2 Samuele 21:1-22
21 Ntangu yai, nzala+ vandaka na bilumbu ya Davidi bamvula tatu ya kulandana, ebuna Davidi yulaka Yehowa, mpi Yehowa tubaka nde: “Mfuka ya menga kele na zulu ya Saule mpi na zulu ya nzo na yandi, sambu yandi fwaka bantu ya Gibeoni.”+
2 Yo yina ntotila bingaka bantu ya Gibeoni+ mpi tubilaka bo. (Nkutu, bantu ya Gibeoni vandaka ve bantu ya Izraele kansi bantu ya Amore+ yina bikalaka, mpi bantu ya Izraele zengaka kieleka na kufwa bo ve,+ kansi Saule sosaka kufwa bo na kikesa na yandi sambu na bantu ya Izraele ti ya Yuda.)
3 Davidi tubilaka bantu ya Gibeoni nde: “Inki mono fwete sala sambu na beno, mpi nki mutindu mono lenda fika masumu, na mpila nde beno sakumuna dikabu ya Yehowa?”
4 Bantu ya Gibeoni tubilaka yandi nde: “Dikambu na beto ti Saule mpi bantu ya nzo na yandi kele ve dikambu ya arza to wolo;+ beto lenda fwa mpi ve muntu na Izraele.” Ebuna yandi tubaka nde: “Mambu yonso yina beno ta tuba, mono ta sala yo sambu na beno.”
5 Bo tubilaka ntotila nde: “Muntu yina fwaka beto mpi kanaka kumanisa beto sambu beto zinga ve konso kisika yina na teritware ya Izraele+—
6 bika nde bo pesa beto bana-babakala nsambwadi na kati ya bana na yandi. Beto ta tula bamvumbi+ na bo yo lela* na ntwala ya Yehowa na Gibea+ ya Saule, muntu yina Yehowa me solaka.”+ Ebuna ntotila tubaka nde: “Mono ta pesa bo na maboko na beno.”
7 Kansi, ntotila wilaka Mefibosheti+ mwana ya Yonatani mwana ya Saule mawa, sambu na ndefi yina Davidi ti Yonatani+ mwana ya Saule, diaka na ntwala ya Yehowa.
8 Yo yina ntotila bakaka Armoni ti Mefibosheti, bana zole ya Rispa,+ mwana ya Aiya yina yandi butilaka Saule, mpi bana tanu ya Mikale*+ mwana ya Saule yina yandi butilaka Adriele+ mwana ya Barzilai muntu ya Mehola.
9 Ebuna yandi pesaka bo na maboko ya bantu ya Gibeoni, mpi bo tulaka bamvumbi na bo yo ke lela na zulu ya ngumba na ntwala ya Yehowa.+ Bo yonso nsambwadi fwaka kumosi; bo fwaka bo na bilumbu ya ntete ya nsungi ya kukatula bima na bilanga, na luyantiku ya nsungi ya kukatula orze.
10 Na nima, Rispa+ mwana ya Aiya bakaka saki mpi tandulaka yo na zulu ya ditadi katuka luyantiku ya nsungi ya kukatula bima na bilanga tii kuna mvula nokilaka bamvumbi yina; yandi bikaka ve nde bandeke ya zulu kubwa na zulu na yo na mwini to bambisi ya mfinda kukwisa pene-pene na yo na mpimpa.
11 Bo songaka Davidi mambu yina Rispa mwana ya Aiya, makangu ya Saule, salaka.
12 Yo yina Davidi kwendaka mpi bakaka mikwa ya Saule ti mikwa ya mwana na yandi Yonatani na maboko ya bantwadisi* ya Yabeshi-gileadi,+ yina yibaka yo na bala-bala ya nene ya Bete-shani, kisika bantu ya Filistia tulaka yo yo lela na kilumbu yina bantu ya Filistia fwaka Saule na Gilboa.+
13 Yandi bakaka mikwa ya Saule ti mikwa ya mwana na yandi Yonatani kuna mpi tombukaka ti yo, ebuna bo vukisaka mpi mikwa ya bantu yina bo fwaka.*+
14 Na nima bo zikaka mikwa yina ya Saule ti ya Yonatani mwana na yandi na insi ya Benyamini na Zela,+ na maziamu ya Kishi,+ tata na yandi. Na nima ya kusala mambu yonso yina ntotila songaka bo, Nzambi waka mambu yina bo lombaka sambu na insi yina.+
15 Bitumba basikaka diaka na kati ya bantu ya Filistia ti Izraele.+ Yo yina Davidi ti bansadi na yandi kulumukaka mpi nwanisaka bantu ya Filistia, kansi Davidi lembaka.
16 Yishbi-benobi, muntu mosi ya dikanda ya Refayimi,+ yina kizitu ya dikonga na yandi ya kwivre vandaka bashekele* 300+ mpi yina vandaka ti mbele ya bitumba ya mpa, kanaka kufwa Davidi.
17 Na mbala mosi, Abishai+ mwana ya Seruya kwisaka kusadisa yandi+ mpi bulaka muntu yina ya Filistia mpi fwaka yandi. Na ntangu yina, bantu ya Davidi diaka ndefi yai na ntwala na yandi: “Nge fwete basika diaka ve ti beto sambu na kunwana!+ Nge fwete fwa ve mwinda ya Izraele!”+
18 Na nima, bitumba basikaka diaka ti bantu ya Filistia+ na Gobi. Na ntangu yina, Sibekai+ muntu ya Usha fwaka Safi, yina vandaka muntu ya dibuta ya Refayimi.+
19 Bitumba basikaka diaka ti bantu ya Filistia+ na Gobi, ebuna Elanani mwana ya Yaare-oregimi muntu ya Betelemi fwaka Goliati muntu ya Gati, yina dikonga na yandi vandaka bonso nti ya bantu yina ke tungaka bilele.+
20 Bitumba basikaka diaka na Gati, kisika muntu mosi ya nda mingi kibeni vandaka, yandi vandaka ti misapi 6 na konso diboko mpi misapi 6 na konso dikulu, na kimvuka misapi 24; yandi mpi vandaka muntu ya dikanda ya Refayimi.+
21 Yandi landaka kusosila Izraele.+ Yo yina Yonatani mwana ya Shimei,+ mpangi ya Davidi, fwaka yandi.
22 Bantu yai iya vandaka bantu ya dikanda ya Refayimi na Gati mpi bo bwaka na maboko ya Davidi mpi na maboko ya bansadi na yandi.+
Banoti na nsi ya lutiti
^ Na kisina, “ta tula bo na mpenza,” disongidila, maboko mpi makulu ya kubukana.
^ To mbala ya nkaka, “Merabi.”
^ To mbala ya nkaka, “bankwa-ntoto.”
^ Na kisina, “tulaka na mpenza.”
^ Kiteso ya bakilo 3,42. Tala Bangindu ya Ngika B14.
