Amosi 9:1-15
9 Mono monaka Yehowa+ me telama na zulu ya mesa-kimenga, mpi yandi tubaka nde: “Bula nsongi ya dikunzi, ebuna munoko ya nzo ta nikana. Zenga yo na ntu, mpi mono ta fwa muntu ya nsuka na kati na bo ti mbele ya bitumba. Muntu mosi ve yina ke tina ta basika, mpi muntu mosi ve yina ke meka kutina ta nunga.+
2 Kana bo timuna ntoto sambu na kubumbana na Maziamu,*Diboko na mono ta baka bo kuna;Mpi kana bo tombuka na zulu,Mono ta kwisa kukulumusa bo kuna.
3 Mpi kana bo bumbana na nsongi ya Karmele,Mono ta sosa bo mbote-mbote kuna mpi mono ta baka bo.+
Kana bo bumbana na meso na mono na nsi ya nzadi-mungwa,Mono ta tinda nioka sambu yo tatika bo kuna.
4 Kana bo kwenda na kimpika na ntwala ya bambeni na bo,Mono ta pesa mbele ya bitumba nsiku kuna, ebuna yo ta fwa bo;+Mono ta tudila bo dikebi sambu na kunatila bo mambu ya mbi, kansi mambu ya mbote ve.+
5 Sambu Mfumu ya Kuluta Nene, Yehowa ya makesa, yandi Muntu ke simba insi,*Ebuna yo ke kuma masa-masa,+ mpi bantu na yo yonso ta dila;+Mpi ntoto yonso ta tombuka bonso Nile,Mpi ta kulumuka bonso Nile ya Ezipte.+
6 ‘Muntu yina ke tunga bimatilu na yandi na zuluMpi yina ke tula nzo na yandi* na zulu ya ntoto;Muntu yina ke bingaka bamasa ya nzadi-mungwa,Sambu na kutiamuna yo na zulu ya ntoto+—Zina na yandi Yehowa.’+
7 ‘Keti beno kele ve bonso bana ya Kushi na ntwala na mono, O bantu ya Izraele?’ Yehowa muntu me tuba.
‘Keti mono basisaka ve Izraele na insi ya Ezipte,+Keti mono basisaka ve bantu ya Filistia na Kreta,+ mpi bantu ya Siria na Kire?’+
8 ‘Meso ya Yehowa Mfumu ya Kuluta Nene ke tala kimfumu ya masumu,Mpi yandi ta manisa yo na zulu ya ntoto.+
Kansi mono ta manisa ve kimakulu nzo ya Yakobi,’+ Yehowa muntu me tuba.
9 ‘Sambu mono ke pesa nsiku,Mpi mono ta nikisa nzo ya Izraele na kati ya makanda yonso,+Mutindu muntu ke nikisaka muyungulu,Mpi ditadi mosi ve ke bwaka na ntoto.
10 Bo ta fwa na mbele ya bitumba, bansumuki yonso ya bantu na mono,Bantu yina ke tuba nde, “Mpasi ta kuma ve pene-pene na beto mpi yo ta simba beto ve.”’
11 ‘Na kilumbu yina mono ta tedimisa kisasa* ya Davidi+ yina me bwaka,Mono ta yidika mabulu ya bibaka,*Mpi mono ta yidika bisika na yo yina me bebaka;Mono ta tunga yo diaka bonso na bilumbu ya ntama.+
12 Sambu bo baka kima ya Edomi yina me bikala,+Mpi makanda yonso yina bo bingaka bo na zina na mono,’ Yehowa muntu me tuba, yandi muntu yina ke sala yo.
13 ‘Tala! Bilumbu ke kwisa,’ Yehowa muntu me tuba,‘Ntangu muntu ya ke bundu- laka ntoto ta kuta muntu ya ke katulaka bima na bilanga,Mpi muntu ya ke kamunaka bisuka ya vinu ta kuta muntu ya ke nata bankeni;+Mpi bangumba ya nene ta nokisa vinu ya sukadi,+Mpi bangumba yonso ya fioti ta fuluka ti yo.*+
14 Mono ta vutula bantu na mono Izraele+ yina kwendaka na kimpika,Mpi bo ta tunga diaka bambanza yina bikalaka mpamba mpi bo ta zinga kuna;+Bo ta kuna bilanga ya vinu mpi bo ta nwa vinu na yo,+Bo ta sala bilanga mpi bo ta dia bambuma na yo.’+
15 ‘Mono ta kuna bo na insi na bo,Mpi bo ta tumuna bo diaka veNa ntoto na bo yina mono me pesaka bo,’+ Yehowa Nzambi na beno muntu me tuba.”
Banoti na nsi ya lutiti
^ To “Sheole,” disongidila, maziamu ya bantu yonso. Tala Bantendula ya Bangogo.
^ To “ntoto.”
^ To “ludi na yandi ya kufumbama; suku na yandi.”
^ To “tenta; sombolo.”
^ To “ya bibaka na yo.”
^ Na kisina, “ta kuma masa-masa.”
