2 Samuele 22:1-51
22 Ebuna Davidi tubaka na Yehowa bangogo ya nkunga yai+ kilumbu yina Yehowa gulusaka yandi na maboko ya bambeni na yandi+ yonso mpi na maboko ya Saule.+
2 Yandi tubaka nde:
“Yehowa kele ditadi na mono, kisika na mono ya ngolo ya lutaninu,+ mpi Muntu yina ke gulusaka mono.+
3 Nzambi na mono kele ditadi na mono,+ mono ke tinaka na yandi,Kitaninu na mono+ mpi kibongo* na mono ya luguluku,* kisika na mono ya mbote ya kubumbana,*+Kisika na mono ya kutinina,+ ngulusi na mono;+ nge muntu yina ke gulusaka mono na mambu ya mubulu.
4 Mono ke binga Yehowa, yina me fwana na kubaka lukumu,Mpi yandi ta gulusa mono na maboko ya bambeni na mono.
5 Bitembo ya lufwa panzaka bima yonso yina kele na nziunga na mono;+Bamvula ya ngolo ya kintulumukina ya bantu ya kukonda mfunu pesaka mono boma.+
6 Bansinga ya Maziamu* ziungaka mono;+Mitambu ya lufwa kangaka mono.+
7 Na mpasi na mono, mono bingaka Yehowa,+Mono landaka kubinga Nzambi na mono.
Ebuna kuna na tempelo na yandi, yandi waka ndinga na mono,Mpi kudila na mono sambu na kulomba lusadisu kumaka na makutu na yandi.+
8 Ntoto yantikaka kunikana mpi kutekita ndambu na ndambu;+Bafondasio ya zulu tekitaka,+Mpi yo nikanaka ndambu na ndambu sambu bo pesaka yandi makasi.+
9 Midinga basikaka na mbombo na yandi mpi tombukaka,Mpi tiya ya ke yokaka basikaka na munoko na yandi;+Makala ya tiya yina vandaka kupela katukaka na yandi.
10 Yandi salaka nde zulu kufumbama ntangu yandi vandaka kukulumuka,+Mpi mpimpa ya ngolo vandaka na nsi ya makulu na yandi.+
11 Yandi mataka na zulu ya sherube+ mpi yandi kwisaka yandi ke pumbuka.
Yandi monanaka na mapapu ya mpeve mosi.*+
12 Na nima yandi tulaka mpimpa na nziunga na yandi bonso kisika ya lutaninu,+Na bamasa ya ndombe mpi matuti ya ndombe.
13 Na nsemo yina vandaka na ntwala na yandi, makala ya tiya pelaka.
14 Ebuna Yehowa yantikaka kungana na zulu,+Muntu ya Kuluta Zulu salaka nde ndinga na yandi kuwakana.+
15 Yandi losaka batolo-tolo na yandi+ mpi panzaka bo;Yandi tindaka nsemo ya nzasi, mpi yandi kumisaka bo kisaka-saka.+
16 Nsi ya nzadi-mungwa kumaka kumonana;+Bafondasio ya ntoto monanaka pwelele na kungana ya Yehowa,Na mpema yina basikaka na mbombo na yandi.+
17 Yandi tandulaka diboko katuka na zulu;Yandi simbaka mono mpi basisaka mono na bamasa ya mudindu.+
18 Yandi gulusaka mono na maboko ya mbeni na mono ya ngolo,+Na maboko ya bantu ya ke mengaka mono, yina vandaka ngolo kuluta mono.
19 Bo nwanisaka mono kilumbu yina mono vandaka na mpasi,+Kansi Yehowa sadisaka mono.
20 Yandi basisaka mono mpi nataka mono na kisika ya lutaninu;*+Yandi gulusaka mono sambu yandi vandaka kuzola mono.+
21 Yehowa ke pesa mono matabisi na kutadila lunungu na mono;+Yandi ke futa mono na kutadila maboko na mono yina me sala mbi ve.*+
22 Sambu mono landaka banzila ya Yehowa,Mono salaka ve mambu ya mbi mpi mono yambulaka ve Nzambi na mono.
23 Balusambisu na yandi yonso+ kele na ntwala na mono;Mono ta yambula ve bansiku na yandi.+
24 Mono ta vanda kaka kukonda kifu+ na ntwala na yandi,Mpi mono ta kuditanina sambu na kusala ve kifu.+
25 Bika nde Yehowa kufuta mono na kutadila lunungu na mono,+Na kutadila mutindu mono me sala ve mbi na meso na yandi.+
26 Na muntu ya kwikama, nge ke salaka mambu na kwikama;+Na muntu ya kukonda kifu mpi ya ngolo, nge ke salaka mambu kukonda kifu;+
27 Na muntu ya bunkete, nge ke kudimonisaka bunkete,+Kansi na muntu ya nioka-nioka, nge ke kudimonisaka mayele.*+
28 Sambu nge ke gulusaka bantu ya kudikulumusa,+Kansi nge ke talaka ve mpi ke ndimaka ve bantu ya lulendo, mpi nge ke kulumusaka bo.+
29 Sambu nge kele mwinda na mono, O Yehowa;+Yehowa muntu ke pesaka nsemo na mpimpa yina ke ziunga mono.+
30 Na lusadisu na nge, mono lenda nwanisa kimvuka ya miyibi;Na ngolo ya Nzambi, mono lenda mata na kibaka.+
31 Nzila ya Nzambi ya kieleka kele ya kukuka;+Mambu ya Yehowa ke tubaka kele bunkete.+
Yandi kele kitaninu sambu na bantu yonso yina ke tinaka na yandi.+
32 Nani kele Nzambi katula Yehowa?+
Mpi nani kele ditadi katula Nzambi na beto?+
33 Nzambi ya kieleka kele nzo na mono ya ngolo,+Mpi yandi ta kumisa nzila na mono ya kukuka.+
34 Yandi ke kumisa makulu na mono bonso ya kabuluku;Yandi ke tedimisa mono na zulu ya bisika ya kunanguka.+
35 Yandi ke longa maboko na mono mutindu ya kunwana bitumba;Maboko na mono lenda konika munduki ya tolo-tolo ya kwivre.
36 Nge ke pesa mono kitaninu na nge ya luguluku,Mpi kudikulumusa na nge ke kumisa mono muntu ya nene.+
37 Nge ke kumisa nzila nene sambu na bitambi na mono;Makulu* na mono ta sietumuka ve.+
38 Mono ta landa bambeni na mono mpi ta manisa bo;Mono ta vutuka ve tii kuna bo ta mana.
39 Mono ta manisa bo mpi ta bedisa bo ebuna bo ta telama ve;+Bo ta bwa na nsi ya makulu na mono.
40 Nge ta pesa mono ngolo ya kunwana bitumba;+Nge ta bwisa bambeni na mono na nsi na mono.+
41 Nge ta sala nde bambeni na mono kutina mono;*+Mono ta sukisa* bantu yina ke mengaka mono.+
42 Bo ke dila sambu na kulomba lusadisu, kansi muntu ya kugulusa bo kele ve;Bo ke dila nkutu na Yehowa, kansi yandi ke pesa bo ve mvutu.+
43 Mono ta tuta bo fioti-fioti bonso mfututu ya ntoto;Mono ta nika bo mpi ta niata-niata bo bonso poto-poto na babala-bala.
44 Nge ta gulusa mono na maboko ya bantu yina ke sosa-sosaka bifu ya bantu na mono.+
Nge ta tanina mono sambu na kuvanda mfumu ya makanda;+Bantu yina mono me zaba ve ta sadila mono.+
45 Banzenza ta kwisa kufukimina mono ti matekita;+Mambu yina bo ta wa sambu na mono ta sala nde bo lemfukila mono.*
46 Banzenza ta lemba nitu;*Bo ta basika na bisika na bo ya ngolo ya lutaninu ti matekita.
47 Yehowa kele na luzingu! Bika nde Ditadi na mono kubaka lukumu!+
Bika nde Nzambi ya ditadi ya luguluku na mono kuvanda na lukumu.+
48 Nzambi ya kieleka ke vutula mbi sambu na mono;+Yandi ke tula bantu na nsi ya makulu na mono;+
49 Yandi ke gulusa mono na maboko ya bambeni na mono.
Nge ke tombula mono na zulu+ ya bantu yina ke nwanisa mono;Nge ke gulusa mono na maboko ya muntu ya mubulu.+
50 Yo yina mono ta pesa nge matondo na kati ya makanda,+ O Yehowa,Mpi mono ta yimba bankunga*+ sambu na kukumisa zina na nge:
51 Yandi ke gulusaka kibeni* sambu na ntotila na yandi;+Yandi ke monisaka zola ya kwikama na muntu yina yandi me tulaka mafuta,Na Davidi mpi na bana* na yandi kimakulu.”+
Banoti na nsi ya lutiti
^ Tala Bantendula ya Bangogo.
^ To “ngulusi na mono ya ngolo.”
^ To “kisika na mono ya kutinina ya kunanguka.”
^ To “Sheole,” disongidila, maziamu ya bantu yonso. Tala Bantendula ya Bangogo.
^ To “ya mupepe.”
^ To “kisika mosi ya nene.”
^ Na kisina, “yina kele bunkete.”
^ To mbala ya nkaka, “ke salaka mambu bonso zoba.”
^ To “Bansafi.”
^ To “Nge ta pesa mono mukongo ya bambeni na mono.”
^ Na kisina, “kanga munoko ya.”
^ Na kisina, “Na kuwa ya dikutu, bo ta lemfukila mono.”
^ To “yuma.”
^ To “ta bula miziki.”
^ To “ke nungisaka kibeni.”
^ Na kisina, “nkuna.”
