2 Piere 2:1-22
2 Kansi, bambikudi ya luvunu kwisaka kubasika mpi na kati ya bantu; mutindu mosi mpi, balongi ya luvunu ta kwisa kubasika na kati na beno.+ Bantu yai ta kotisa na kinsweki yonso tu-mabundu yina ta fwa lukwikilu na beno mpi bo ta buya nkutu munkwa na bo yina sumbaka bo,+ mpi bo ta kudinatila lufwa nswalu.
2 Diaka, bantu mingi ta landa kikalulu na bo ya kusala mambu ya mbi kukonda nsoni,*+ mpi sambu na bo, bantu mingi ta vweza nzila ya kieleka.+
3 Diaka, bo ta yiba beno na lukasi yonso ti bangogo ya luvunu. Kansi, lusambisu na bo, yina bo me kanaka tuka ntama,+ ke sukinina ve, mpi lufwa na bo ke lala ve.+
4 Ya kieleka, Nzambi kudibuyisaka ve na kupesa bawanzio yina salaka disumu ndola,+ kansi yandi losaka bo na Tartare,*+ yandi kangisaka bo miniololo* na mpimpa ya ngolo mpi yandi me bumbaka bo sambu na kusambisa bo.+
5 Yandi kudibuyisaka ve na kupesa ndola na nsi-ntoto ya ntama,+ kansi yandi taninaka Noa, nsamuni ya lunungu,+ ti bantu ya nkaka nsambwadi+ ntangu yandi nokisaka mvula ya ngolo na nsi-ntoto ya bantu yina ke vwezaka Nzambi.+
6 Ntangu yandi kumisaka bambanza yai Sodome ti Gomore putulu ya tiya, yandi bedisaka yo,+ mpidina yandi pesaka bantu yina ke vwezaka Nzambi mbandu ya mambu yina ta kwisa.+
7 Yandi gulusaka Loti,+ muntu ya lunungu, yina vandaka kudiyangisa mingi sambu na mambu ya mbi ya kukonda nsoni* yina bantu ya ke fwaka nsiku vandaka kusala—
8 sambu konso kilumbu, mambu ya ke fwaka nsiku yina muntu yai ya lunungu vandaka kumona mpi kuwa, ntangu yandi vandaka kuzinga na kati na bo, vandaka kupesa moyo* na yandi ya lunungu mpasi.
9 Yo yina, Yehowa* me zaba mutindu ya kukatula bantu ya ke kangamaka na Nzambi na mumekamu,+ mpi mutindu ya kubumba bantu ya kukonda lunungu sambu na kufwa bo na kilumbu ya kusambisa,+
10 mingi-mingi bantu yina ke sosaka kukumisa nitu ya bankaka mvindu+ mpi bayina ke vwezaka kiyeka.*+
Bo ke waka boma ve, bo kele ntu-ngolo, mpi bo ke waka ve boma ya kufinga bantu ya nkembo,
11 kansi bawanzio, ata bo kele ti kikesa mpi ngolo mingi, sambu bo ke zitisaka Yehowa,*+ bo ke fundaka bo ve ti bangogo ya kufinga.
12 Kansi bantu yai, bonso bambisi yina me konda mayele, yina ke salaka mambu kukonda kuyindula, mpi yina ke butukaka sambu bo kanga yo mpi bo fwa yo, ke vwezaka mambu yina bo me zaba ve.+ Mambu ya mbi ya bo ke salaka ta nata bo na lufwa,
13 mpi mpasi yina bo ke mona kele matabisi sambu na mambu na bo ya mbi.
Bo ke waka kiese na kudipesa na luzingu ya biese,+ ata na mwini. Bo kele matono mpi bifu yina ke waka kiese* na malongi na bo ya luvunu ntangu bo ke salaka nkinsi ti beno.+
14 Meso na bo kele ya kufuluka ti bizumba+ mpi bo ke kukaka ve kuyambula kusala masumu, mpi bo ke pukumunaka bantu* yina kele ngolo ve. Ntima na bo me yikanaka na lukasi. Bo kele bana ya bo me singaka.
15 Sambu bo me yambulaka nzila ya kusungama, bo me vilaka nzila. Bo ke landaka nzila ya Balami,+ mwana ya Beore, yina zolaka lufutu ya mambu ya mbi,+
16 kansi bo nganinaka yandi sambu yandi fwaka nsiku.+ Mbisi ya ke nataka kilo mpi ya ke tubaka ve, tubaka na ndinga ya bantu, mpi yo kangaka mbikudi nzila sambu yandi sala ve mambu ya buzoba.+
17 Bo kele ba-nto ya me konda masa, mpi lubungi yina mupepe ya ngolo ke nataka, mpi bo me bumbilaka bo mpimpa ya kuluta ngolo.+
18 Bo ke tubaka mambu ya lulendo mpi ya buzoba. Ntangu bo ke siamisaka banzala ya nitu+ mpi kusala mambu ya mbi kukonda nsoni,* bo ke pukumunaka bayina me katuka kutina bantu yina ke salaka mambu ya mbi.+
19 Na ntangu bo ke sila bo kimpwanza, bo mosi kele bampika ya mambu ya mbi;+ sambu kana muntu mosi me bedisa muntu ya nkaka, muntu yina yandi me bedisa me kuma mpika na yandi.*+
20 Ya kieleka kana na nima ya kutina mvindu ya nsi-ntoto+ na nsadisa ya nzayilu ya sikisiki ya Mfumu mpi Ngulusi Yezu Kristu, bo ke kudipesa diaka na mambu yina kibeni mpi bo ke bika nde yo bedisa bo, nsuka na bo ta kuma mbi kuluta mutindu bo vandaka ntete.+
21 Yo zolaka kuvanda mbote mingi sambu na bo kana bo zabaka ve mbote-mbote nzila ya lunungu na kisika ya kuzaba yo mpi na nima kubikisa nsiku ya santu yina bo pesaka bo.+
22 Mambu yina kingana ya kieleka ke tuba me lungana na bo: “Mbwa me vutukila bima yina yo lukaka, mpi ngulu yina bo yobisaka me vutuka kubaluka na poto-poto.”+
Banoti na nsi ya lutiti
^ Na kisina, “mambu ya poto-poto.” Ntalu-bumbidi ya ngogo ya Kigreki a·selʹgei·a. Tala Bantendula ya Bangogo.
^ Tala Bantendula ya Bangogo.
^ To mbala ya nkaka, “tulaka bo na mabulu.”
^ Na kisina, “mambu ya poto-poto.” Na Kigreki, a·selʹgei·a. Tala Bantendula ya Bangogo.
^ Tala Bantendula ya Bangogo.
^ Tala Bangindu ya Ngika A5.
^ To “ke monaka kimfumu mpamba.”
^ Tala Bangindu ya Ngika A5.
^ To “yina ke kudipesaka ti kiese ya kuluta ndilu.”
^ To “mioyo.”
^ Na kisina, “mambu ya poto-poto.” Ntalu-bumbidi ya ngogo ya Kigreki a·selʹgei·a. Tala Bantendula ya Bangogo.
^ To “kana kima mosi me bedisa muntu, yandi me kuma mpika na yo.”
