2 Bantotila 7:1-20
7 Ebuna Elisha tubaka nde, “Beno wa mambu yina Yehowa ke tuba. Yehowa ke tuba nde: ‘Mbasi na ntangu yai, na kielo* ya Samaria, ntalu ya seya* mosi ya fufu ya kitoko ta kuma shekele* mosi, mpi ntalu ya baseya zole ya orze ta kuma shekele mosi.’”+
2 Ebuna soda yina ntotila vandaka kutudila ntima tubilaka muntu ya Nzambi ya kieleka nde: “Ata kana Yehowa fwete kangula bakielo ya zulu, keti diambu* yai lenda salama?”+ Yandi tubaka nde: “Nge ta mona yo na meso na nge,+ kansi nge ta dia yo ve.”+
3 Kuvandaka ti bantu iya ya maladi ya lepre na munoko ya mbanza,+ ebuna bo tubaka bo na bo nde: “Sambu na nki beto me vanda awa tii kuna beto ta fwa?
4 Kana beto tuba nde, ‘Beto kota na mbanza,’ sambu nzala kele na mbanza,+ beto ta fwa kuna. Mpi kana beto vanda awa, beto ta fwa kaka. Yo yina beto kwenda kukota na camp ya bantu ya Siria. Kana bo bikisa beto na luzingu, beto ta zinga, kansi kana bo fwa beto, beto ta fwa.”
5 Ebuna bo telamaka na nkokila mpi bo kotaka na camp ya bantu ya Siria. Ntangu bo kumaka na bandilu ya camp ya bantu ya Siria, muntu mosi ve vandaka kuna.
6 Yehowa salaka nde camp ya bantu ya Siria kuwa makelele ya bapusu-pusu ya bitumba mpi makelele ya bampunda, makelele ya basoda mingi.+ Yo yina bo tubaka bo na bo nde: “Ntotila ya Izraele me futa bantotila ya bantu ya Heti ti bantotila ya Ezipte sambu na kukwisa kunwanisa beto!”
7 Bo telamaka na mbala mosi mpi bo tinaka na nkokila, ebuna bo bikaka batenta na bo, bampunda na bo ya bitumba, bampunda na bo ya fioti, mpi camp ya mvimba kaka mutindu yo vandaka, ebuna bo tinaka sambu na kugulusa luzingu* na bo.
8 Ntangu bantu yina ya maladi ya lepre kumaka na bandilu ya camp, bo kotaka na tenta mosi mpi yantikaka kudia ti kunwa. Bo bakaka arza, wolo, ti bilele kuna, ebuna bo kwendaka mpi bumbaka yo. Na nima, bo vutukaka, bo kotaka na tenta ya nkaka mpi bakaka bima kuna, ebuna bo kwendaka mpi bumbaka yo.
9 Nsuka-nsuka, bo tubaka nde: “Mambu ya beto ke sala kele mbote ve. Yai kele kilumbu ya nsangu ya mbote! Kana beto kele na keti-keti mpi kana beto kinga tii na suka, bo ta pesa beto ndola. Ntangu yai, beto kwenda kuzabisa mambu yai na nzo ya ntotila.”
10 Yo yina bo kwendaka mpi bo bingaka bankengidi ya bakielo ya mbanza na ndinga ya ngolo mpi bo tubilaka bo nde: “Beto kotaka na camp ya bantu ya Siria, kansi muntu mosi ve vandaka kuna—beto me wa ve ndinga ata ya muntu mosi. Kuvandaka kaka ti bampunda ya bitumba mpi bampunda ya fioti ya bo me kanga, mpi batenta vandaka kaka mutindu yina.”
11 Na mbala mosi bankengidi ya bakielo tubaka na ndinga ya ngolo, ebuna bo zabisaka yo na nzo ya ntotila.
12 Na mbala mosi ntotila telamaka na mpimpa mpi tubilaka bansadi na yandi nde: “Bika mono songa beno mambu yina bantu ya Siria me sala beto. Bo me zaba nde beto kele na nzala,+ yo yina bo me bikisa camp mpi bo me bumbana na nseke, bo ke tuba nde, ‘Bo ta basika na mbanza, mpi beto ta kanga bo ya moyo mpi ta kota na mbanza.’”+
13 Ebuna nsadi na yandi mosi tubaka nde: “Pardo, bika nde ndambu ya bantu kubaka bampunda tanu na kati ya bampunda ya me bikala na mbanza. Bo ta suka bonso kimvuka yonso ya bantu ya Izraele yina me bikala awa. Bo ta suka bonso kimvuka yonso ya bantu ya Izraele yina fwaka. Beto tinda bo mpi beto tala.”
14 Yo yina bo bakaka bapusu-pusu zole ti bampunda, ebuna ntotila tindaka bo na camp ya bantu ya Siria mpi tubaka nde: “Beno kwenda mpi beno tala.”
15 Bo landaka bo tii na Yordani, mpi nzila ya mvimba vandaka ya kufuluka ti bilele mpi bisadilu yina bantu ya Siria losaka ntangu bo vandaka kutina na boma. Binati-nsangu vutukaka mpi songaka ntotila mambu yina.
16 Na nima bantu basikaka mpi bo bakaka bima na camp ya bantu ya Siria; mpidina seya mosi ya fufu ya kitoko kumaka shekele mosi, mpi ntalu ya baseya zole ya orze kumaka shekele mosi, kaka mutindu Yehowa tubaka.+
17 Ntotila bakaka soda yina yandi vandaka kuyekamina mpi tulaka yandi mfumu ya kielo, kansi bantu niata-niataka yandi na kielo mpi yandi fwaka, kaka mutindu muntu ya Nzambi ya kieleka songaka ntotila ntangu ntotila kwisaka kisika yandi vandaka.
18 Yo salamaka kaka mutindu muntu ya Nzambi ya kieleka tubilaka ntotila: “Baseya zole ya orze ta kuma shekele mosi, mpi seya mosi ya fufu ya kitoko ta kuma shekele mosi mbasi na ntangu yai na kielo ya Samaria.”+
19 Kansi soda yina tubilaka muntu ya Nzambi ya kieleka nde: “Ata kana Yehowa fwete kangula bakielo ya zulu, keti diambu yai* lenda salama?” Ebuna Elisha tubaka nde: “Nge ta mona yo na meso na nge, kansi nge ta dia yo ve.”
20 Mambu yina kuminaka yandi kibeni, sambu bantu niata-niataka yandi na kielo mpi yandi fwaka.
Banoti na nsi ya lutiti
^ To “bazandu.”
^ Seya mosi kele balitre 7,33. Tala Bangindu ya Ngika B14.
^ Shekele mosi kele bagrame 11,4. Tala Bangindu ya Ngika B14.
^ Na kisina, “ngogo.”
^ To “mioyo.”
^ Na kisina, “ngogo ya mutindu yai.”
