2 Samuele 12:1-31
12 Yo yina Yehowa tindaka Natani+ na Davidi. Yandi kwisaka na yandi+ mpi tubaka nde: “Kuvandaka ti bantu zole na mbanza mosi, mosi vandaka mvwama mpi ya nkaka nsukami.
2 Mvwama vandaka ti mameme mpi bangombe mingi kibeni;+
3 kansi nsukami vandaka na kima ve kaka mwana-dimeme mosi ya fioti ya nkento, yina yandi sumbaka.+ Yandi vandaka kukeba yo, mpi yo vandaka kuyela kisika mosi ti yandi mpi ti bana na yandi. Yo vandaka kudia ndambu ya madia yina yandi vandaka na yo, kunwa na dikopa na yandi, mpi kulala na maboko na yandi. Yo kumaka bonso mwana na yandi ya nkento.
4 Na nima, munzenza mosi kwisaka kutala mvwama yina, kansi mvwama yina bakaka ve ata dimeme to ngombe na yandi mosi sambu na kulambila muntu yina vandaka kusala nzietelo yina kwisaka kutala yandi. Kansi, yandi bakaka mwana-dimeme ya nsukami yina mpi lambilaka yo muntu yina kwisaka kutala yandi.”+
5 Ebuna Davidi wilaka muntu yina makasi kibeni, mpi yandi tubilaka Natani nde: “Ya kieleka mutindu Yehowa kele na luzingu,+ muntu yina me sala diambu yina fwete fwa!
6 Mpi yandi fwete futa mwana-dimeme yina mbala iya kuluta,+ sambu yandi salaka diambu yai mpi waka ve mawa.”
7 Ebuna Natani tubilaka Davidi nde: “Muntu yango kele nge! Yehowa Nzambi ya Izraele me tuba nde: ‘Mono mosi muntu tulaka nge mafuta sambu na kuvanda ntotila ya Izraele,+ mpi mono gulusaka nge na maboko ya Saule.+
8 Mono vandaka na luzolo ya kupesa nge nzo ya mfumu na nge+ mpi kutula bankento ya mfumu na nge+ na maboko na nge, mpi mono pesaka nge nzo ya Izraele ti ya Yuda.+ Kaka bonso nde yo lungaka ve, mono vandaka na luzolo ya kusala mambu mingi diaka sambu na nge.+
9 Sambu na nki nge vwezaka ndinga ya Yehowa na mutindu nge salaka mambu ya mbi na meso na yandi? Nge fwaka Uria muntu ya Heti na mbele ya bitumba!+ Ebuna nge bakaka nkento na yandi sambu yandi kuma nkento na nge+ na nima ya kufwa bakala na yandi na mbele ya bitumba ya bantu ya Amoni.+
10 Ntangu yai, mbele ya bitumba ta katukaka ve ata fioti na nzo na nge,+ sambu nge me vweza mono na mutindu nge me baka nkento ya Uria muntu ya Heti sambu yandi kuma nkento na nge.’
11 Yehowa me tuba nde: ‘Mono ke natila nge mpasi ya ke katuka na nzo na nge mosi;+ mpi na meso na nge mosi, mono ta baka bankento na nge mpi ta pesa bo na muntu ya nkaka,*+ ebuna yandi ta lala ti bankento na nge na kati-kati ya ntangu.*+
12 Ata nge salaka mambu na kinsweki,+ mono ta sala diambu yai na meso ya Izraele ya mvimba mpi na kati-kati ya ntangu.’”*
13 Ebuna Davidi tubilaka Natani nde: “Mono me sala disumu na ntwala ya Yehowa.”+ Natani vutudilaka Davidi nde: “Yo yina Yehowa me lolula disumu na nge.*+ Nge ta fwa ve.+
14 Ata mpidina, sambu nge me sadila Yehowa mambu kukonda luzitu kibeni na diambu yai, mwana ya bakala yina bo me butila nge ta fwa kibeni.”
15 Na nima, Natani kwendaka na nzo na yandi.
Ebuna Yehowa bulaka mwana yina nkento ya Uria butilaka Davidi, mpi mwana yina belaka.
16 Davidi bondilaka Nzambi ya kieleka sambu na mwana yina. Davidi buyaka madia na ntima mosi mpi yandi vandaka kukota na suku na yandi mpi kulala mpimpa ya mvimba na ntoto.+
17 Yo yina, bankuluntu ya nzo na yandi telamaka pene-pene na yandi mpi sosaka na kutedimisa yandi na ntoto, kansi yandi buyaka mpi vandaka ve kudia ti bo.
18 Na kilumbu ya nsambwadi, mwana yina fwaka, kansi bansadi ya Davidi vandaka kuwa boma sambu na kusonga yandi nde mwana me fwa. Bo tubaka nde: “Ntangu mwana vandaka na luzingu, beto tubilaka yandi, kansi yandi wilaka beto ve. Ebuna nki mutindu beto lenda songa yandi nde mwana me fwa? Yandi lenda sala diambu mosi ya mbi kibeni.”
19 Ntangu Davidi monaka nde bansadi na yandi ke tuba bo na bo na nsi-nsi, yandi bakisaka nde mwana me fwa. Davidi tubilaka bansadi na yandi nde: “Keti mwana me fwa?” Bo vutulaka nde: “Yandi me fwa.”
20 Ebuna Davidi telamaka na ntoto. Yandi yobilaka, pakulaka mafuta,+ lwataka bilele ya nkaka, mpi kwendaka na nzo+ ya Yehowa mpi fukamaka. Na nima, yandi kwendaka na nzo na yandi* mpi lombaka nde bo natila yandi madia, ebuna yandi diaka.
21 Bansadi na yandi yulaka yandi nde: “Sambu na nki nge me sala mambu mutindu yai? Ntangu mwana vandaka na luzingu, nge buyaka madia mpi nge vandaka kaka kudila; kansi kaka ntangu mwana me fwa, nge me telama mpi nge me dia.”
22 Yandi vutulaka nde: “Ntangu mwana vandaka na luzingu, mono buyaka madia+ mpi vandaka kaka kudila sambu mono kuditubilaka nde, ‘Nani me zaba kana Yehowa lenda wila mono mawa mpi kusala nde mwana kuzinga?’+
23 Ntangu yai ya yandi me fwa, sambu na nki mono fwete buya madia? Keti mono lenda vutula yandi na luzingu?+ Mono ta kwenda na yandi,+ kansi yandi ta vutukila mono ve.”+
24 Ebuna Davidi lembikaka nkento na yandi Bat-sheba.+ Yandi kotaka kisika na yandi mpi lalaka ti yandi. Na nima, nkento yina butaka mwana ya bakala, mpi bo pesaka yandi zina Salomo.*+ Yehowa zolaka yandi,+
25 mpi yandi tindaka ndinga na nzila ya mbikudi Natani+ sambu na kupesa yandi zina Yedidia,* sambu na Yehowa.
26 Yoabi landaka kunwanisa Raba+ ya bantu ya Amoni,+ ebuna yandi botulaka mbanza ya kimfumu.+
27 Yo yina Yoabi tindilaka Davidi binati-nsangu mpi tubaka nde: “Mono me nwanisa Raba,+ mpi mono me botula mbanza ya bamasa.*
28 Ntangu yai, vukisa basoda yina me bikala mpi beno sala camp sambu na kunwanisa mbanza yina mpi kubotula yo. Kana ve, mono muntu ta botula mbanza yina, ebuna bo ta pesa mono lukumu sambu na yo.”*
29 Yo yina Davidi vukisaka basoda yonso mpi kwendaka na Raba, nwanisaka yo mpi botulaka yo.
30 Na nima, yandi katulaka mpu ya kimfumu ya Malkami na ntu na yo. Kilo na yo vandaka talanta* mosi ya wolo, ti matadi ya ntalu, ebuna bo tulaka yo na ntu ya Davidi. Yandi bakaka mpi bima mingi kibeni yina bo botulaka+ na mbanza yina.+
31 Ebuna yandi basisaka bantu yina vandaka na kati na yo mpi pesaka bo kisalu ya kupasula matadi, ya kusadila bisadilu ya makasi ya bibende ti masoka ya bibende, mpi ya kubula babriki. Yai mambu yina yandi salaka na bambanza yonso ya bantu ya Amoni. Nsuka-nsuka, Davidi mpi basoda yonso vutukaka na Yeruzalemi.
Banoti na nsi ya lutiti
^ To “na nkweno na nge.”
^ Na kisina, “na meso ya ntangu yai.”
^ Na kisina, “na ntwala ya ntangu.”
^ To “me bika nde disumu na nge kuluta.”
^ To “nzo ya ntotila.”
^ Yo me katuka na ngogo mosi ya Kiebreo ya ke tendula “Ngemba.”
^ Yo ke tendula “Muntu Yina Yah Ke Zolaka Mingi.”
^ Ziku yo ke tubila bamasa mingi ya mbanza.
^ Na kisina, “ebuna bo ta binga zina na mono na zulu na yo.”
^ Talanta mosi kele bakilo 34,2. Tala Bangindu ya Ngika B14.
