Nkunga 51:1-19
Na ntwadisi. Nkunga ya Davidi, ntangu mbikudi Natani kwisaka kukota na nzo na yandi na nima ya ntangu yina Davidi vukisaka nitu ti Bat-sheba.+
51 O Nzambi, wila mono mawa na kuwakana ti zola na nge ya kwikama.+
Dipa mbi na mono na kuwakana ti mawa na nge ya nene.+
2 Yobisa mono ya mvimba na kifu na mono,+Mpi yobisa mono sambu na disumu na mono.+
3 Sambu mono ke zaba mbote mambu na mono ya mbi,Mpi disumu na mono kele ntangu yonso na ntwala na mono.*+
4 Mono me sala disumu na ntwala na nge kibeni;*+Mono me sala diambu ya mbi na meso na nge.+
Yo yina, nge kele muntu ya lunungu ntangu nge ke tubaNge kele muntu ya mbote na ntangu nge ke sambisa.+
5 Mono butukaka na kifu,Mpi mama na mono bakaka divumu na mono na disumu.*+
6 Nge ke zolaka kieleka na ntima;+Longa ntima na mono mayele ya kieleka.
7 Yobisa mono ti izope sambu na disumu na mono, mpidina mono ta vanda bunkete;+Yobisa mono, mpidina mono ta vanda mpembe kuluta mvula ya mpembe.*+
8 Bika mono wa milolo ya kiese mpi ya kuyangalala,Sambu mikwa yina nge bukaka kuwa kiese.+
9 Katula* luse na nge na masumu na mono,+Mpi vwansa* bifu na mono yonso.+
10 Ganga ntima ya mpembe na kati na mono, O Nzambi,+Mpi tula na kati na mono mpeve ya mpa,+ mpeve ya ngolo.
11 Kukula mono ve na ntwala na nge;Mpi kukatula mono ve mpeve santu na nge.
12 Vutudila mono kiese ya luguluku na nge;+Tedimisa na kati na mono luzolo ya kulemfukila nge.*
13 Mono ta longa bantu ya ke fwaka nsiku banzila na nge,+Mpidina bansumuki ta vutuka na nge.
14 Gulusa mono na mfuka ya menga,+ O Nzambi, Nzambi ya luguluku na mono,+Sambu ludimi na mono kuzabisa lunungu na nge na kiese.+
15 O Yehowa, kangula munoko na mono,Sambu munoko na mono kuzabisa lukumu na nge.+
16 Sambu nge ke zola ve kimenga—kana ve mono zolaka kupesa yo;+Nge ke wa ve kiese na dikabu ya mvimba ya kuyoka.+
17 Bimenga ya ke pesaka Nzambi kiese kele mabanza ya ke niokwama;Ntima ya kele na mawa mpi ya ke niokwama, O Nzambi, nge ta buya* yo ve.+
18 Na luzolo na nge ya mbote, sadila Sioni mambu ya mbote;Tunga bibaka ya Yeruzalemi.
19 Ebuna nge ta wa kiese na bimenga ya lunungu,Bimenga ya kuyoka mpi makabu ya mvimba;Ebuna bo ta pesa bangombe na mesa-kimenga na nge.+
Banoti na nsi ya lutiti
^ To “na mabanza na mono.”
^ Na kisina, “na nge mpamba.”
^ To “Mpi na masumu katuka ntangu yina mama na mono bakaka divumu na mono.”
^ To “neige.”
^ To “Bumba.”
^ To “dipa.”
^ Na kisina, “Bika nde nge sadisa mono ti mpeve yina kele ya kuyilama.”
^ To “vweza.”
