2 Samuele 3:1-39
3 Bitumba vandaka ntangu mingi na kati ya nzo ya Saule ti nzo ya Davidi; ebuna Davidi vandaka kukuma kaka ngolo,+ kansi nzo ya Saule vandaka kaka kulemba.+
2 Na ntangu yina, Davidi butaka bana na Ebroni.+ Mwana na yandi ya ntete vandaka Amnoni+ yina yandi butaka ti Ahinoami+ muntu ya Yizreele.
3 Mwana na yandi ya zole vandaka Kileabi yina yandi butaka ti Abigaile,+ mufwidi ya Nabale muntu ya Karmele; mpi mwana ya tatu vandaka Absalomi+ mwana ya Maaka, mwana ya Talmai+ ntotila ya Geshure.
4 Mwana ya iya vandaka Adoniya+ mwana ya Agiti, mpi mwana ya tanu vandaka Shefatia mwana ya Abitale.
5 Mwana ya sambanu vandaka Yitreami yina Egla nkento ya Davidi butaka. Davidi butaka bana yai na Ebroni.
6 Na ntangu bitumba na kati ya nzo ya Saule ti nzo ya Davidi vandaka kaka kusalama, Abnere+ vandaka kaka kukumisa kiyeka na yandi ngolo na nzo ya Saule.
7 Saule vandaka ti makangu mosi, zina na yandi Rispa,+ mwana ya Aiya. Na nima, Ishe-bosheti+ tubilaka Abnere nde: “Sambu na nki nge vukisaka nitu ti makangu ya tata na mono?”+
8 Abnere waka makasi ya ngolo sambu na mambu yina Ishe-bosheti tubaka, ebuna yandi tubaka nde: “Am Keti mono kele mbwa ya Yuda? Tii bubu yai mono ke monisaka zola ya kwikama na nzo ya Saule tata na nge, na bampangi na yandi mpi na banduku na yandi, mpi mono me tekaka nge ve na maboko ya Davidi; kansi bubu yai nge ke sambisa mono sambu na kifu ya me tala nkento?
9 Bika nde Nzambi kupesa Abnere ndola ya ngolo kana mono sala ve sambu na Davidi mutindu Yehowa zengaka kieleka na ntwala na yandi:+
10 kukatula kimfumu na nzo ya Saule mpi kutula kiti ya kimfumu ya Davidi na zulu ya Izraele mpi na zulu ya Yuda, katuka na Dani tii na Bere-sheba.”+
11 Yandi kukaka ve kutuba diaka ata kima mosi na Abnere sambu yandi vandaka kuwa yandi boma.+
12 Na mbala mosi Abnere tindaka binati-nsangu sambu na kutubila Davidi nde: “Ntoto yai kele ya nani?” Yandi yikaka nde: “Sala kuwakana ti mono, ebuna mono ta sala yonso yina mono lenda sala* sambu na kunata bantu yonso ya Izraele na lweka na nge.”+
13 Ebuna yandi vutulaka nde: “Yo kele mbote! Mono ta sala kuwakana ti nge. Kima kaka mosi ya mono ke lomba nge kele nde kusosa ve kumona luse na mono, katula kaka kana nge nata ntete Mikale,+ mwana ya Saule, ntangu nge ta kwisa kumona mono.”
14 Davidi tindaka binati-nsangu na Ishe-bosheti,+ mwana ya Saule, mpi tubaka nde: “Pesa mono nkento na mono Mikale, yina mono futilaka bampusu 100 ya kibakala ya bantu ya Filistia sambu na kusila yandi na makwela.”+
15 Yo yina, Ishe-bosheti tindaka bantu sambu na kubaka Mikale na bakala na yandi Paltiele,+ mwana ya Layishi.
16 Kansi bakala na yandi vandaka kaka kutambula ti yandi, yandi vandaka kudila ntangu yandi vandaka kulanda yandi tii na Bahurimi.+ Ebuna Abnere tubilaka yandi nde: “Kwenda, vutuka!” Yandi vutukaka.
17 Na ntangu yina, Abnere tindilaka bankuluntu ya Izraele ndinga nde: “Tuka mwa ntangu, beno zolaka nde Davidi kuvanda ntotila na beno.
18 Ntangu yai beno yilama, sambu Yehowa me tubila Davidi nde: ‘Na nzila ya diboko ya Davidi nsadi na mono,+ mono ta gulusa bantu na mono Izraele na maboko ya bantu ya Filistia mpi na maboko ya bambeni na bo yonso.’”
19 Ebuna Abnere solulaka ti bantu ya Benyamini.+ Abnere mpi kwendaka kusolula ti Davidi na kingenga na Ebroni sambu na kusonga yandi mambu yina Izraele mpi nzo ya mvimba ya Benyamini wakanaka.
20 Ntangu Abnere kwisaka na Davidi na Ebroni ti babakala 20, Davidi sadilaka Abnere mpi bantu yina vandaka ti yandi nkinsi.
21 Ebuna Abnere tubilaka Davidi nde: “Bika mono kwenda mpi mono vukisa Izraele ya mvimba kisika mfumu na mono ntotila kele, na mpila nde bo sala kuwakana ti nge, ebuna nge ta kuma ntotila ya bima yonso yina nge me zola.”* Yo yina, Davidi bikaka Abnere nde yandi kwenda, mpi Abnere simbaka nzila mpi kwendaka na ngemba.
22 Ebuna bansadi ya Davidi ti Yoabi katukaka na bitumba mpi kwisaka kuvutuka, bo nataka bima mingi ya bo botulaka na bitumba. Abnere vandaka diaka ve ti Davidi na Ebroni, sambu Davidi bikaka yandi, yandi kwenda na ngemba.
23 Ntangu Yoabi+ mpi basoda yonso yina vandaka ti yandi kumaka, bo songaka Yoabi nde: “Abnere+ mwana ya Nere+ kwisaka na ntotila, mpi ntotila bikaka nde yandi kwenda, ebuna yandi simbaka nzila mpi kwendaka na ngemba.”
24 Yo yina Yoabi kotaka na kisika ya ntotila mpi tubaka nde: “Inki diambu nge me sala? Abnere me kwisa na nge. Sambu na nki nge me bika nde yandi kwenda, ebuna yandi me kwenda kukonda mpasi?
25 Nge me zaba Abnere mwana ya Nere! Yandi me kwisa awa sambu na kukusa nge, sambu na kusosa kuzaba bisika yonso ya nge ke kwendaka, mpi sambu na kuzaba mambu yonso ya nge ke sala.”
26 Yo yina Yoabi bikisaka Davidi mpi tindaka binati-nsangu sambu na kulanda Abnere, ebuna bo kutaka yandi na dibulu ya masa ya Sira mpi kwisaka kuvutula yandi; kansi Davidi zabaka ve ata kima mosi.
27 Ntangu Abnere vutukaka na Ebroni,+ Yoabi nataka yandi na lweka na kati ya kielo sambu na kusolula ti yandi na kingenga. Kansi, kuna yandi bulaka yandi mbele na divumu, ebuna Abnere fwaka;+ yo vandaka sambu yandi fwaka* mpangi na yandi Asaele.+
28 Na nima, ntangu Davidi waka mambu yina, yandi tubaka nde: “Mono ti kimfumu na mono beto me sala mbi ve ata fioti na ntwala ya Yehowa sambu na lufwa+ ya Abnere mwana ya Nere.
29 Bika nde yo vutuka na zulu ya ntu ya Yoabi+ mpi na zulu ya nzo ya mvimba ya tata na yandi. Bika nde nzo ya Yoabi kuvanda ntangu yonso ti muntu ya ke bela sambu masa ke basika yandi,+ to muntu ya maladi ya lepre,+ to bakala yina ke sadilaka muntunga,* to muntu yina ke fwa na mbele ya bitumba, to muntu yina kele na mfunu ya madia!”+
30 Yo yina, Yoabi ti mpangi na yandi Abishai+ fwaka Abnere+ sambu yandi fwaka Asaele mpangi na bo na bitumba+ na Gibeoni.
31 Ebuna Davidi tubilaka Yoabi mpi bantu yonso yina vandaka ti yandi nde: “Beno pasula bilele na beno, beno lwata basaki mpi beno dila Abnere.” Ntotila Davidi yandi mosi vandaka kutambula na nima ya mbeto yina bo tulaka mvumbi.
32 Bo zikaka Abnere na Ebroni; mpi ntotila dilaka na ndinga ya ngolo na maziamu ya Abnere, mpi bantu yonso dilaka.
33 Ntotila yimbaka sambu na Abnere mpi tubaka nde:
“Keti yo lombaka nde Abnere kufwa lufwa ya muntu mosi ya kukonda mayele?
34 Bo kangaka ve maboko na nge,Mpi makulu na nge vandaka ve na kati ya miniololo.*
Nge bwaka bonso muntu yina me bwa na maboko ya bantu ya mbi.”*+
Ebuna bantu yonso dilaka yandi diaka.
35 Na nima, ntangu mwini vandaka ntete, bantu yonso kwisaka kupesa Davidi dimpa sambu na kulembika yandi,* kansi Davidi zengaka kieleka nde: “Bika nde Nzambi kupesa mono ndola ya ngolo kana mono meka kudia dimpa to konso kima yina na ntwala nde ntangu kudinda!”+
36 Bantu yonso monaka mambu yina salamaka mpi yo pesaka bo kiese. Bonso mambu yonso yina ntotila vandaka kusala, yo pesaka bantu yonso kiese.
37 Ebuna bantu yonso mpi Izraele ya mvimba zabaka kilumbu yina nde ntotila vandaka ve na kisina ya lufwa+ ya Abnere mwana ya Nere.
38 Ebuna ntotila tubilaka bansadi na yandi nde: “Keti beno ke zaba ve nde mfumu mosi mpi muntu mosi ya nene me bwa bubu yai na Izraele?+
39 Bubu yai mono me lemba, ata bo tulaka mono mafuta sambu na kuvanda ntotila,+ mpi bantu yai, bana ya Seruya,+ kele nku mingi sambu na mono.+ Bika nde Yehowa kufuta muntu ya ke salaka mambi na kutadila mambi na yandi mosi.”+
Banoti na nsi ya lutiti
^ Na kisina, “ebuna tala! diboko na mono kele ti nge.”
^ To “moyo na nge kele na nzala na yo.”
^ To “sambu na menga ya.”
^ Ziku yo ke tubila bakala ya kele makulu-kifu yina vandaka kusala kisalu ya bankento.
^ Na kisina, “kwivre.”
^ Na kisina, “bana ya kukonda lunungu.”
^ To “dimpa ya mawa.”
