2 Samuele 24:1-25
24 Yehowa wilaka diaka Izraele makasi,+ ntangu muntu mosi pusaka Davidi* mpi tubaka nde: “Kwenda, tanga ntalu+ ya bantu ya Izraele mpi ya Yuda.”+
2 Yo yina ntotila tubilaka Yoabi+ mfumu ya basoda yina vandaka ti yandi nde: “Pardo kwenda na makanda yonso ya Izraele, katuka na Dani tii na Bere-sheba,+ mpi sonika bazina ya bantu sambu mono zaba ntalu ya bantu.”
3 Kansi Yoabi tubilaka ntotila nde: “Bika nde Yehowa Nzambi na nge kukumisa bantu mingi mbala 100, mpi bika nde meso ya mfumu na mono ntotila kumona yo, kansi sambu na nki mfumu na mono ntotila ke zola kusala diambu ya mutindu yai?”
4 Kansi ndinga ya ntotila nungaka ndinga ya Yoabi ti ya bamfumu ya basoda. Yo yina Yoabi ti bamfumu ya basoda katukaka na ntwala ya ntotila mpi basikaka sambu na kusonika bazina ya bantu ya Izraele.+
5 Bo sabukaka Yordani mpi tulaka camp na Aroere,+ na ndambu ya diboko ya kitata* ya mbanza na kati-kati ya muwanda, na ndambu ya bana ya Gadi, mpi tii na Yazere.+
6 Na nima, bo kwendaka na Gileadi+ mpi na insi ya Tatimi-odshi, mpi bo landaka kukwenda na Dani-yaani mpi na Sidoni.+
7 Ebuna bo kwendaka na nzo ya ngolo ya Tire+ mpi na bambanza yonso ya bantu ya Hivi+ ti ya bantu ya Kanana, mpi nsuka-nsuka bo kumaka na Negebi+ ya Yuda na Bere-sheba.+
8 Mpidina, bo kwendaka na insi ya mvimba mpi kwisaka na Yeruzalemi na nsuka ya bangonda uvwa ti bilumbu 20.
9 Ebuna Yoabi pesaka ntotila ntalu ya bantu yina yandi sonikaka bazina. Ntalu ya basoda ya Izraele yina vandaka ti bambele ya bitumba kumaka 800 000, mpi bantu ya Yuda vandaka 500 000.+
10 Kansi na nima ya kutanga ntalu ya bantu, Davidi waka mpasi+ na ntima.* Ebuna Davidi tubilaka Yehowa nde: “Mono me sala disumu+ ya nene mutindu mono me sala diambu yai. Ntangu yai, Yehowa, pardo, lolula kifu ya nsadi na nge,+ sambu mono me sala mambu na buzoba kibeni.”+
11 Ntangu Davidi telamaka na suka, ndinga ya Yehowa kwisilaka mbikudi Gadi,+ muntu ya Davidi yina vandaka kumona bambona-meso, nde:
12 “Kwenda kutubila Davidi nde, ‘Yehowa me tuba nde: “Mono ke pesa nge mambu tatu ya kusola. Sola diambu yina mono fwete nata na zulu na nge.”’”+
13 Yo yina Gadi kotaka kisika Davidi vandaka mpi songaka yandi nde: “Keti bamvula nsambwadi ya nzala fwete kota na insi na nge?+ To keti nge fwete tina bambeni na nge bangonda tatu na ntangu bo ta landaka nge?+ To keti bilumbu tatu ya kipupa fwete vanda na insi na nge?+ Ntangu yai, yindula mbote-mbote mvutu yina mono fwete pesa Muntu yina me tinda mono.”
14 Ebuna Davidi tubilaka Gadi nde: “Yo kele mpasi mingi sambu na mono. Pardo, bika beto bwa na maboko ya Yehowa,+ sambu mawa na yandi kele mingi;+ kansi kubika ve nde mono bwa na maboko ya muntu.”+
15 Na nima, Yehowa tindaka kipupa+ na Izraele yantika na suka tii na ntangu yina yandi tulaka, mpi bantu 70 000 fwaka,+ katuka na Dani tii na Bere-sheba.+
16 Ntangu wanzio tandulaka diboko na yandi na ndambu ya Yeruzalemi sambu na kufwa yo, Yehowa waka mawa sambu na mpasi yina+ ebuna yandi tubilaka wanzio yina vandaka kufwa yo nde: “Yo me lunga! Kulumusa diboko na nge ntangu yai.” Wanzio ya Yehowa vandaka pene-pene ya kisika ya Arauna,+ muntu ya Yebusi,+ ya bo ke tutaka bambuma sambu na kukatula yo bampusu.
17 Ntangu Davidi monaka wanzio yina vandaka kufwa bantu, yandi tubilaka Yehowa nde: “Mono muntu me sala disumu, mpi mono muntu me sala mbi; kansi mameme yai+—bo me sala inki? Pardo, bika nde diboko na nge kubula mono mpi nzo ya tata na mono.”+
18 Yo yina Gadi kwisaka na Davidi na kilumbu yina mpi tubilaka yandi nde: “Tombuka, tungila Yehowa mesa-kimenga na kisika ya Arauna, muntu ya Yebusi,+ ya bo ke tutaka bambuma sambu na kukatula yo bampusu.”
19 Ebuna Davidi tombukaka mutindu Gadi tubaka, mutindu Yehowa tubaka.
20 Ntangu Arauna talaka na nsi mpi monaka ntotila ti bansadi na yandi ke kwisa na ndambu na yandi, Arauna basikaka na mbala mosi mpi yandi fukamaka na ntwala ya ntotila luse na ntoto.
21 Arauna yulaka nde: “Sambu na nki mfumu na mono ntotila me kwisa na nsadi na yandi?” Davidi vutulaka nde: “Sambu na kusumba na maboko na nge kisika ya bo ke tutaka bambuma sambu na kukatula yo bampusu sambu na kutungila Yehowa mesa-kimenga, sambu mpasi yina me bwila bantu kumana.”+
22 Kansi Arauna tubilaka Davidi nde: “Bika nde mfumu na mono ntotila kubaka yo mpi kupesa bima yina ke monana mbote na meso na yandi.* Tala bangombe sambu na dikabu ya kuyoka, kima ya bo ke tutaka bambuma sambu na kukatula yo bampusu, mpi bisadilu ya bangombe sambu na kusadila yo bonso bankuni.
23 Bima yai yonso, O ntotila, Arauna ke pesa yo na ntotila.” Ebuna Arauna tubilaka ntotila nde: “Bika nde Yehowa Nzambi na nge kumonisila nge ntima ya mbote.”
24 Kansi, ntotila tubilaka Arauna nde: “Ve, mono fwete sumba yo na mbongo na maboko na nge. Mono ta pesa ve Yehowa Nzambi na mono bimenga ya kuyoka yina mono me futa kima ve.” Yo yina Davidi sumbaka kisika ya bo ke tutaka bambuma sambu na kukatula yo bampusu ti bangombe na bashekele*+ 50 ya arza.
25 Ebuna Davidi tungilaka Yehowa mesa-kimenga+ pana mpi pesaka bimenga ya kuyoka ti bimenga ya kinduku. Yo yina Yehowa waka mambu yina bo lombaka sambu na insi,+ ebuna mpasi yina bwilaka Izraele manaka.
Banoti na nsi ya lutiti
^ To “ntangu bo pusaka Davidi.”
^ To “na sudi.”
^ To “kansansa.”
^ Na kisina, “yina kele mbote na meso na yandi.”
^ Shekele mosi kele bagrame 11,4. Tala Bangindu ya Ngika B14.
