Nkunga 104:1-35
104 Bika mono* kumisa Yehowa.+
O Yehowa Nzambi na mono, nge kele nene mingi.+
Nge me lwata bunene* ti lukumu.+
2 Nsemo+ me ziunga nge bonso lele;Nge ke tandula zulu bonso lele ya tenta.+
3 Yandi ke tula mabaya ya nene ya basuku na yandi ya zulu na bamasa yina kele na zulu,*+Yandi ke kumisa matuti pusu-pusu na yandi,+Yandi ke tambula na mapapu ya mupepe.+
4 Yandi ke salaka nde bawanzio na yandi kuvanda bampeve,Bansadi na yandi kuvanda tiya ya ke yokaka.+
5 Yandi me tedimisaka ntoto na bafondasio na yo;+Yo ta katuka ve na kisika na yo* mvula na mvula.+
6 Nge fikaka yo ti bamasa ya mudindu bonso ti lele.+
Bamasa telamaka na zulu ya bangumba.
7 Na kungana na nge, yo tinaka;+Na makelele ya kungana na nge, yo tinaka na boma
8 —Bangumba tombukaka+ mpi miwanda kulumukaka—Tii na kisika yina nge tulaka sambu na yo.
9 Nge me tulaka ndilu yina yo fwete luta ve,+Sambu yo fika diaka ve ntoto ata fioti.
10 Yandi ke tinda banto ya masa na miwanda;Yo ke kulumuka na kati-kati ya bangumba.
11 Yo ke pesa masa sambu na bambisi yonso ya mfinda;Bampunda ya mfinda ke manisa nzala na yo ya masa.
12 Bandeke ya zulu ke tungaka babuyamba na zulu na yo;Yo ke yimba na kati ya matiti ya me fuluka na balutangu.
13 Yandi ke losila bangumba masa katuka na basuku na yandi ya zulu.+
Ntoto me fuluka ti bambuma ya bisalu na nge.+
14 Yandi ke sala nde matiti kuyela sambu na bangombe,Mpi bimenina sambu bantu kusadila yo,+Sambu na kubasisa madia na ntoto,
15 Mpi vinu yina ke pesaka ntima ya muntu kiese,+Mafuta yina ke semisaka luse,Mpi mampa yina ke pesaka ntima ya muntu ngolo.+
16 Banti ya Yehowa me fuluka,Banti ya sedre ya Libani yina yandi kunaka,
17 Kisika bandeke ke tungaka babuyamba.
Nzo ya mubila+ kele na banti ya yenevriye.
18 Bangumba ya kunanguka kele sambu na bankombo ya bangumba;+Matadi ya nene kele kitininu ya basimbidiki ya matadi.+
19 Yandi me salaka ngonda sambu yo vanda kidimbu ya bantangu yina bo me tulaka;Ntangu ke zabaka mbote ntangu na yo ya kudinda.+
20 Nge ke nataka mudidi, ebuna mpimpa ke bwaka,+Ntangu bambisi yonso ya mfinda ke tambulaka.
21 Bana-bantambu* ke ngana sambu na kukanga mbisi ya kudia,+Mpi yo ke lomba madia na yo na Nzambi.+
22 Ntangu ntangu ke basika,Yo ke vutuka mpi ke lala na banzo na yo.
23 Muntu ke kwenda na kisalu na yandi,Mpi yandi ke sala ngolo tii na nkokila.
24 Bisalu na nge kele mingi kibeni, O Yehowa!+
Nge me salaka yo yonso na mayele.+
Ntoto me fuluka ti bima yina nge me salaka.
25 Nzadi-mungwa, yina kele mudindu mpi nene mingi,Me fulukaka ti bima mingi ya moyo yina bo lenda tanga ve, ya fioti mpi ya nene.+
26 Bamaswa ke tambulaka kuna,Mpi Leviatani,*+ yina nge salaka sambu yo sakana na kati na yo.
27 Bo yonso ke vingilaka ngeSambu nge pesa bo madia na nsungi na yo.+
28 Bo ke lokutaka bima yina nge ke pesaka bo.+
Kana nge kangula diboko na nge, bo ke fulukaka ti bima ya mbote.+
29 Kana nge bumba luse na nge, bo ke kumaka kisaka- saka.
Kana nge katula mpeve na bo, bo ke fwaka mpi ke vutukaka na mfututu.+
30 Kana nge tinda mpeve na nge, bo ke gangama,+Mpi nge ke kumisaka ntoto ya mpa.
31 Nkembo ya Yehowa ta zinga kimakulu.
Yehowa ta wa kiese na bisalu na yandi.+
32 Yandi ke talaka ntoto, mpi yo ke tekitaka;Yandi ke simbaka bangumba, mpi yo ke basisaka midinga.+
33 Mono ta yimbila Yehowa+ luzingu na mono ya mvimba;Mono ta yimba bankunga* sambu na kukumisa Nzambi na mono ntangu yonso ya mono kele na luzingu.+
34 Bika nde mabanza na mono kupesa yandi kiese.*
Mono ta yangalala na Yehowa.
35 Bansumuki ta vila na ntoto,Mpi bantu ya mbi ta vanda diaka ve.+
Bika mono* kumisa Yehowa. Beno kumisa Yah!*
Banoti na nsi ya lutiti
^ To “nkembo.”
^ To “moyo na mono.”
^ Na kisina, “na bamasa.”
^ To “ta nikana ve.”
^ To “Bana-bantambu yina kele ti mika mingi na nkingu.”
^ Tala Bantendula ya Bangogo.
^ To “ta bula miziki.”
^ To mbala ya nkaka, “Bika nde kuyindulula ya ntima na mono sambu na yandi kuvanda yina ke pesa kiese.”
^ To “moyo na mono.”
^ To “Aleluya!” “Yah” kele zina ya Yehowa na bunkufi.
