2 Yoane 1:1-13
1 Mono mbuta,* mono ke sonikila nkento yina bo me solaka mpi bana na yandi, yina mono ke zolaka kibeni, kaka mono ve kansi mpi bantu yonso yina me zabaka kieleka,
2 sambu na kieleka yina kele na kati na beto mpi yina ta vanda ti beto kimakulu.
3 Beto ta vanda ti ntima ya mbote ya nene, mawa, mpi ngemba ya me katuka na Nzambi, Tata na beto mpi na Yezu Kristu, Mwana ya Tata, ti kieleka mpi zola.
4 Mono kele na kiese mingi sambu mono me mona nde bana na nge ya nkaka ke tambula na kieleka,+ mutindu Tata songaka beto.
5 Yo yina nkento, mono ke lomba nge nde beto zolana beto na beto. (Mono ke sonikila nge ve nsiku ya mpa, kansi nsiku yina beto kele na yo katuka luyantiku.)+
6 Mpi ntendula ya zola yo yai, nde beto landa kutambula na kuwakana ti bansiku na yandi.+ Nsiku yina yo yai, mutindu beno waka yo katuka luyantiku, nde beno fwete landa kutambula na zola.
7 Sambu bantu mingi ya luvunu me basika na nsi-ntoto,+ bantu yina ke ndimaka ve nde Yezu Kristu kwisaka na nitu ya kinsuni.+ Yandi kele muntu ya luvunu mpi mbeni ya Kristu.+
8 Beno kudikeba, sambu beno vidisa ve bima yina beto salaka ngolo sambu na yo, kansi sambu beno baka matabisi yonso.+
9 Konso muntu yina ke kwenda na ntwala mpi ke bikala ve na malongi ya Kristu, yandi kele ve ti Nzambi.+ Muntu yina ke bikala na malongi yai, yandi muntu kele ti Tata mpi Mwana.+
10 Kana muntu me kwisa na beno mpi yandi me nata ve malongi yai, beno yamba yandi ve na banzo na beno+ mpi beno pesa yandi ve mbote.
11 Sambu muntu yina ke pesa yandi mbote ke vukana ti yandi na bisalu na yandi ya mbi.
12 Ata mono kele ti mambu mingi ya kusonikila beno, mono ke zola ve kusala yo ti papie mpi tinta, kansi mono ke tula ntima nde mono ta kwisa kuna na beno mpi mono ta solula ti beno meso na meso, sambu kiese na beno kuvanda mingi kibeni.
13 Bana ya mpangi na nge ya nkento, yina bo me solaka, me tindila nge mbote.
Banoti na nsi ya lutiti
^ To “nkuluntu.”
