2 Samuele 16:1-23
16 Ntangu Davidi lutaka mwa fioti nsongi ya ngumba,+ Siba,+ nsadi ya Mefibosheti,+ vandaka pana sambu na kukutana ti yandi mpi yandi vandaka ti bampunda zole yina vandaka ya kuyidika, mpi na zulu na yo, yo vandaka ti mampa 200, bagato 100 ya bo me sala na bambuma ya vinu, bagato 100 ya bo me sala na bambuma ya nsungi ya mvula,* mpi dibungu mosi ya nene ya vinu.+
2 Ebuna ntotila tubilaka Siba nde: “Sambu na nki nge me nata bima yai?” Siba vutulaka nde: “Bampunda kele sambu bantu ya nzo ya ntotila kutambudila, mampa ti bambuma ya nsungi ya mvula kele sambu baleke ya babakala kudia, mpi vinu kele sambu bantu yina ta lemba na ntoto-makanga kunwa.”+
3 Ntangu yai ntotila tubaka nde: “Ebuna mwana* ya mfumu na nge kele na wapi?”+ Siba tubilaka ntotila nde: “Yandi me bikala na Yeruzalemi, sambu yandi tubaka nde, ‘Bubu yai nzo ya Izraele ta vutudila mono luyalu ya kimfumu ya tata na mono.’”+
4 Ebuna ntotila tubilaka Siba nde: “Tala! Bima yonso ya Mefibosheti kele ya nge.”+ Siba vutulaka nde: “Mono ke fukama na ntwala na nge. Mfumu na mono ntotila, bika nde nge ndima mono.”+
5 Ntangu ntotila Davidi kumaka na Bahurimi, bakala mosi ya dibuta ya nzo ya Saule, zina na yandi Shimei,+ mwana ya Gera, basikaka mpi vandaka kusinga na ndinga ya ngolo ntangu yandi vandaka kupusana.+
6 Yandi vandaka kulosila Davidi mpi bansadi yonso ya ntotila Davidi matadi, kumosi ti bantu yonso mpi babakala ya ngolo yina vandaka na diboko na yandi ya kitata mpi na diboko na yandi ya kimama.
7 Ntangu Shimei vandaka kusinga, yandi vandaka kutuba nde: “Basika, basika, nge muntu ya kele ti mfuka ya menga! Nge muntu ya kukonda mfunu!
8 Yehowa me vutudila nge mfuka yonso ya menga ya nzo ya Saule, yina nge yalaka bonso ntotila na kisika na yandi, kansi Yehowa me pesa kimfumu na maboko ya mwana na nge Absalomi. Ntangu yai, mpasi me kanga nge, sambu nge kele ti mfuka ya menga!”+
9 Ebuna Abishai mwana ya Seruya+ tubilaka ntotila nde: “Sambu na nki mbwa yai ya kufwa+ fwete singa mfumu na mono ntotila?+ Bika mono kwenda mpi mono zenga yandi ntu.”+
10 Kansi ntotila tubaka nde: “Inki mambu beno ti mono, beno bana ya Seruya?+ Beno bika yandi yandi singa mono,+ sambu Yehowa me tubila yandi+ nde, ‘Singa Davidi!’ Ebuna nani fwete tuba nde, ‘Sambu na nki nge ke sala diambu yai?’”
11 Ebuna Davidi tubilaka Abishai ti bansadi na yandi yonso nde: “Tala! Mwana na mono mosi, yina katukaka na nitu na mono mosi, ke sosa luzingu*+ na mono, keti muntu mosi ya Benyamini+ ta sala yo ve kuluta! Beno bika yandi, yandi singa mono, sambu Yehowa songaka yandi na kusinga mono!
12 Mbala ya nkaka Yehowa ta mona mpasi na mono,+ mpi Yehowa ta vutudila mono bumbote na kisika ya kusinga yina bo me tubila mono bubu yai na ndinga ya ngolo.”+
13 Yo yina Davidi ti bantu na yandi vandaka kaka kukulumuka na nzila, ebuna Shimei vandaka kutambula na lweka ya ngumba pene-pene ti yandi, yandi vandaka kusinga na ndinga ya ngolo+ mpi kulosa matadi ti mfututu mingi.
14 Nsuka-nsuka ntotila ti bantu yonso yina vandaka ti yandi kumaka kisika bo vandaka kukwenda ya kulemba, mpi bo pemaka sambu na kubaka ngolo.
15 Na ntangu yina, Absalomi ti bantu yonso ya Izraele kumaka na Yeruzalemi; mpi Ahitofele+ vandaka ti yandi.
16 Ntangu Ushai+ muntu ya Arki,+ nduku ya Davidi,* kotaka kisika Absalomi vandaka, Ushai tubilaka Absalomi nde: “Luzingu ya nda na ntotila!+ Luzingu ya nda na ntotila!”
17 Ebuna Absalomi tubilaka Ushai nde: “Keti zola na nge ya kwikama sambu na nduku na nge yo yai? Sambu na nki nge kwendaka ve ti nduku na nge?”
18 Ushai tubilaka Absalomi nde: “Ve; mono kele na lweka ya muntu yina Yehowa me solaka, bantu yai, mpi bantu yonso ya Izraele. Mono ta bikala ti yandi.
19 Mono ke tuba diaka nde, Mono fwete sadila nani? Keti yo fwete vanda ve mwana na yandi? Kaka mutindu mono sadilaka tata na nge, mono ta sadila nge mpi mutindu yina.”+
20 Na nima, Absalomi tubilaka Ahitofele nde: “Beno pesa mono ndongisila.+ Beto fwete sala nki?”
21 Yo yina, Ahitofele tubilaka Absalomi nde: “Vukisa nitu ti bamakangu ya tata na nge,+ bayina yandi bikaka sambu na kukeba nzo.*+ Ebuna Izraele ya mvimba ta wa nde nge me kudikumisa kima mosi ya nsudi ya mbi sambu na tata na nge, ebuna bantu yina ke pesa nge maboko ta baka kikesa.”
22 Yo yina, bo tedimisaka tenta mosi na zulu ya ludi+ sambu na Absalomi, mpi Absalomi vukisaka nitu ti bamakangu ya tata na yandi+ na meso ya Izraele ya mvimba.+
23 Na bilumbu yina, ndongisila yina Ahitofele+ vandaka kupesa vandaka kumonana bonso* ndinga ya Nzambi ya kieleka. Davidi ti Absalomi vandaka kutadila bandongisila yonso ya Ahitofele mutindu yina.
Banoti na nsi ya lutiti
^ Mingi-mingi bafige, mbala ya nkaka mpi bambuma ya bo ke bingaka dati.
^ To “mutekolo.”
^ To “moyo.”
^ To “muntu yina Davidi ke zabisaka binsweki.”
^ To “nzo ya ntotila.”
^ To “vandaka bonso muntu ya ke yula.”
