2 Samuele 14:1-33
14 Ntangu yai, Yoabi mwana ya Seruya+ bakisaka nde ntima ya ntotila waka nzala ya ngolo ya Absalomi.+
2 Yo yina Yoabi tindaka bantu na Tekoa+ mpi bingaka nkento mosi ya mayele ya bwala yina mpi songaka yandi nde: “Pardo, sala bonso nde nge kele na mafwa, mpi lwata bilele ya mafwa, kansi kupakula ve mafuta.+ Sala mambu bonso nkento yina kele na mafwa sambu na muntu mosi ya me fwaka ntama.
3 Na nima, kota mpi tubila ntotila mutindu yai.” Ebuna Yoabi songaka nkento yina mambu ya kutuba.*
4 Nkento yina ya Tekoa kotaka kisika ntotila vandaka, bwaka luse na ntoto, fukamaka mpi tubaka nde: “O ntotila, sadisa mono!”
5 Ntotila vutudilaka yandi nde: “Inki mambu?” Ebuna yandi tubaka nde: “Mono kele mufwidi, bakala na mono me fwaka.
6 Mono nsadi na nge, mono vandaka ti bana zole ya babakala, mpi bo zole nwanaka na bilanga. Kuvandaka ve ata ti muntu mosi sambu na kukabula bo, ebuna mwana mosi bulaka mwana yina ya nkaka mpi fwaka yandi.
7 Ntangu yai, dibuta ya mvimba me telama sambu na kunwanisa mono nsadi na nge, mpi bo ke tuba nde: ‘Pesa beto mwana yina me fwa mpangi na yandi, sambu beto fwa yandi sambu na luzingu* ya mpangi na yandi yina yandi fwaka,+ ata kana yo ke tendula kufwa muntu yina ta baka kimvwama!’ Bo ke zola kufwa dikala ya tiya ya nsuka yina mono me bikala ti yo* mpi bo bika ve sambu na bakala na mono awa na zulu ya ntoto zina mosi to muntu mosi ya me guluka.”*
8 Ebuna ntotila tubilaka nkento yina nde: “Kwenda na nzo na nge, mpi mono ta pesa ntuma sambu na nge.”
9 Ebuna nkento yina ya Tekoa tubilaka ntotila nde: “O mfumu na mono ntotila, bika nde makambu kubwila mono ti nzo ya tata na mono, kansi ntotila ti kiti na yandi ya kimfumu me sala mbi ve.”
10 Ebuna ntotila tubaka nde: “Kana muntu kutubila nge diaka, natila mono yandi, mpi yandi ta yangisaka nge diaka ve ata fioti.”
11 Kansi nkento yina tubaka nde: “Pardo, bika nde ntotila kuyibuka Yehowa Nzambi na nge, na mpila nde muntu yina ke vutula mbi sambu na menga+ kusala ve mbi mpi kufwa ve mwana na mono.” Ebuna ntotila tubaka nde: “Ya kieleka mutindu Yehowa kele na luzingu,+ ata lunsuki mosi ve ya mwana na nge ta bwa na ntoto.”
12 Ntangu yai nkento yina tubaka nde: “Pardo, bika nde nsadi na nge kutuba diambu mosi na mfumu na mono ntotila.” Ebuna ntotila tubaka nde: “Tuba!”
13 Nkento yina tubaka nde: “Ebuna, sambu na nki nge me yindula na kusala diambu ya mutindu yai na bantu ya Nzambi?+ Ntangu ntotila ke tuba mutindu yai, yandi ke kudikumisa muntu ya me sala mbi, sambu ntotila ke vutula ve mwana na yandi mosi yina bo me kulaka.+
14 Beto ta fwa kibeni mpi ta vanda bonso masa yina bo me tiamuna na ntoto, yina bo lenda lokuta diaka ve. Kansi Nzambi ta fwa ve muntu* mosi, mpi yandi ke tadilaka bikuma yina ke salaka nde muntu ya bo me kula kuvanda ve ntangu yonso muntu yina bo me kula na meso na yandi.
15 Mono me kota sambu na kutuba diambu yai na mfumu na mono ntotila sambu bantu me pesa mono boma. Yo yina nsadi na nge tubaka nde, ‘Pardo, bika mono tubila ntotila. Ziku ntotila ta sala mambu yina mpika na yandi ke lomba.
16 Ntotila lenda wa mpi kugulusa mpika na yandi na maboko ya muntu yina ke sosa kufwa mono ti mwana na mono kaka mosi na dikabu yina Nzambi me pesaka beto.’+
17 Ebuna nsadi na nge tubaka nde, ‘Pardo, bika nde diambu yina mfumu na mono ntotila ke tuba kulembika mono,’ sambu mfumu na mono ntotila kele kaka bonso wanzio ya Nzambi ya kieleka na yina me tala kuswaswanisa mambu ya mbote mpi ya mbi. Bika nde Yehowa kuvanda ti nge.”
18 Ntangu yai ntotila vutudilaka nkento yina nde: “Pardo, kubumbila mono ve ata kima mosi yina mono ke yula nge.” Nkento yina vutulaka nde: “Bika nde mfumu na mono ntotila kutuba.”
19 Ebuna ntotila yulaka nde: “Keti Yoabi muntu tindaka nge na kutuba mambu yai yonso?”+ Nkento yina vutulaka nde: “O mfumu na mono ntotila, ya kieleka mutindu nge* kele na luzingu, yo kele kaka mutindu* mfumu na mono ntotila me tuba, sambu nsadi na nge Yoabi muntu tindaka mono mpi songaka nsadi na nge mambu yai yonso.
20 Nsadi na nge Yoabi me sala diambu yai sambu na kusoba mutindu mambu ke monana, kansi mfumu na mono kele ti mayele bonso ya wanzio ya Nzambi ya kieleka mpi yandi me zaba mambu yonso yina ke salama na insi.”
21 Ebuna ntotila tubilaka Yoabi nde: “Yo kele mbote, mono ta sala diambu yai.+ Kwenda mpi kwisa kuvutula leke yina ya bakala, Absalomi.”+
22 Ebuna Yoabi bwaka luse na ntoto, fukamaka mpi kumisaka ntotila. Yoabi tubaka nde: “Bubu yai nsadi na nge me zaba nde nge me ndima mono, O mfumu na mono ntotila, sambu ntotila me sala mambu yina nsadi na yandi me lomba.”
23 Yo yina Yoabi telamaka, kwendaka na Geshure+ mpi nataka Absalomi na Yeruzalemi.
24 Kansi, ntotila tubaka nde: “Bika nde yandi vutuka na nzo na yandi, kansi yandi lenda mona ve luse na mono.” Ebuna Absalomi vutukaka na nzo na yandi mpi yandi monaka ve luse ya ntotila.
25 Ntangu yai na Izraele ya mvimba, kuvandaka ve ata ti bakala mosi bonso Absalomi ya bo vandaka kukumisa mingi kibeni sambu na kitoko na yandi. Katuka na makulu tii na ntu, yandi vandaka na kifu ve.
26 Ntangu yandi vandaka kuzenga nsuki na yandi—yo vandaka kulomba nde yandi zenga yo na nsuka ya konso mvula sambu yo vandaka kilo mingi sambu na yandi—kizitu ya nsuki na yandi vandaka bashekele* 200 na kutadila ditadi ya ntotila ya kutesila kilo.*
27 Absalomi butaka bana tatu ya babakala+ mpi mwana mosi ya nkento, zina na yandi Tamare. Yandi vandaka nkento mosi ya kitoko kibeni.
28 Absalomi landaka kuzinga na Yeruzalemi bamvula zole ya mvimba, kansi yandi monaka ve luse ya ntotila.+
29 Yo yina Absalomi tindaka bantu na kubinga Yoabi sambu na kutinda yandi na ntotila, kansi Yoabi kwisaka ve na yandi. Yandi tindaka diaka bantu na kubinga yandi, sambu na mbala ya zole, yandi vandaka kaka kubuya kukwisa.
30 Nsuka-nsuka yandi tubilaka bansadi na yandi nde: “Kitini ya ntoto ya Yoabi kele pene-pene ti ya mono, mpi yandi kele ti mwa orze kuna. Beno kwenda mpi beno tula yo tiya.” Yo yina bansadi ya Absalomi tulaka kitini yina ya ntoto tiya.
31 Ebuna Yoabi telamaka mpi kwisaka na nzo ya Absalomi mpi tubilaka yandi nde: “Sambu na nki bansadi na nge me tula kitini ya ntoto na mono tiya?”
32 Absalomi vutudilaka Yoabi nde: “Mono tindilaka nge nsangu yai, ‘Kwisa mpi bika nde mono tinda nge na ntotila sambu na kuyula nde: “Sambu na nki mono me katuka na Geshure+ mpi me kwisa awa? Yo zolaka kuvanda mbote kuluta kana mono bikalaka kuna. Ntangu yai, bika mono mona luse ya ntotila, mpi kana mono kele ti kifu, yandi fwete fwa mono.”’”
33 Ebuna Yoabi kotaka kisika ya ntotila mpi songaka yandi. Na nima yandi bingaka Absalomi, yandi kotaka kisika ya ntotila mpi fukamaka na ntwala na yandi, yandi bwaka luse na ntoto na ntwala ya ntotila. Ebuna ntotila pesaka Absalomi beze.+
Banoti na nsi ya lutiti
^ Na kisina, “tulaka bangogo na munoko ya nkento yina.”
^ To “moyo.”
^ Disongidila, kivuvu ya nsuka sambu na bana.
^ Na kisina, “muntu mosi ya me bikala.”
^ To “moyo.”
^ To “moyo na nge.”
^ To “ata muntu mosi ve lenda kwenda na diboko ya kitata to ya kimama ya mambu yina.”
^ Kiteso ya bakilo 2,3. Tala Bangindu ya Ngika B14.
^ Ziku yo vandaka kitesilu ya kilo yina bo vandaka kubumba na nzo ya ntotila to shekele ya “ntotila” yina vandaka ya kuswaswana ti shekele yina bantu yonso vandaka kusadila.
