2 Samuele 6:1-23
6 Davidi vukisaka diaka basoda yonso ya kuluta kikesa ya Izraele, babakala 30 000.
2 Ebuna Davidi ti bantu yonso yina vandaka ti yandi kwendaka na Baale-yuda sambu na kubaka Sanduku ya Nzambi ya kieleka+ mpi kutombuka ti yo, Sanduku yina na ntwala na yo bantu ke bingaka zina ya Yehowa ya makesa+ yina me vanda na kiti ya kimfumu na zulu* ya basherube.+
3 Kansi, bo tulaka Sanduku ya Nzambi ya kieleka na pusu-pusu mosi ya mpa+ sambu na kukatula yo na nzo ya Abinadabi+ yina vandaka na zulu ya ngumba ya fioti mpi kunata yo; Uzah ti Ahio, bana ya Abinadabi, vandaka kunata pusu-pusu yina ya mpa.
4 Ebuna bo katulaka Sanduku ya Nzambi ya kieleka na nzo ya Abinadabi na zulu ya ngumba ya fioti mpi nataka yo, mpi Ahio vandaka kutambula na ntwala ya Sanduku.
5 Davidi ti nzo ya mvimba ya Izraele vandaka kuyangalala na ntwala ya Yehowa ti bima ya kubudila miziki ya mutindu na mutindu ya bo salaka ti mabaya ya yenevriye, bakidare, mpi bima ya nkaka ya kubudila miziki ya kele ti bansinga,+ bangoma ya fioti,+ balungongi, mpi basembale.+
6 Kansi ntangu bo kumaka na kisika ya Nakoni ya bo ke tutaka bambuma sambu na kukatula yo bampusu, Uzah tandulaka diboko na yandi na Sanduku ya Nzambi ya kieleka mpi simbaka yo,+ sambu bangombe zolaka kubwisa yo.
7 Yo yina Yehowa wilaka Uzah makasi, mpi Nzambi ya kieleka bulaka yandi+ pana sambu na diambu ya kukonda luzitu yina yandi salaka,+ ebuna yandi fwaka pana na lweka ya Sanduku ya Nzambi ya kieleka.
8 Kansi Davidi waka makasi* sambu Yehowa wilaka Uzah makasi, mpi bo me kumaka kubinga kisika yina Peresi-uzah* tii bubu yai.
9 Yo yina Davidi kumaka kuwa Yehowa boma+ na kilumbu yina mpi tubaka nde: “Inki mutindu Sanduku ya Yehowa lenda kwisa kisika mono kele?”+
10 Davidi buyaka kunata Sanduku ya Yehowa kisika yina yandi vandaka na Mbanza ya Davidi.+ Kansi yandi lombaka nde bo nata yo na nzo ya Obedi-edomi+ muntu ya Gati.
11 Sanduku ya Yehowa bikalaka na nzo ya Obedi-edomi muntu ya Gati bangonda tatu, mpi Yehowa vandaka kusakumuna Obedi-edomi ti bantu yonso ya nzo na yandi.+
12 Bo natilaka ntotila Davidi nsangu nde: “Yehowa me sakumuna nzo ya Obedi-edomi mpi bima na yandi yonso sambu na Sanduku ya Nzambi ya kieleka.” Yo yina, Davidi kwendaka sambu na kubaka Sanduku ya Nzambi ya kieleka na nzo ya Obedi-edomi mpi kunata yo na Mbanza ya Davidi, na kiese.+
13 Ntangu bantu yina vandaka kunata+ Sanduku ya Yehowa tambulaka bitambi sambanu, mbala mosi Davidi tambikaka ngombe ya bakala mpi mbisi ya mafuta.
14 Davidi vandaka kukina mpi kuzieta-zieta na ntwala ya Yehowa na ngolo na yandi yonso; na bantangu yina yonso Davidi lwataka* efodi ya lino.+
15 Davidi ti nzo ya mvimba ya Izraele vandaka kutombuka ti Sanduku+ ya Yehowa ti milolo ya kiese+ mpi makelele ya kibongo.+
16 Kansi ntangu Sanduku ya Yehowa kumaka na Mbanza ya Davidi, Mikale+ mwana ya Saule talaka na nsi, na nela, mpi yandi monaka ntotila Davidi ke pumbuka-pumbuka, ke kina mpi ke zieta-zieta na ntwala ya Yehowa; ebuna yandi yantikaka kuvweza Davidi na ntima na yandi.+
17 Yo yina bo kotisaka Sanduku ya Yehowa mpi tulaka yo na kisika na yo na kati ya tenta yina Davidi tedimisaka sambu na yo.+ Ebuna Davidi pesaka makabu ya kuyoka+ mpi bimenga ya kinduku+ na ntwala ya Yehowa.+
18 Ntangu Davidi manisaka kupesa makabu ya kuyoka mpi bimenga ya kinduku, yandi sakumunaka bantu na zina ya Yehowa ya makesa.
19 Diaka, yandi kabudilaka bantu yonso, kimvuka yonso ya Izraele, konso bakala mpi konso nkento, dimpa mosi ya bo me sala bonso lupetu, gato mosi ya bo me sala na mbuma ya bo ke bingaka dati, mpi gato mosi ya bo me sala na mbuma ya vinu, ebuna bantu yonso kwendaka, konso muntu na nzo na yandi.
20 Ntangu Davidi vutukaka sambu na kusakumuna bantu ya nzo na yandi mosi, Mikale+ mwana ya Saule basikaka sambu na kukutana ti yandi. Yandi tubaka nde: “Tala mutindu ntotila ya Izraele me kudipesa lukumu ntangu yandi me katula bilele bubu yai na meso ya bampika ya bankento ya bansadi na yandi, kaka mutindu muntu ya kilawu ke katulaka bilele!”+
21 Ebuna Davidi tubilaka Mikale nde: “Nkinsi na mono vandaka na ntwala ya Yehowa, yina solaka mono na kisika ya tata na nge mpi ya bantu yonso ya nzo na yandi mpi yina tulaka mono sambu na kuvanda ntwadisi ya Izraele,+ bantu ya Yehowa. Yo yina, mono ta sala nkinsi na ntwala ya Yehowa,
22 mpi mono ta kudikulumusa diaka kuluta, mpi mono ta kuma kibeni muntu ya mpamba na meso na mono mosi. Kansi na meso ya bampika ya bankento yina nge me tubila, mono ta baka nkembo.”
23 Mikale,+ mwana ya Saule, butaka ve ata mwana mosi tii kilumbu yina yandi fwaka.
Banoti na nsi ya lutiti
^ To mbala ya nkaka, “kati-kati.”
^ To “kiseku.”
^ Yo ke tendula “Kukabwana ti Uzah.”
^ Na kisina, “kangaka.”
