2 Samuele 4:1-12
4 Ntangu Ishe-bosheti+ mwana ya Saule* waka nde Abnere fwaka na Ebroni,+ kikesa na yandi manaka* mpi bantu yonso ya Izraele kumaka kisaka-saka.
2 Kuvandaka ti babakala zole yina vandaka kutwadisa bimvuka ya miyibi ya mwana ya Saule: mosi zina na yandi Baanah mpi ya nkaka Rekabi. Bo vandaka bana ya Rimoni muntu ya Beeroti, ya dikanda ya Benyamini. (Sambu bo vandaka kutanga mpi Beeroti+ na kati ya dikanda ya Benyamini.
3 Bantu ya Beeroti tinaka na Gitayimi,+ mpi bo kele banzenza kuna tii bubu yai.)
4 Yonatani+ mwana ya Saule vandaka ti mwana mosi yina makulu na yandi vandaka ti kifu.*+ Yandi vandaka ti bamvula tanu ntangu nsangu ya Saule mpi ya Yonatani katukaka na Yizreele,+ mpi ndesi na yandi bakaka yandi mpi tinaka, kansi sambu yandi vandaka kutina na boma, mwana yina bwaka mpi kumaka ti kifu na makulu. Zina na yandi Mefibosheti.+
5 Bana ya Rimoni muntu ya Beeroti, Rekabi ti Baanah, kwendaka na nzo ya Ishe-bosheti na ntangu yina mwini ke vandaka ngolo, ntangu Ishe-bosheti vandaka kupema na midi.
6 Bo kotaka na nzo bonso nde bo vandaka kubaka ble, mpi bo bulaka yandi na divumu; ebuna Rekabi ti mpangi na yandi Baanah+ tinaka.
7 Ntangu bo kotaka na nzo, Ishe-bosheti vandaka ya kulala na mbeto na yandi na kati ya suku na yandi ya kulala, ebuna bo bulaka yandi mpi fwaka yandi, mpi bo zengaka yandi ntu. Na nima, bo bakaka ntu na yandi mpi tambulaka ti yo mpimpa ya mvimba na nzila ya ke kwendaka na Araba.
8 Ebuna bo nataka ntu ya Ishe-bosheti+ na Davidi na Ebroni mpi tubilaka ntotila nde: “Tala ntu ya Ishe-bosheti mwana ya Saule mbeni+ na nge yina sosaka luzingu*+ na nge. Bubu yai Yehowa me vutula mbi na Saule mpi na bana na yandi sambu na mfumu na mono ntotila.”
9 Kansi, Davidi pesaka mvutu na Rekabi ti mpangi na yandi Baanah, bana ya Rimoni muntu ya Beeroti, mpi tubilaka bo nde: “Ya kieleka mutindu Yehowa kele na luzingu, yandi muntu yina gulusaka mono* na bampasi yonso,+
10 ntangu muntu mosi kwisaka kusonga mono nde, ‘Saule me fwa,’+ mpi yandi yindulaka nde yandi natilaka mono nsangu ya mbote, mono simbaka yandi mpi fwaka yandi+ na Siklagi. Yina vandaka matabisi yina mono pesaka kinati-nsangu yina!
11 Yo ta vanda ya kuluta kibeni sambu na bantu ya mbi yina me fwa muntu mosi ya lunungu na nzo na yandi mosi na mbeto na yandi! Keti mono fwete lomba ve menga na yandi na maboko na beno+ mpi kukatula beno na ntoto?”
12 Ebuna Davidi songaka baleke ya babakala na kufwa bo.+ Bo zengaka bo maboko ti makulu mpi bo tulaka bo+ bo ke lela pene-pene ya kiziba na Ebroni. Kansi bo bakaka ntu ya Ishe-bosheti mpi zikaka yo na maziamu ya Abnere na Ebroni.
Banoti na nsi ya lutiti
^ Na kisina, “Ntangu mwana ya Saule.”
^ Na kisina, “maboko na yandi lembaka.”
^ To “yina vandaka makulu-kifu.”
^ To “moyo.”
^ Na kisina, “sumbaka diaka moyo na mono.”
