Nkunga 147:1-20
147 Beno kumisa Yah!*
Yo kele mbote na kuyimba bankunga* sambu na kukumisa Nzambi na beto;Yo ke pesa kiese mingi mpi yo me fwana kibeni na kukumisa yandi!+
2 Yehowa ke tunga Yeruzalemi;+Yandi ke vukisa bantu ya Izraele yina me panzanaka.+
3 Yandi ke belulaka bantu yina kele na mawa;Yandi ke sansaka bamputa na bo.
4 Yandi ke tangaka ntalu ya bambwetete;Yandi ke bingaka konso mbwetete na zina na yo.+
5 Mfumu na beto kele nene mpi ngolo mingi kibeni;+Mpila ya kutesa mayele na yandi ya kubakisa mambu kele ve.+
6 Yehowa ke tombulaka bantu ya kudikulumusa,+Kansi yandi ke losaka bantu ya mbi na ntoto.
7 Beno yimbila Yehowa bankunga ya kupesa matondo;Beno yimbila Nzambi na beto bankunga ya lukumu ti kidare,
8 Muntu yina ke fikaka zulu na matuti,Muntu yina ke nokisaka mvula na ntoto,+Muntu yina ke salaka nde matiti kumena+ na bangumba.
9 Yandi ke pesaka madia na bambisi,+Na bana ya bakwanga-kwanga yina ke lombaka yo.+
10 Yandi ke monaka ve kiese na ngolo ya mpunda;+Makulu ya ngolo ya muntu ke yitukisaka yandi mpi ve.+
11 Yehowa ke waka kiese na bantu yina ke waka yandi boma,+Na bantu yina ke vingilaka zola na yandi ya kwikama.+
12 Pesa Yehowa nkembo, O Yeruzalemi.
Kumisa Nzambi na nge, O Sioni.
13 Yandi ke kumisaka ngolo banti ya ke kangaka bakielo ya mbanza na nge;Yandi ke sakumunaka bana na nge na kati na nge.
14 Yandi ke nataka ngemba na teritware na nge;+Yandi ke salaka nde nge fuluka ble ya kuluta kitoko.*+
15 Yandi ke tindaka nsiku na yandi na ntoto;Ndinga na yandi ke bakaka ntinu nswalu.
16 Yandi ke tindaka mvula ya mpembe* bonso lene;+Yandi ke panzaka masa ya matadi bonso putulu ya tiya.+
17 Yandi ke nokisaka mvula na yandi ya matadi* bonso bitini ya mampa.+
Nani lenda kanga ntima na madidi na yandi?+
18 Yandi ke tindaka ndinga na yandi, ebuna yo ke kumaka masa-masa.
Yandi ke salaka nde mupepe na yandi kubula,+ ebuna bamasa ke kulumukaka.
19 Yandi ke zabisaka ndinga na yandi na Yakobi,Yandi ke zabisaka bansiku ti balusambisu na yandi na Izraele.+
20 Yandi me salaka ve mutindu yina na konso dikanda ya nkaka;+Bo me zaba kima ve ya me tala balusambisu na yandi.
Beno kumisa Yah!*+
Banoti na nsi ya lutiti
^ To “kubula miziki.”
^ To “Aleluya!” “Yah” kele zina ya Yehowa na bunkufi.
^ Na kisina, “fuluka mafuta ya ble.”
^ To “neige.”
^ To “glase na yandi.”
^ To “Aleluya!” “Yah” kele zina ya Yehowa na bunkufi.
