Nkunga 78:1-72
Maskile.* Ya Asafi.+
78 Bantu na mono, beno wa nsiku* na mono;Beno tula dikutu na mambu yina munoko na mono ke tuba.
2 Mono ta kangula munoko na mono ti kingana.
Mono ta basisa bangiufula ya mpasi ya ntangu ya ntama.+
3 Mambu yina beto me wa mpi me zaba,Yina batata na beto me telaka beto,+
4 Beto ta bumbila ve bana na bo mambu yina;Beto ta tela yo na ndonga ya bantu yina ke kwisa+Bisalu ya Yehowa yina me fwana na kubaka lukumu mpi ngolo na yandi,+Mambu ya kuyituka yina yandi me salaka.+
5 Yandi tulaka ngibusa na YakobiMpi tulaka nsiku na Izraele;Yandi songaka ba-nkaka na betoNa kuzabisa bana na bo mambu yai,+
6 Sambu ndonga ya bantu yina ke kwisa,Bana yina ta butuka, kuzaba yo.+
Na nima bo ta tela yo bana na bo.+
7 Ebuna bana yai ta tudila Nzambi ntima.
Bo ta vila ve bisalu ya Nzambi+Kansi bo ta zitisa bansiku na yandi.+
8 Ebuna bo ta vanda ve bonso ba-nkaka na bo,Ndonga ya bantu ya ntu-ngolo mpi ya kukolama,+Ndonga ya bantu yina ntima na bo vandaka pete-pete*+Mpi yina mpeve na bo vandaka ve ya kwikama na Nzambi.
9 Bantu ya Efrayimi vandaka ti minduki ya batolo-tolo,Kansi bo vutukaka nima na kilumbu ya bitumba.
10 Bo zitisaka ve kuwakana ya Nzambi,+Mpi bo buyaka kuzitisa nsiku na yandi.+
11 Bo vilaka mpi mambu yina yandi salaka,+Bisalu na yandi ya kuyituka yina yandi songaka bo.+
12 Yandi salaka mambu ya kuyituka na meso ya ba-nkaka na bo,+Na insi ya Ezipte, ntoto ya Soani.+
13 Yandi kabulaka nzadi-mungwa sambu na kulutisa bo,Mpi yandi salaka nde bamasa kutelama bonso kibaka.*+
14 Yandi twadisaka bo na dituti na ntanguMpi yandi twadisaka bo mpimpa ya mvimba na nsemo ya tiya.+
15 Yandi pasulaka matadi na ntoto-makanga,Yandi bikaka nde bo nwa masa tii kuna bo lungisaka nzala na bo bonso nde bo vandaka kunwa na bamasa ya mudindu.+
16 Yandi basisaka bamasa na ditadiMpi salaka nde bamasa kukulumuka bonso banzadi.+
17 Kansi bo landaka kusala masumu na ntwala na yandiNa mutindu bo vandaka kukolama na Muntu ya Kuluta Zulu na ntoto ya zelo na zelo;+
18 Bo tudilaka Nzambi ntembe* na ntima na bo+Na mutindu bo lombaka madia yina bo vandaka na nzala na yo ya ngolo.*
19 Yo yina bo tubaka mambu ya mbi sambu na Nzambi,Nde: “Keti Nzambi lenda pesa beto madia na ntoto-makanga?”+
20 Tala! Yandi bulaka ditadiEbuna bamasa basikaka mpi bamasa kulumukaka mingi.+
“Keti yandi lenda pesa beto mpi dimpa,To keti yandi lenda pesa bantu na yandi misuni?”+
21 Ntangu Yehowa waka bo, yandi waka makasi ya ngolo;+Tiya+ pedilaka Yakobi,Ebuna yandi wilaka Izraele makasi ya ngolo+
22 Sambu bo tudilaka ve Nzambi lukwikilu;+Bo tulaka ve ntima na ngolo na yandi ya kugulusa bo.
23 Ebuna yandi pesaka nsiku na zulu ya kele ti matuti kuna na zulu,Mpi yandi kangulaka bakielo ya zulu.
24 Yandi landaka kunokisa mana sambu bo dia;Yandi pesaka bo bambuma ya zulu.+
25 Bantu diaka mampa ya bantu ya ngolo;*+Yandi pesaka bo madia mingi sambu bo fuluka.+
26 Yandi basisaka mupepe ya esti na zuluMpi na ngolo na yandi, yandi salaka nde mupepe ya sudi kubula.+
27 Yandi nokisilaka bo misuni bonso mfututu,Bandeke bonso zelo yina kele na lweka ya nzadi-mungwa.
28 Yandi bwisaka yo na kati-kati ya camp na yandi,Na nziunga ya batenta na yandi.
29 Ebuna bo diaka mpi bo lutisaka ndilu;Yandi pesaka bo bima yina bo vandaka na nzala na yo.+
30 Kansi na ntwala nde bo lungisa kibeni nzala na bo ya ngolo,Ntangu madia vandaka ntete na munoko na bo,
31 Nzambi wilaka bo makasi ya ngolo.+
Yandi fwaka bantu na bo ya kuluta ngolo;+Yandi bwisaka baleke ya babakala ya Izraele.
32 Ata yandi salaka mambu yai, bo sumukaka mingi kuluta+Mpi bo tulaka ve lukwikilu na bisalu na yandi ya kuyituka.+
33 Yo yina yandi sukisaka bilumbu na bo bonso mupepe ya mpamba,+Mpi bamvula na bo na boma ya ngolo ya kintulumukina.
34 Kansi konso ntangu yina yandi vandaka kufwa bantu ya nkaka na kati na bo, bo vandaka kusosa yandi;+Bo vandaka kuvutuka mpi kusosa Nzambi,
35 Bo vandaka kuyibuka nde Nzambi kele Ditadi na bo+Mpi nde Nzambi ya Kuluta Zulu kele Muntu yina sumbaka bo diaka.*+
36 Kansi bo mekaka kukusa yandi ti munoko na boMpi bo tubilaka yandi luvunu ti ludimi na bo.
37 Ntima na bo vandaka ve ya kukangama na yandi;+Mpi bo vandaka ve ya kwikama na kuwakana na yandi.+
38 Kansi yandi vandaka kuwila bo mawa;+Yandi vandaka kulolula* kifu na bo mpi vandaka kufwa bo ve.+
Mbala mingi yandi vandaka kukanga makasi na yandi+Na kisika ya kubasisa makasi na yandi yonso.
39 Sambu yandi vandaka kuyibuka nde bo kele nsuni,+Mupepe yina ke bulaka mpi ke lutaka kansi ke vutukaka ve.*
40 Mbala mingi bo kolamaka na ntwala na yandi na ntoto-makanga+Mpi bo pesaka yandi mpasi na ntima na ntoto ya zelo na zelo!+
41 Mbala na mbala bo mekaka+ Nzambi,Mpi bo pesaka Santu ya Izraele mawa.*
42 Bo yibukaka ve ngolo* na yandi,Kilumbu yina yandi gulusaka* bo na maboko ya mbeni,+
43 Mutindu yandi monisaka bidimbu na yandi na Ezipte+Mpi bimangu na yandi na ntoto ya Soani,
44 Mpi mutindu yandi kumisaka tu-bamasa ya Nile menga,+Na mpila nde bo lendaka ve kunwa masa na bamasa na bo.
45 Yandi tindaka biningi-ningi mingi sambu na kutatika bo mpi kumonisa bo mpasi,+Mpi makototo sambu na kubebisa insi na bo.+
46 Yandi pesaka bima na bo ya bilanga na bampasu ya lukasi,Mbuma ya kisalu na bo ya ngolo na bampasu ya ke tambulaka na kimvuka.+
47 Yandi fwaka banti na bo ya vinu na mvula ya matadi+Mpi banti na bo ya sikomore na mvula ya matadi.
48 Yandi nokisilaka bambisi na bo ya ke nataka kilo mvula ya matadi+Mpi yandi bulaka bitwisi na bo nsemo ya nzasi.*
49 Yandi tindilaka bo makasi na yandi ya ngolo,Nganzi, makasi, mpi mpasi,Yandi tindaka bimvuka ya bawanzio yina nataka mpasi.
50 Yandi yidikaka nzila sambu na makasi na yandi.
Yandi gulusaka bo* ve na lufwa;Mpi yandi fwaka bo* na kipupa.
51 Nsuka-nsuka, yandi fwaka bana yonso ya ntete ya Ezipte,+Luyantiku ya ngolo na bo ya kubuta na batenta ya Kami.
52 Na nima yandi basisaka bantu na yandi bonso kimvuka ya mameme,+Mpi yandi nataka bo bonso kibuka ya bambisi na ntoto-makanga.
53 Yandi twadisaka bo na lutaninu,Mpi bo waka boma ve;+Nzadi-mungwa fikaka bambeni na bo.+
54 Mpi yandi nataka bo na teritware na yandi ya santu,+Ntoto yai ya bangumba yina diboko na yandi ya kitata bakaka.+
55 Yandi kulaka makanda na ntwala na bo;+Yandi kabudilaka bo dikabu na nsinga ya kutesila;+Yandi vandisaka makanda ya Izraele na banzo na bo.+
56 Kansi bo landaka kutula ntembe ti* Nzambi ya Kuluta Zulu, mpi kukolama na yandi;+Bo tulaka ve dikebi na bangibusa na yandi.+
57 Bo mpi buyaka yandi mpi bo vandaka luvunu bonso ba-nkaka na bo.+
Bo vandaka bantu ya bo lenda tudila ve ntima bonso munduki ya tolo-tolo yina bo me kanga ve mbote.+
58 Bo landaka kupesa yandi makasi na bisika na bo ya kunanguka,+Mpi bo pusaka yandi na kuwila biteki na bo makasi.*+
59 Nzambi waka mpi kumaka na makasi ya ngolo,+Yo yina yandi buyaka Izraele kimakulu.
60 Nsuka-nsuka yandi yambu- laka nzo-tenta ya Shilo,+Tenta yina yandi vandaka kuzinga na kati ya bantu.+
61 Yandi bikaka nde kidimbu ya ngolo na yandi kukwenda na kimpika;Lukumu na yandi na maboko ya mbeni.+
62 Yandi pesaka bantu na yandi na maboko ya bambeni sambu bo fwa bo,+Mpi yandi wilaka dikabu na yandi makasi ya ngolo.
63 Tiya yokaka baleke na yandi ya babakala,Mpi bo yimbilaka ve bamwense na yandi bankunga ya makwela.*
64 Bo fwaka banganga-nzambi na yandi na mbele ya bitumba,+Mpi mifwidi na bo dilaka ve.+
65 Ebuna Yehowa telamaka bonso na mpongi,+Bonso muntu ya ngolo+ yina ke telama na nima ya kunwa vinu mingi.
66 Mpi yandi vutulaka bambeni na yandi nima;+Yandi pesaka bo nsoni kimakulu.
67 Yandi buyaka tenta ya Yozefi;Yandi solaka ve dikanda ya Efrayimi.
68 Kansi yandi solaka dikanda ya Yuda,+Ngumba ya Sioni, yina yandi ke zolaka.+
69 Yandi salaka nde kisika na yandi ya santu kuzinga mingi bonso zulu,*+Bonso ntoto yina yandi me tulaka kimakulu.+
70 Yandi solaka Davidi+ nsadi na yandiMpi yandi bakaka yandi na balupangu ya mameme,+
71 Yandi bakaka yandi ntangu yandi vandaka kukeba mameme ya bankento yina ke nwisa;Yandi kumisaka yandi ngungudi ya bantu na yandi, Yakobi,+Mpi ya dikabu na yandi, Izraele.+
72 Yandi gungulaka bo ti kwikama ya ntima,+Mpi yandi twadisaka bo ti maboko ya me zaba kisalu mbote.+
Banoti na nsi ya lutiti
^ Tala Bantendula ya Bangogo.
^ To “malongi.”
^ Na kisina, “ya kuyilama ve.”
^ Na kisina, “mukinzi.”
^ Na kisina, “mekaka Nzambi.”
^ To “madia sambu na mioyo na bo.”
^ To “ya bawanzio.”
^ To “Muntu na bo yina ke vutulaka mbi.”
^ Na kisina, “kufika.”
^ To mbala ya nkaka, “Nde mpeve ke basikaka mpi yo ke vutukaka ve.”
^ To “mpasi.”
^ Na kisina, “diboko.”
^ Na kisina, “sumbululaka.”
^ To mbala ya nkaka, “na fievre ya ngolo.”
^ To “moyo na bo.”
^ Na kisina, “luzingu na bo.”
^ To “kumeka.”
^ To “kimpala.”
^ Na kisina, “Mpi bo pesaka ve bamwense na yandi lukumu.”
^ Na kisina, “Yandi tungaka kisika na yandi ya santu bonso bisika ya kunanguka.”
