2 Bantotila 8:1-29
8 Elisha tubilaka nkento yina yandi vutulaka mwana na yandi ya bakala na luzingu nde:+ “Telama mpi kwenda, nge ti bantu ya nzo na nge, mpi zinga bonso munzenza konso kisika yina nge lenda zinga, sambu Yehowa me tuba nde nzala ta vanda,+ mpi yo ta kota na insi yai bamvula nsambwadi.”
2 Yo yina nkento yina telamaka mpi salaka mambu yina muntu ya Nzambi ya kieleka tubaka. Yandi kwendaka ti bantu ya nzo na yandi mpi yandi zingaka na insi ya bantu ya Filistia+ bamvula nsambwadi.
3 Na nsuka ya bamvula nsambwadi, nkento yina katukaka na insi ya bantu ya Filistia mpi vutukaka, ebuna yandi kwendaka na ntotila sambu na kulomba nzo na yandi mpi kilanga na yandi.
4 Na ntangu yina, ntotila vandaka kusolula ti Gehazi nsadi ya muntu ya Nzambi ya kieleka nde: “Pardo, tela mono mambu yonso ya nene yina Elisha me salaka.”+
5 Ntangu yandi vandaka kusonga ntotila mutindu Elisha vutulaka mwana yina fwaka na luzingu,+ nkento yina yandi vutulaka mwana na yandi na luzingu kwisaka na ntotila sambu na kulomba nzo na yandi mpi kilanga na yandi.+ Na mbala mosi Gehazi tubaka nde: “Mfumu na mono ntotila, nkento yango yandi yai, mpi yai mwana na yandi, yina Elisha vutulaka na luzingu.”
6 Ebuna ntotila yulaka nkento yina, mpi yandi telaka yandi disolo yina. Na nima ntotila pesaka yandi kapita mosi ya nzo na yandi mpi songaka yandi nde: “Vutudila yandi bima na yandi yonso ti bambuma yonso ya kilanga na yandi yantika kilumbu yina yandi katukaka na insi yai tii bubu yai.”
7 Elisha kwendaka na Damasi+ ntangu Bene-adadi+ ntotila ya Siria vandaka kubela. Yo yina bo songaka yandi nde: “Muntu ya Nzambi ya kieleka+ me kwisa awa.”
8 Ebuna ntotila tubilaka Azaele+ nde: “Baka dikabu, mpi kwenda kukutana ti muntu ya Nzambi ya kieleka.+ Yula Yehowa na nzila na yandi nde, ‘Keti mono ta beluka na maladi yai?’”
9 Azaele kwendaka kukutana ti yandi mpi yandi nataka dikabu, bima ya Damasi ya kitoko ya mitindu yonso, yina bashamo 40 lenda nata. Yandi kwisaka, telamaka na ntwala na yandi, mpi tubaka nde: “Mwana na nge, Bene-adadi ntotila ya Siria, me tinda mono na nge sambu na kuyula nde, ‘Keti mono ta beluka na maladi yai?’”
10 Elisha vutudilaka yandi nde: “Kwenda kusonga yandi nde, ‘Nge ta beluka kibeni,’ kansi Yehowa me songa mono nde yandi ta fwa kibeni.”+
11 Ebuna Elisha landaka kutala yandi tii kuna yandi waka nsoni. Ebuna muntu ya Nzambi ya kieleka yantikaka kudila.
12 Azaele yulaka nde: “Sambu na nki mfumu na mono ke dila?” Yandi vutulaka nde: “Sambu mono ke zaba mbi yina nge ta sala bantu ya Izraele.+ Nge ta yoka bisika na bo ya ngolo tiya, nge ta fwa bantu na bo ya ngolo na mbele ya bitumba, nge ta zenga bana na bo bitini-bitini, mpi nge ta pasula mavumu ya bankento na bo yina kele na mavumu.”+
13 Azaele tubaka nde: “Inki mutindu nsadi na nge, yina kele mbwa ya mpamba, lenda sala diambu yai?” Kansi Elisha tubaka nde: “Yehowa me songa mono nde nge ta kuma ntotila ya Siria.”+
14 Na nima, yandi bikisaka Elisha mpi vutukaka na mfumu na yandi; mfumu na yandi tubilaka yandi nde: “Elisha me tubila nge inki?” Yandi vutulaka nde: “Yandi me songa mono nde nge ta beluka kibeni.”+
15 Kansi kilumbu yina landaka, Azaele bakaka bulakenti, dindisaka yo na masa, mpi yandi kangisaka* yo na luse ya ntotila tii kuna yandi fwaka.+ Ebuna Azaele kumaka ntotila na kisika na yandi.+
16 Na mvula ya tanu ya Yehorami+ mwana ya Ahabi ntotila ya Izraele, ntangu Yehoshafati vandaka ntotila ya Yuda, Yehorami+ mwana ya ntotila Yehoshafati ya Yuda kumaka ntotila.
17 Yandi vandaka ti bamvula 32 ntangu yandi kumaka ntotila, mpi yandi yalaka bamvula nana na Yeruzalemi.
18 Yandi tambulaka na nzila ya bantotila ya Izraele,+ kaka mutindu bantu ya nzo ya Ahabi salaka,+ sambu mwana ya Ahabi kumaka nkento na yandi;+ mpi yandi landaka kusala mambu ya mbi na meso ya Yehowa.+
19 Kansi Yehowa zolaka ve kufwa Yuda sambu na Davidi nsadi na yandi,+ sambu yandi silaka na kupesa yandi+ ti bana yandi mwinda kimakulu.
20 Na bilumbu na yandi, Edomi kolamaka na Yuda+ mpi kuditudilaka ntotila.+
21 Yo yina Yehorami sabukaka mpi kwendaka na Saire ti bapusu-pusu na yandi yonso, ebuna yandi telamaka na mpimpa mpi bedisaka bantu ya Edomi yina ziungaka yandi ti bakomanda ya bapusu-pusu; ebuna basoda tinaka na batenta na bo.
22 Kansi Edomi me landaka kukolamina Yuda tii bubu yai. Libna+ mpi kolamaka na ntangu yina.
23 Mpi mambu ya nkaka ya Yehorami salaka, yonso yina yandi salaka, keti bo me sonikaka yo ve na mukanda ya bansangu ya bantotila ya Yuda?
24 Nsuka-nsuka Yehorami lalaka sambu na kupema ti ba-nkaka na yandi mpi bo zikaka yandi ti ba-nkaka na yandi na Mbanza ya Davidi.+ Ebuna mwana na yandi Ahazia+ kumaka ntotila na kisika na yandi.
25 Na mvula ya 12 ya Yehorami mwana ya Ahabi ntotila ya Izraele, Ahazia mwana ya Yehorami ntotila ya Yuda kumaka ntotila.+
26 Ahazia vandaka ti bamvula 22 ntangu yandi kumaka ntotila, mpi yandi yalaka mvula mosi na Yeruzalemi. Zina ya mama na yandi Atalia,+ mutekolo* ya Omri+ ntotila ya Izraele.
27 Yandi tambulaka na nzila ya nzo ya Ahabi+ mpi yandi landaka kusala mambu ya mbi na meso ya Yehowa, bonso nzo ya Ahabi, sambu yandi vukanaka ti nzo ya Ahabi na nsadisa ya makwela.+
28 Yo yina yandi kwendaka ti Yehorami mwana ya Ahabi sambu na kunwanisa Azaele ntotila ya Siria na Ramoti-gileadi,+ kansi bantu ya Siria lwadisaka Yehorami.+
29 Yo yina ntotila Yehorami vutukaka na Yizreele+ sambu na kusansa bamputa yina bantu ya Siria lwadisaka yandi na Rama ntangu yandi nwanaka ti Azaele ntotila ya Siria.+ Ahazia mwana ya Yehorami ntotila ya Yuda kwendaka na Yizreele sambu na kutala Yehorami mwana ya Ahabi, sambu bo lwadisaka yandi.*
