Bakolosai 3:1-25
3 Kansi, kana Nzambi futumunaka beno ti Kristu,+ beno landa kusosa mambu yina kele na zulu, kisika Kristu kele ya kuvanda na diboko ya kitata ya Nzambi.+
2 Beno tula mabanza na beno ntangu yonso na mambu yina kele na zulu,+ kansi ve na mambu yina kele na ntoto.+
3 Sambu beno me fwaka, mpi bo me bumbaka luzingu na beno ti Kristu na bumosi ti Nzambi.
4 Ntangu Kristu, luzingu na beto,+ ta monana, beno ta monana mpi ti yandi na ntangu yina na nkembo.+
5 Yo yina, beno fwa bitini ya nitu na beno+ yina kele na ntoto sambu na pite,* mambu ya mvindu, nzala ya ngolo ya kuvukisa nitu ya bo lenda yala ve,+ nzala ya mbi, mpi lukasi, yina kele lusambu ya biteki.
6 Makasi ya Nzambi ke kwisa sambu na mambu yina.
7 Yo yina mutindu beno mpi vandaka kuditwadisa* na luzingu na beno ya ntama.*+
8 Kansi ntangu yai, beno fwete losa mambu yina yonso ntama ti beno: nganzi, makasi, mambu ya mbi,+ mafingu,+ mpi mambu ya nsoni+ ya ke basika na munoko na beno.
9 Beno tuba ve luvunu beno na beno.+ Beno katula kimuntu ya ntama+ ti bisalu na yo,
10 mpi beno lwata kimuntu ya mpa,+ yina ke kuma ya mpa na nzila ya nzayilu ya sikisiki na kuwakana ti kifwani ya Muntu yina gangaka yo.+
11 Awa kele ve ti Mugreki to Muyuda, luyotisu to kukonda luyotisu, munzenza, muntu ya Sikite,* mpika, to muntu yina kele na kimpwanza; kansi Kristu kele mambu yonso mpi na yonso.+
12 Yo yina, sambu beno kele bantu yina Nzambi me solaka,+ bantu ya santu mpi yina yandi ke zolaka, beno lwata mawa ya ngolo,+ ntima ya mbote, kudikulumusa,+ mawete,+ mpi ntima ya nda.+
13 Beno landa kukanga-ntima na mambu ya bantu ya nkaka mpi beno landa kulolulana na ntima ya mvimba+ ata muntu mosi kele na makambu ti muntu ya nkaka.+ Mutindu Yehowa* lolulaka beno na ntima ya mvimba, beno fwete sala mpi mutindu mosi.+
14 Kansi katula mambu yai yonso, beno lwata zola,+ sambu yo ke vukisaka beto na mutindu ya kukuka.*+
15 Diaka, bika ngemba ya Kristu kuyala bantima na beno,+ sambu bo me bingaka beno sambu beno kuma nitu mosi mpi beno vanda na ngemba. Beno pesa matondo.
16 Bika ndinga ya Kristu kuvanda mingi na kati na beno ti mayele yonso. Beno landa kulongana mpi kupesana kikesa* ti bankunga,+ bankunga ya kupesa Nzambi lukumu, bankunga ya kimpeve yina beno ke yimba na ntonda,* mpi beno yimbila Yehowa* na bantima na beno.+
17 Konso kima yina beno ke tuba mpi konso kima yina beno ke sala, beno sala mambu yonso na zina ya Mfumu Yezu, mpi beno pesa matondo na Nzambi, Tata na beto na nzila na yandi.+
18 Beno bankento, beno lemfuka na babakala na beno,+ mutindu yo me fwana na Mfumu.
19 Beno babakala, beno landa kuzola bankento na beno+ mpi beno dasukila bo ve.*+
20 Beno bana, beno lemfuka na bibuti na beno na mambu yonso,+ sambu yo kele mbote na Mfumu.
21 Beno batata, beno pesa ve bana na beno makasi,*+ sambu bo lemba nitu ve.
22 Beno bampika, beno lemfuka na mambu yonso na bamfumu na beno na ntoto,*+ kaka ve ntangu bo ke tala beno, kaka sambu na kupesa bantu kiese, kansi ti masonga ya ntima mpi ti boma ya Yehowa.*
23 Mambu yonso yina beno ke sala, beno sala yo na moyo* ya mvimba bonso sambu na Yehowa,*+ kansi sambu na bantu ve,
24 sambu beno me zaba nde Yehowa* muntu ta pesa beno dikabu bonso matabisi.+ Beno sala bonso bampika sambu na Mfumu, Kristu.
25 Ya kieleka, muntu yina ke sala mambu ya mbi, bo ta futa yandi sambu na mbi yina yandi salaka,+ sambu Nzambi ke pona-ponaka ve.+
Banoti na nsi ya lutiti
^ Na Kigreki, por·neiʹa. Tala Bantendula ya Bangogo.
^ To “kutambula.”
^ To “ntangu beno vandaka kuzinga mutindu yina.”
^ “Muntu ya Sikite” ke tendula muntu yina me temukaka ve.
^ Tala Bangindu ya Ngika A5.
^ Na kisina, “yo kele kikangilu ya kukuka yina ke vukisaka.”
^ To “bandongisila.”
^ To “na mutindu ya kitoko.”
^ Tala Bangindu ya Ngika A5.
^ To “sadila bo ve mambu na nku.”
^ To “beno sosila ve bana na beno.”
^ Na kisina, “na kinsuni.”
^ Tala Bangindu ya Ngika A5.
^ Tala Bantendula ya Bangogo.
^ Tala Bangindu ya Ngika A5.
^ Tala Bangindu ya Ngika A5.
