Nkunga 68:1-35
Na ntwadisi. Ya Davidi. Miziki. Nkunga.
68 Bika Nzambi kutelama, bika bambeni na yandi kupanzana,Mpi bika bantu yina ke mengaka yandi kutina na ntwala na yandi.+
2 Mutindu mupepe ke nataka midinga, bika nge kula bo;Mutindu mafuta ke yangukaka na tiya,Yo yina bika bantu ya mbi kufwa na ntwala ya Nzambi.+
3 Kansi bika bantu ya lunungu kuwa kiese;+Bika bo wa kiese ya mingi na ntwala ya Nzambi;Bika bo yangalala na kiese.
4 Beno yimbila Nzambi; beno yimba bankunga* sambu na kukumisa zina na yandi.+
Beno yimbila Muntu yina ke tambula na bantoto ya zelo na zelo.*
Zina na yandi Yah!*+ Beno wa kiese na ntwala na yandi!
5 Tata ya bana ya me konda batata mpi muntu ya ke taninaka* mifwidi ya bankento+Kele Nzambi na kisika ya santu yina yandi ke zingaka.+
6 Nzambi ke pesaka bantu yina kele bo mosi nzo ya kuzinga;+Yandi ke basisaka bantu ya boloko mpi ke tomisaka bo.+
Kansi bantu ya ntu-ngolo* fwete zinga na ntoto ya kuyuma.+
7 O Nzambi, ntangu nge twadisaka* bantu na nge,+Ntangu nge tambulaka na ntoto ya zelo na zelo, (Sela)
8 Ntoto nikanaka;+Zulu nokisaka mvula sambu na Nzambi;Sinai yai nikanaka sambu na Nzambi, Nzambi ya Izraele.+
9 Nge salaka nde yo noka mingi, O Nzambi;Nge pesaka diaka ngolo na bantu* na nge yina lembaka.
10 Bo zingaka na batenta na nge;+Na bumbote na nge, nge kebaka bansukami, O Nzambi.
11 Yehowa ke pesa nsiku;Bankento yina ke samunaka nsangu ya mbote kele kimvuka ya nene ya basoda.+
12 Bantotila ya bimvuka ya basoda ke tina,+ bo ke tina!
Nkento yina me bikala na nzo, ke baka dikabu na bima yina bo me botula.+
13 Ata beno lalaka pene-pene ya tiya ya camp,*Beno ta basika bonso pizio yina kele ti mapapu ya bo me pakula arza,Yina kele ti mansala ya wolo ya mbote.*
14 Ntangu Nkwa-Ngolo Yonso panzaka bantotila na yo,+Mvula ya mpembe* nokaka na Salmoni.*
15 Ngumba ya Bashani+ kele ngumba ya Nzambi;*Ngumba ya Bashani kele ngumba ya bansongi.
16 Beno bangumba ya bansongi, sambu na nki beno ke tala ti kulula,Na ndambu ya ngumba yina Nzambi me sola* sambu yo vanda kisika na yandi ya kuzinga?+
Ya kieleka, Yehowa ta zinga kuna kimakulu.+
17 Bapusu-pusu ya bitumba ya Nzambi kele makumi ya mafunda, mafunda na zulu ya mafunda.+
Yehowa me katuka na Sinai mpi me kota na kisika ya santu.+
18 Nge tombukaka na zulu;+Nge nataka bampika;Nge bakaka bantu bonso makabu,+Ee, ata bantu ya ntu-ngolo,+ sambu na kuzinga na kati na bo, O Yah Nzambi.
19 Bika Yehowa kubaka lukumu, yandi muntu ke nataka kilo na beno konso ki- lumbu,+Nzambi ya kieleka ya luguluku na beto. (Sela)
20 Sambu na beto, Nzambi ya kieleka kele Nzambi yina ke gulusaka;+Mpi Yehowa Mfumu ya Kuluta Nene ke gulusaka na lufwa.+
21 Ee, Nzambi ta pasula ba-ntu ya bambeni na yandi,Ntu ya konso muntu yina ke tambula na* mbi na yandi.+
22 Yehowa me tuba nde: “Mono ta basisa bo na Bashani;+Mono ta basisa bo na bisika ya mudindu ya nzadi-mungwa,
23 Sambu dikulu na nge kudinda na menga+Mpi ludimi ya bambwa na nge kubaka dikabu na yo na bima ya bambeni.”
24 Bo ke mona bandonga ya bantu na nge, O Nzambi,Bandonga ya bantu ya Nzambi na mono, ntotila na mono, na kisika ya santu.+
25 Miyimbi-bankunga ke tambula na ntwala, mpi bantu ya ke bulaka miziki yina ke bula miziki ti bima ya kubudila miziki ya kele ti bansinga ke landa bo na nima;+Bana-bankento yina ke bula bangoma ya fioti+ kele na kati-kati.
26 Beno kumisa Nzambi na kati ya bantu yina me vukana;*Beno kumisa Yehowa, beno bantu yina me katuka na Nto ya Izraele.+
27 Kuna Benyamini,+ leke kibeni, ke tula bo na nsi na yandi,Mpi bamfumu ya Yuda ti kimvuka na bo ya bantu ya ke tula makelele,Bamfumu ya Zebuloni, bamfumu ya Naftali.
28 Nzambi na nge me tuba nde nge ta vanda ngolo.
Songa ngolo na nge, O Nzambi, nge muntu yina me sala mambu sambu na beto.+
29 Sambu na tempelo na nge yina kele na Yeruzalemi,+Bantotila ta natila nge makabu.+
30 Nganina bambisi ya mfinda ya balukengi,Kimvuka ya bangombe ya babakala+ mpi bana na yo,Tii kuna bantu ta fukama mpi ta nata* bitini ya arza.
Kansi yandi ke panza bantu yina ke waka kiese na bitumba.
31 Bo ta nata bima ya bo me sala na bronze* katuka na Ezipte;+Kushi ta sala nswalu sambu na kupesa Nzambi makabu.
32 O bimfumu ya ntoto, beno yimbila Nzambi,+Beno yimba bankunga* sambu na kukumisa Yehowa, (Sela)
33 Na muntu yina ke tambulaka na zulu yina ke vandaka katuka ntama kibeni.+
Tala! Yandi ke ngana na ndinga na yandi, na ndinga na yandi ya ngolo.
34 Beno ndima ngolo ya Nzambi.+
Bunene na yandi kele na zulu ya Izraele,Mpi ngolo na yandi kele na zulu.*
35 Nzambi ke pesa boma katuka na kisika na yandi* ya nene ya santu.+
Yandi kele Nzambi ya Izraele,Yina ke pesaka bantu ngolo mpi kikesa.+
Lukumu kuvanda na Nzambi.
Banoti na nsi ya lutiti
^ To “bula miziki.”
^ To mbala ya nkaka, “na matuti.”
^ “Yah” kele zina ya Yehowa na bunkufi.
^ Na kisina, “mpi zuzi ya.”
^ To “bankolami.”
^ Na kisina, “kwendaka na ntwala ya.”
^ Na kisina, “na dikabu.”
^ To mbala ya nkaka, “balupangu ya mameme.”
^ To “ya mukubu ya masa ya saka-saka ti ya mwamba ya ngasi.”
^ To “Neige.”
^ To “Yo vandaka bonso nde mvula ya mpembe nokaka na Salmoni.”
^ To “ngumba ya nene.”
^ To “zola.”
^ Na kisina, “landa.”
^ Na kisina, “na balukutakanu.”
^ To mbala ya nkaka, “ta niata.”
^ To mbala ya nkaka, “Mimonisi ta kwisa.”
^ To “bula miziki.”
^ Na kisina, “matuti.”
^ Na kisina, “nge.”
