2 Samuele 1:1-27
1 Na nima ya lufwa ya Saule, ntangu Davidi vutukaka na nima ya kubedisa* bantu ya Amaleki, Davidi salaka bilumbu zole na Siklagi.+
2 Na kilumbu ya tatu, bakala mosi katukaka na camp ya Saule mpi yandi vandaka ti bilele ya kupasuka-pasuka mpi ti ntoto na ntu. Ntangu yandi kwisaka pene-pene ya Davidi, yandi bwaka na ntoto mpi fukamaka.
3 Davidi yulaka yandi nde: “Nge me katuka na wapi?” Yandi vutulaka nde: “Mono me tina camp ya Izraele.”
4 Davidi yulaka yandi nde: “Pardo, songa mono, mambu me luta nki mutindu?” Ebuna yandi tubaka nde: “Bantu me tina bitumba mpi bantu mingi me bwa mpi me fwa. Nkutu Saule ti mwana na yandi Yonatani me fwa.”+
5 Ebuna Davidi yulaka leke ya bakala yina natilaka yandi nsangu nde: “Nki mutindu nge me zaba nde Saule ti mwana na yandi Yonatani me fwa?”
6 Leke yina ya bakala vutulaka nde: “Kukonda kukana mono vandaka na Ngumba ya Gilboa,+ ebuna mono monaka Saule me yekama na dikonga na yandi, ebuna bapusu-pusu ti bantu yina ke tambusaka bampunda kumaka kisika yandi vandaka.+
7 Ntangu yandi balukaka mpi monaka mono, yandi bingaka mono ebuna mono tubaka nde, ‘Mono yandi yai!’
8 Yandi yulaka mono nde, ‘Nge kele nani?’ Mono vutulaka nde, ‘Mono kele muntu ya Amaleki.’+
9 Ebuna yandi tubaka nde, ‘Pardo, telama pene-pene na mono mpi fwa mono, sambu mono kele na mpasi mingi, kansi mono kele kaka na luzingu.’*
10 Yo yina mono telamaka pene-pene na yandi mpi fwaka yandi,+ sambu mono zabaka nde yandi lenda zinga ve kana yandi bwa ti bamputa yina. Na nima mono bakaka mpu ya kimfumu yina vandaka na ntu na yandi ti mutaku ya diboko yina vandaka na diboko na yandi, mpi mono me nata yo awa na mfumu na mono.”
11 Ebuna Davidi simbaka bilele na yandi mpi pasulaka yo, mpi bantu yonso yina vandaka ti yandi salaka mutindu mosi.
12 Bo tulaka milolo, bo dilaka, mpi bo buyaka madia+ tii na nkokila sambu na Saule, sambu na mwana na yandi Yonatani, sambu na bantu ya Yehowa, mpi sambu na nzo ya Izraele,+ sambu bo fwaka na mbele ya bitumba.
13 Davidi yulaka leke ya bakala yina natilaka yandi nsangu nde: “Nge kele muntu ya wapi?” Yandi tubaka nde: “Mono kele mwana ya munzenza mosi, muntu ya Amaleki.”
14 Ebuna Davidi tubilaka yandi nde: “Sambu na nki nge waka ve boma ya kunangula diboko na nge sambu na kufwa muntu yina Yehowa me tulaka mafuta?”+
15 Yo yina Davidi bingaka leke mosi mpi tubaka nde: “Kwisa mpi bula yandi.” Yandi bulaka yandi, ebuna yandi fwaka.+
16 Davidi tubilaka yandi nde: “Menga na nge kele na zulu ya ntu na nge mosi, sambu munoko na nge mosi me funda nge ntangu nge me tuba nde, ‘Mono me fwa muntu yina Yehowa me tulaka mafuta.’”+
17 Ebuna Davidi yimbaka nkunga yai ya mawa* sambu na Saule ti mwana na yandi Yonatani+
18 mpi tubaka nde bo fwete longa bantu ya Yuda nkunga yai ya mawa ya bo bingaka “Munduki ya Tolo-Tolo,” yina bo me sonikaka na mukanda ya Yashare:+
19 “O Izraele, kitoko me fwa na zulu ya bisika na nge ya kunanguka.+
Bantu ya ngolo me bwa kibeni!
20 Beno tuba yo ve na Gati;+Beno zabisa yo ve na babala-bala ya Ashkeloni,Kana ve bana-bankento ya bantu ya Filistia ta wa kiese,Kana ve bana-bankento ya bantu ya kukonda kuyotisa ta kudikumisa.
21 Beno bangumba ya Gilboa,+Bika nde malulu to mvula kubwila beno ve,Mpi bilanga kubasisa ve makabu ya santu,+Sambu kuna bo bebisaka kitaninu ya bantu ya ngolo,Kitaninu ya Saule ya bo ke tula diaka ve mafuta.
22 Na menga ya bantu ya bo me fwa, na mafuta ya bantu ya ngolo,Munduki ya tolo-tolo ya Yonatani vutukaka ve nima,+Mpi mbele ya bitumba ya Saule vandaka ve kuvutuka kukonda kununga.+
23 Saule ti Yonatani,+ bantu yina bo zolaka mingi mpi bantu ya mfunu mingi na luzingu na bo,Mpi na lufwa, bo kabwanaka ve.+
Bo vandaka ntinu kuluta bango-zulu,+Ngolo kuluta bantambu.+
24 O bana-bankento ya Izraele, beno dila Saule,Yina lwatisaka beno bilele ya mbwaki mingi, ya kitoko mpi ya ntalu,Yina tulaka bima ya wolo ya kukumisa nitu kitoko na bilele na beno.
25 Bantu ya ngolo me bwa kibeni na bitumba!
Yonatani me fwa na zulu ya bisika na nge ya kunanguka!+
26 Mono kele na mawa sambu na nge, mpangi na mono Yonatani,Mono vandaka kuzola nge mingi.+
Zola na nge sambu na mono vandaka ya kuyituka kuluta zola ya bankento.+
27 Bantu ya ngolo me bwa kibeni,Mpi binwaninu ya bitumba me beba!”
Banoti na nsi ya lutiti
^ To “kufwa.”
^ To “sambu moyo na mono ya mvimba kele ntete na kati na mono.”
^ To “nkunga yai ya mafwa.”
