapusu-pusu yina Salomo salaka sambu na nzo ya Yehowa, mpila ya kutesa kilo ya kwivre ya bima yai yonso vandaka ve.+
17 Nda ya konso dikunzi katuka na ntoto tii na zulu vandaka maboko* 18,+ mpi kima yina vandaka bonso nkalu na nsongi na yo vandaka ya kwivre; nda ya kima yina vandaka maboko tatu; mpi muyungulu ti bagrenade yina vandaka na nziunga ya kima yina ya vandaka bonso nkalu, bo salaka yo na kwivre.+ Dikunzi ya zole ti muyungulu na yo vandaka kiteso mosi ti yo.
18 Mfumu ya bantu yina ke taninaka ntotila bakaka mpi Seraya+ mfumu ya banganga-nzambi, Sefania+ nganga-nzambi ya zole, mpi bankengidi yonso tatu ya bakielo.+
19 Na mbanza, yandi bakaka kapita mosi ya nzo ya ntotila yina vandaka kutwadisa basoda, bandongisi tanu ya ngolo ya ntotila yina bo monaka na mbanza, sekretere ya mfumu ya basoda, muntu yina vandaka kuvukisa bantu ya insi sambu na kisalu ya kisoda, mpi bantu 60 na kati ya bantu ya kukonda mfunu ya insi yina bo monaka na mbanza.
20 Nebuzaradani+ mfumu ya bantu yina ke taninaka ntotila bakaka bo mpi nataka bo na ntotila ya Babilone na Ribla.+
21 Ntotila ya Babilone bedisaka bo mpi fwaka bo na Ribla na insi ya Amati.+ Yina mutindu bo katulaka Yuda na insi na yandi mpi nataka yandi na insi ya nzenza.+
22 Nebukadenezare ntotila ya Babilone tulaka Gedalia+ mwana ya Ahikami+ mwana ya Shafani+ sambu na kutwadisa bantu yina yandi bikisaka na insi ya Yuda.+
23 Ntangu bamfumu yonso ya basoda ti bantu na bo waka nde ntotila ya Babilone me sola Gedalia, na mbala mosi bo kwisaka na Mispa kisika Gedalia vandaka. Bantu yango bo yai: Ismaele mwana ya Netania, Yohanani mwana ya Karea, Seraya mwana ya Tanumeti muntu ya Netofa, mpi Yaazania mwana ya muntu ya Maakati, ti bantu na bo.+
24 Gedalia diaka ndefi na ntwala na bo ti ya bantu na bo mpi tubilaka bo nde: “Beno wa boma ve na kuvanda bansadi ya bantu ya Kaldea. Beno zinga na insi yai mpi beno sadila ntotila ya Babilone, ebuna mambu ta kwendila mbote sambu na beno.”+
25 Mpi na ngonda ya nsambwadi, Ismaele+ mwana ya Netania mwana ya Elishama, yina vandaka na dibuta ya kimfumu,* kwisaka ti bantu kumi ya nkaka, ebuna bo bulaka Gedalia mpi yandi fwaka, kumosi ti Bayuda mpi bantu ya Kaldea yina vandaka ti yandi na Mispa.+
26 Na nima, bantu yonso, yantika na bantu ya kukonda mfunu tii na bantu ya mfunu mpi bamfumu ya basoda, bo telamaka mpi bo kwendaka na Ezipte,+ sambu bo vandaka kuwa bantu ya Kaldea+ boma.
27 Ebuna na mvula yina Yehoyakini+ ntotila ya Yuda lungisaka bamvula 37 na insi ya nkaka, na ngonda ya 12, na kilumbu ya 27 ya ngonda yina, Evile-merodaki ntotila ya Babilone, na mvula yina yandi kumaka ntotila, basisaka* Yehoyakini ntotila ya Yuda na boloko.+
28 Yandi tubilaka yandi na mawete yonso mpi yandi tulaka kiti na yandi ya kimfumu na zulu kibeni kuluta bakiti ya kimfumu ya bantotila ya nkaka yina vandaka ti yandi na Babilone.
29 Yo yina Yehoyakini katulaka bilele na yandi ya boloko, mpi yandi vandaka kudia mbala na mbala na ntwala na yandi bilumbu yonso ya luzingu na yandi.
30 Bo vandaka kupesa yandi mbala na mbala madia yina vandaka kukatuka na ntotila, konso kilumbu, bilumbu yonso ya luzingu na yandi.
Banoti na nsi ya lutiti
^ Diboko mosi kele basantimetre 44,5. Tala Bangindu ya Ngika B14.
^ Na kisina, “nkuna ya kimfumu.”
^ Na kisina, “tombulaka ntu ya.”
