Amosi 7:1-17
7 Yehowa Mfumu ya Kuluta Nene songaka mono mambu yai na mbona-meso: Yandi salaka kimvuka ya bampasu ntangu bambuma ya nsuka* yantikaka kubasika. Yo vandaka bambuma ya nsuka yina basikaka na nima ya ntangu yina bo zengaka matiti ya ntotila.
2 Ntangu kimvuka ya bampasu manisaka kudia matiti ya insi, mono tubaka nde: “O Yehowa Mfumu ya Kuluta Nene, lolula pardo!+ Inki mutindu Yakobi lenda guluka?* Sambu yandi kele ngolo ve!”+
3 Yo yina Yehowa tadilaka diaka* diambu yina.+ Yehowa tubaka nde, “Yo ta salama ve.”
4 Yehowa Mfumu ya Kuluta Nene songaka mono mambu yai na mbona-meso: Yehowa Mfumu ya Kuluta Nene tubaka nde bo pesa ndola na nzila ya tiya. Yo yokaka bamasa ya nene ya mudindu, mpi yo yokaka ndambu ya insi.
5 Ebuna mono tubaka nde: “O Yehowa Mfumu ya Kuluta Nene, bikisa pardo.+ Inki mutindu Yakobi lenda guluka?* Sambu yandi kele ngolo ve!”+
6 Yo yina Yehowa tadilaka diaka* diambu yina.+ Yehowa Mfumu ya Kuluta Nene tubaka nde, “Diambu yai mpi ta salama ve.”
7 Yai mambu yina yandi songaka mono: Tala! Yehowa vandaka ya kutelama na kibaka ya bo tungaka na nsadisa ya nsinga ya bamaso, mpi nsinga ya bamaso vandaka na diboko na yandi.
8 Ebuna Yehowa tubilaka mono nde: “Amosi, nge ke mona inki?” Mono tubaka nde: “Nsinga ya bamaso.” Na nima Yehowa tubaka nde: “Mono ke tula nsinga ya bamaso na kati ya bantu na mono Izraele. Mono ta lolula bo diaka ve.+
9 Bisika ya kunanguka ya Izaki+ ta bikala mpamba, mpi bo ta bebisa bisika ya santu ya Izraele;+ mpi mono ta kwisa kunwanisa nzo ya Yeroboami ti mbele ya bitumba.”+
10 Amasia, nganga-nzambi ya Betele,+ tindilaka Yeroboami+ ntotila ya Izraele nsangu yai: “Amosi ke sadila nge komplo na kati ya nzo ya Izraele.+ Bantu ya insi yai lenda ndima diaka ve mambu yonso ya yandi ke tuba.+
11 Sambu Amosi ke tuba nde, ‘Yeroboami ta fwa na mbele ya bitumba, mpi bo ta katula Izraele na insi na yandi mpi ta nata yandi kibeni na insi ya nzenza.’”+
12 Ebuna Amasia tubilaka Amosi nde: “O muntu ya ke monaka bambona-meso, kwenda, tina na ntoto ya Yuda, baka dimpa na nge* kuna, mpi kuna nge lenda bikula.+
13 Kansi nge fwete bikula diaka ve na Betele,+ sambu yo kele kisika ya santu ya ntotila+ mpi nzo ya kimfumu.”
14 Ebuna Amosi vutudilaka Amasia nde: “Mono vandaka ve mbikudi to mwana ya mbikudi; kansi mono vandaka nkengidi ya bitwisi,+ mpi mono vandaka kukeba banti ya bafige ya sikomore.*
15 Kansi Yehowa katulaka mono na kisalu ya kukeba bitwisi, mpi Yehowa tubilaka mono nde, ‘Kwenda, bikudila bantu na mono Izraele.’+
16 Yo yina ntangu yai, wa mambu yina Yehowa ke tuba: ‘Nge ke tuba nde, “Kubikula ve sambu na Izraele,+ mpi kusamuna ve+ sambu na nzo ya Izaki.”
17 Yo yina, Yehowa ke tuba nde: “Nkento na nge ta kuma ndumba na mbanza yai, mpi bana na nge ya babakala mpi ya bankento ta fwa na mbele ya bitumba. Bo ta kabula insi na nge na nsinga ya kutesila, mpi nge mosi ta fwa na insi mosi ya mvindu; bo ta katula Izraele na insi na yandi mpi ta nata yandi kibeni na insi ya nzenza.”’”+
Banoti na nsi ya lutiti
^ Disongidila, na Yanuari mpi na Februari.
^ Na kisina, “telama.”
^ To “waka mawa sambu na.”
^ Na kisina, “telama.”
^ To “waka mawa sambu na.”
^ Na kisina, “dia dimpa.”
^ To “mono vandaka muntu ya ke tobulaka bafige ya sikomore.”
